ಅಮೆರಿಕದಲ್ಲಿ ಬ್ಯಾಂಕ್ ಯಡವಟ್ಟು; ಅಕೌಂಟ್ ನಲ್ಲಿ ಕಾಣಿಸಿತು $ 245 ಕೋಟಿ ಅಮೌಂಟ್

ನಿಮ್ಮ ಅಕೌಂಟ್ ನಲ್ಲಿ ಎಷ್ಟು ದುಡ್ಡಿದೆ ಎಂದು ಹಾಗೇ ಪರೀಕ್ಷಿಸಿದಾಗ 22,500 ಕೋಟಿ ರುಪಾಯಿ ಬ್ಯಾಲೆನ್ಸ್ ತೋರಿಸಿದರೆ ಏನು ಮಾಡ್ತೀರಿ? ಇನ್ನೂ ವಿಚಿತ್ರ ಅಂದರೆ, ಅದರಲ್ಲಿ ಒಂದು ರುಪಾಯಿ ಕೂಡ ಡ್ರಾ ಮಾಡಲು ಸಹ ಸಾಧ್ಯವಾಗದಿದ್ದಲ್ಲಿ ಆಗ ಏನು ಮಾಡ್ತೀರಿ? ಇಂಥ ಘಟನೆ ಆಗಿರುವುದು ಯು.ಎಸ್.ನ ಮಸಾಚ್ಯುಸೆಟ್ಸ್ ನಲ್ಲಿ. ನಿಮಗೆ ಆ ಮೊತ್ತ ಎಷ್ಟು ಎಂಬ ಅಂದಾಜು ಸಿಗಲಿ ಎಂಬ ಕಾರಣಕ್ಕೆ ರುಪಾಯಿಯಲ್ಲಿ ಲೆಕ್ಕ ತಿಳಿಸಬೇಕಾಯಿತು.

ಬ್ಯಾಂಕ್ ಆಫ್ ಅಮೆರಿಕದಲ್ಲಿ ಮಾನಸಿಕ ಚಿಕಿತ್ಸಾ ತಜ್ಞ ಬೇಲೇಸ್ ಅಗಿರೆ ಅವರ ಖಾತೆಯಲ್ಲಿ 245 ಕೋಟಿ ಅಮೆರಿಕನ್ ಡಾಲರ್ ಬ್ಯಾಲೆನ್ಸ್ ತೋರಿಸಿದೆ. ಅದು ಕೂಡ ಖಾತೆಯಲ್ಲಿ ತೋರಿಸಿದ ತಪ್ಪಾದ ಬ್ಯಾಲೆನ್ಸ್ ಹೊರೆತು ಅಷ್ಟು ಮೊತ್ತವೇನೂ ಖಾತೆಯಲ್ಲಿ ಇರಲಿಲ್ಲ. ಅದು ತಪ್ಪಿನಿಂದ ಹಾಗೆ ಆಗಿದ್ದು ಎಂದು ಬ್ಯಾಂಕ್ ವಕ್ತಾರ ಬಿಲ್ ಹಾಲ್ದೀನ್ ತಿಳಿಸಿದ್ದಾರೆ. ಜತೆಗೆ ಅದನ್ನು ಸರಿ ಮಾಡಲಾಗುತ್ತದೆ ಅಂತಲೂ ಹೇಳಿದ್ದಾರೆ.

ಗ್ರಾಹಕರ ಬ್ಲೇಸ್ ಅಗಿರೆ ಅವರು ಬ್ಯಾಂಕ್ ನಿಂದಲೇ ತಪ್ಪು ತಿದ್ದಬಹುದು ಅಂತ ಕಾದಿದ್ದಾರೆ. ಆದರೆ ಅದು ಆಗಿಲ್ಲ. ಆ ನಂತರ ರಿಲೇಷನ್ ಷಿಪ್ ಮ್ಯಾನೇಜರ್ ಗೆ ಸುದ್ದಿ ಮುಟ್ಟಿಸಿದ್ದಾರೆ. ವೆಬ್ ನಲ್ಲಿ ಹಾಗೂ ಮೊಬೈಲ್ ಫೋನ್ ಅಪ್ಲಿಕೇಷನ್ ಎರಡರಲ್ಲೂ ಇದೇ ಬ್ಯಾಲೆನ್ಸ್ ತೋರಿಸುತ್ತಿದೆ ಎಂದು ತಿಳಿಸಿದ್ದಾರೆ. ಆ ನಂತರ ಬ್ಯಾಂಕ್ ನಿಂದ ಅಂತೂ ತಪ್ಪು ಸರಿ ಪಡಿಸಿದ್ದಾರೆ ಎಂದು ಮಾಧ್ಯಮಗಳ ಮೂಲಕ ಗೊತ್ತಾಗಿದೆ.

ಇತ್ತೀಚೆಗೆ ಸಿಟಿ ಗ್ರೂಪ್ ನಿಂದಲೂ ಇಂಥದ್ದೇ ಯಡವಟ್ಟು ಆಗಿತ್ತು. 90 ಕೋಟಿ ಅಮೆರಿಕನ್ ಡಾಲರ್ ಮೊತ್ತವನ್ನು ವರ್ಗಾವಣೆ ಮಾಡಿದ್ದರು. ಆ ಮೊತ್ತವನ್ನು ವರ್ಗಾವಣೆ ಮಾಡಿದ್ದು ಸಾಲಗಾರರಿಗೆ. ಕೆಲವರು ತಾವಾಗಿಯೇ ವಾಪಸ್ ನೀಡಿದರು. ಮತ್ತೆ ಕೆಲವರು, ವಾಪಸ್ ಕೊಡಲು ಆಗಲ್ಲ ಅಂದರು. ಅಂಥವರ ಜತೆ ಈಗ ಸಿಟಿ ಗ್ರೂಪ್ ಕಾನೂನು ಸಮರದಲ್ಲಿ ತೊಡಗಿದೆ.