ಕರ್ನಾಟಕದಲ್ಲಿ ವಾಹನ ಮಾರಾಟ ಮೂರು ಪಟ್ಟು ಹೆಚ್ಚಳ: ಗ್ರಾಮೀಣ ಪ್ರದೇಶಗಳಲ್ಲಿ ಹೆಚ್ಚಿದ ಬೇಡಿಕೆ

ಒಂದು ಕಾಲದಲ್ಲಿ ಹೆಚ್ಚಿನ ಜನ ಸಾರ್ವಜನಿಕ ಸಾರಿಗೆ ವಾಹನವನ್ನು ನಂಬಿಕೊಂಡಿದ್ದರು. ಆದರೆ ಈಗ ಕಾಲ ಬದಲಾಗಿದೆ. ಎಲ್ಲರಿಗೂ ಧಾವಂತ ಕಚೇರಿ ಅಥವಾ ತುರ್ತು ಕೆಲಸಗಳಿಗೆ ತೆರಳುವ ತರಾತುರಿಯಲ್ಲಿರುತ್ತಾರೆ. ಪ್ರತಿ ಮನೆಯಲ್ಲಿ ದ್ವಿಚಕ್ರ ಅಥವಾ ಇನ್ಯಾವುದೋ ವಾಹನ ಮನೆಯಂಗಳದಲ್ಲಿ ಇರುವುದು ಸಾಮಾನ್ಯವಾಗಿದೆ. ರಾಜ್ಯ ರಾಜಧಾನಿ ಬೆಂಗಳೂರು ಒಂದನ್ನೇ ತೆಗೆದುಕೊಂಡರು ಸರಾಸರಿಯಾಗಿ ಪ್ರತಿ ಬೆಂಗಳೂರಿಗರು ಕನಿಷ್ಟ ಒಂದು ವಾಹನವನ್ನಾದರೂ ಹೊಂದಿದ್ದಾರೆ. ಇನ್ನು ಕರ್ನಾಟಕದ ಇತರ ಭಾಗಗಳಲ್ಲಿ ಪ್ರತಿ ಮೂರು ನಿವಾಸಿಗಳಲ್ಲಿ ಒಬ್ಬರಿಗೆ ಒಂದು ವಾಹನವಿರುತ್ತದೆ.

ನಗರಗಳಲ್ಲಿ ವಾಹನಗಳ ಸಂಖ್ಯೆ ಹೆಚ್ಚಾಗಿ ಕಂಡುಬಂದರೂ, ಕಳೆದ ದಶಕದಲ್ಲಿ ಗ್ರಾಮೀಣ ಕರ್ನಾಟಕದಲ್ಲಿ ವಾಹನ ಖರೀದಿ ಮೂರು ಪಟ್ಟು ಹೆಚ್ಚಾಗಿದೆ. ಇದು ಗ್ರಾಮೀಣ ಜನರಲ್ಲಿ ವೈಯಕ್ತಿಕ ವಾಹನಗಳ ಬಗ್ಗೆ ಹೆಚ್ಚುತ್ತಿರುವ ಆಸಕ್ತಿಯನ್ನು ತೋರಿಸುತ್ತದೆ. ಹಳ್ಳಿಗಳಲ್ಲಿ ಕೂಡ ಹೊಸ ಕಾರುಗಳು ಮತ್ತು ಬೈಕ್‌ಗಳು ಹೆಚ್ಚಿನ ಸಂಖ್ಯೆಯಲ್ಲಿ ರಸ್ತೆಗೆ ಇಳಿಯುತ್ತಿರುವುದು ಈ ಬದಲಾವಣೆಯ ಸ್ಪಷ್ಟ ಸೂಚನೆ. ಇದು ಗ್ರಾಮೀಣ ಜನರ ಜೀವನಶೈಲಿ ಮತ್ತು ಆರ್ಥಿಕ ಸ್ಥಿತಿಯಲ್ಲಿ ಆಗುತ್ತಿರುವ ಬದಲಾವಣೆಯನ್ನು ಸೂಚಿಸುತ್ತದೆ.

ನಗರ-ಗ್ರಾಮೀಣ ಟ್ರೆಂಡಿಂಗ್ ಹೇಗಿದೆ?

ಕರ್ನಾಟಕದಲ್ಲಿ ವಾಹನಗಳ ಸಂಖ್ಯೆ ಕಳೆದ ಹನ್ನೊಂದು ವರ್ಷಗಳಲ್ಲಿ ಗಣನೀಯವಾಗಿ ಹೆಚ್ಚಾಗಿದೆ. 2013-14ರಲ್ಲಿ 1.63 ಕೋಟಿ ವಾಹನಗಳಿದ್ದ ರಾಜ್ಯದಲ್ಲಿ, 2024ರ ಅಕ್ಟೋಬರ್ ಅಂತ್ಯದ ವೇಳೆಗೆ ಈ ಸಂಖ್ಯೆ 3.27 ಕೋಟಿಗೆ ಏರಿದೆ. ಇದು ಸುಮಾರು 130%ರಷ್ಟು ಹೆಚ್ಚಳವಾಗಿದ್ದು, ಕರ್ನಾಟಕದಲ್ಲಿ ವಾಹನಗಳ ಬಳಕೆ ಎಷ್ಟು ಜನಪ್ರಿಯವಾಗುತ್ತಿದೆ ಎಂಬುದನ್ನು ಸ್ಪಷ್ಟವಾಗಿ ತೋರಿಸುತ್ತದೆ. ಅದರಲ್ಲೂ ದ್ವಿಚಕ್ರ ವಾಹನಗಳು ಈ ಬೆಳವಣಿಗೆಯಲ್ಲಿ ಹೆಚ್ಚಿನ ಭಾಗವನ್ನು ಹೊಂದಿವೆ ಎಂದು ಸಾರಿಗೆ ಇಲಾಖೆ ತನ್ನ ವರದಿಯಲ್ಲಿ ಹೇಳಿದೆ. ನಂತರ ಸ್ಥಾನದಲ್ಲಿ ಕಾರುಗಳು ಮತ್ತು ಪ್ರಯಾಣಕ್ಕೆ ಬಳಸುವ ಆಟೋಗಳಿವೆ.

ವಾಹನ ನೋಂದಣಿಯು ರಾಜ್ಯಕ್ಕೆ ಗಮನಾರ್ಹ ಆದಾಯದ ಮಾರ್ಗವಾಗಿ ತನ್ನ ಸ್ಥಾನ ಉಳಿಸಿಕೊಂಡಿದ್ದು, ವಾಹನ ಮಾರಾಟದ ಹೆಚ್ಚಳದಿಂದ ಸರ್ಕಾರದ ಖಜಾನೆ ಲಾಭ ಪಡೆಯುತ್ತಿದೆ. ಅದರೂ, ವಾಹನಗಳ ಸಂಖ್ಯೆಯಲ್ಲಿನ ಹೆಚ್ಚಳವು ಹದಗೆಡುತ್ತಿರುವ ಸಂಚಾರ ದಟ್ಟಣೆ, ಪಾರ್ಕಿಂಗ್ ಸಮಸ್ಯೆಗಳು, ಹೆಚ್ಚಿನ ಮಾಲಿನ್ಯದ ಮಟ್ಟಗಳು ಮತ್ತು ನಿವಾಸಿಗಳಿಗೆ ಪ್ರತಿಕೂಲ ಆರೋಗ್ಯ ಪರಿಣಾಮಗಳಿಗೆ ಕಾರಣವಾಗಿದೆ.

ಸುಲಭವಾಗಿ ಸಿಗುತ್ತಿರುವ ವಾಹನ ಸಾಲಗಳು ಕೂಡಾ ಅನೇಕರು ಸ್ವಂತ ವಾಹನ ಹೊಂದುವ ಕನಸನ್ನು ನನಸು ಮಾಡುತ್ತಿದೆ. ಬ್ಯಾಂಕುಗಳು ಒದಗಿಸುತ್ತಿರುವ ಸಾಲಗಳು ಉಲ್ಬಣಕ್ಕೆ ಮತ್ತಷ್ಟು ಉತ್ತೇಜನ ನೀಡಿದ್ದು, ಹೊಸ ವಾಹನಗಳನ್ನು ಖರೀದಿಸಲು ಪ್ರೋತ್ಸಾಹಿಸವನ್ನು ನೀಡುತ್ತಿದೆ. ಇದೇ ಕಾರಣಕ್ಕೆ ಅನೇಕರು ಒಂದಲ್ಲ ಬಹು ವಾಹನಗಳನ್ನು ಹೊಂದಲು ಉತ್ಸುಕರಾಗಿದ್ದಾರೆ.

ಬೆಂಗಳೂರಿನ ಬೆಳವಣಿಗೆ:

ಬೆಂಗಳೂರು ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವಾಹನಗಳ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿದೆ. ಕಳೆದ ಹತ್ತು ವರ್ಷಗಳಲ್ಲಿ ಬೆಂಗಳೂರಿನ ಹೊರವಲಯಗಳಲ್ಲಿ ವಾಹನಗಳ ಸಂಖ್ಯೆ ಮೂರು ಪಟ್ಟು ಹೆಚ್ಚಾಗಿದ್ದರೆ, ಬೆಂಗಳೂರು ನಗರದಲ್ಲಿ ಇದು ದ್ವಿಗುಣಗೊಂಡಿದೆ. 2013-14ರಲ್ಲಿ 60 ಲಕ್ಷ ವಾಹನಗಳಿದ್ದ ಬೆಂಗಳೂರಿನಲ್ಲಿ ಈಗ 1.2 ಕೋಟಿ ವಾಹನಗಳಿವೆ. ಅಂದರೆ, ಸರಾಸರಿ ಪ್ರತಿ ಬೆಂಗಳೂರಿನ ನಿವಾಸಿ ಒಂದು ವಾಹನವನ್ನು ಹೊಂದಿದ್ದಾರೆ. ಆದರೆ ರಾಜ್ಯದ ಇತರ ಭಾಗಗಳಲ್ಲಿ ಈ ಅನುಪಾತವು ಪ್ರತಿ ಮೂರು ಜನರಿಗೆ ಒಂದು ವಾಹನ ಎಂಬಂತಿದೆ. ಪ್ರಸ್ತುತ, ಬೆಂಗಳೂರು ಪ್ರತಿದಿನ ಸುಮಾರು 6,000 ಹೊಸ ವಾಹನಗಳನ್ನು ನೋಂದಾಯಿಸುತ್ತದೆ ಮತ್ತು ಈ ದರದಲ್ಲಿ, ವಾಹನ ಸಂಖ್ಯೆಗಳು ಮುಂದಿನ ಐದು ವರ್ಷಗಳಲ್ಲಿ ನಗರದ ಜನಸಂಖ್ಯೆಯನ್ನು ಮೀರಿಸಬಹುದು.

ಏರಿಕೆಯ ಹಿಂದಿನ ಕಾರಣಗಳು

ಕರ್ನಾಟಕ ಮತ್ತು ಬೆಂಗಳೂರಿನಲ್ಲಿ ಹೆಚ್ಚುತ್ತಿರುವ ವಾಹನಗಳ ಸಂಖ್ಯೆಗೆ ಪ್ರಾಥಮಿಕ ಕಾರಣಗಳು ಹೆಚ್ಚಿನ ಆದಾಯ, ಸುಧಾರಿತ ಮೂಲಸೌಕರ್ಯ ಮತ್ತು ದ್ವಿಚಕ್ರ ವಾಹನ ಅಥವಾ ಕಾರನ್ನು ಹೊಂದಿರುವುದು ಅವಶ್ಯಕ ಎಂಬ ಗ್ರಹಿಕೆಯು ಇದಕ್ಕೆ ಮುಖ್ಯ ಕಾರನವಾಗಿದೆ. COVID-19 ಸಾಂಕ್ರಾಮಿಕ ಸಮಯದಲ್ಲಿ, ಜನರು ಸುರಕ್ಷತೆಗಾಗಿ ಸಾರ್ವಜನಿಕ ಸಾರಿಗೆಗಿಂತ ಖಾಸಗಿ ವಾಹನಗಳಿಗೆ ಆದ್ಯತೆ ನೀಡಿದ್ದು, ಇದು ವಾಹನ ಖರೀದಿಯನ್ನು ಮತ್ತಷ್ಟು ಹೆಚ್ಚಿಸಿತು ಎಂದು ಸಂಚಾರ ತಜ್ಞರ ಅಭಿಮತವಾಗಿದೆ. ಅಂಕಿಅಂಶಗಳ ಪ್ರಕಾರ ನೋಡಿದರೆ, 2011-12ನೇ ಸಾಲಿನಲ್ಲಿ ರಾಜ್ಯವು 1.35 ಕೋಟಿ ವಾಹನಗಳನ್ನು ದಾಖಲಿಸಿದೆ. 2015-16 ರ ಹೊತ್ತಿಗೆ, ಈ ಸಂಖ್ಯೆ 1.95 ಕೋಟಿಗೆ ಏರಿತು, ಕೇವಲ ನಾಲ್ಕು ವರ್ಷಗಳಲ್ಲಿ 44% ಹೆಚ್ಚಳವಾಗಿದೆ.

2020-21ರಲ್ಲಿ ವಾಹನಗಳ ಸಂಖ್ಯೆ 2.72 ಕೋಟಿಗೆ ತಲುಪಿದ್ದರಿಂದ ಈ ಏರುತ್ತಿರುವ ಪ್ರವೃತ್ತಿ ಮುಂದುವರೆಯಿತು, ಇದು ಐದು ವರ್ಷಗಳಲ್ಲಿ ಗಮನಾರ್ಹ 39% ಬೆಳವಣಿಗೆಯಾಗಿದೆ. ಇನ್ನು 2023-24ರಲ್ಲಿ 3.03 ಕೋಟಿ ವಾಹನಗಳು ದಾಖಲಾಗಿವೆ, ಇದು ಹಿಂದಿನ ಅಂಕಿ ಅಂಶಕ್ಕಿಂತ 11% ಏರಿಕೆಯನ್ನು ಪ್ರತಿಬಿಂಬಿಸುತ್ತದೆ. 2024-25 ರ ಅಂದಾಜುಗಳು 3.27 ಕೋಟಿ ವಾಹನಗಳಿಗೆ ಹೆಚ್ಚಳದ ನಿರೀಕ್ಷೆ ಇದೆ. ಇದು ಒಂದು ವರ್ಷದಲ್ಲಿ 8% ಬೆಳವಣಿಗೆಯನ್ನು ಪ್ರತಿನಿಧಿಸುತ್ತದೆ. 2022-23ಕ್ಕೆ ಹೋಲಿಸಿದರೆ ಪ್ರಸಕ್ತ ಹಣಕಾಸು ವರ್ಷದಲ್ಲಿ ಕರ್ನಾಟಕದಲ್ಲಿ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳ ಮಾರಾಟವು ಸುಮಾರು 12% ಹೆಚ್ಚಾಗಿದೆ.