ಮುಹೂರ್ತ ಟ್ರೇಡಿಂಗ್ ಆರಂಭ: ಷೇರುಪೇಟೆ ಹೇಗಿದೆ?

ದೀಪಾವಳಿ ಹಬ್ಬದ ಸಂಭ್ರಮದ ನಡುವೆ ಇಂದು ಷೇರುಪೇಟೆ ಎಂದಿನ ವಹಿವಾಟನ್ನು ನಡೆಸಿಲ್ಲ. ಆದರೆ ಸಂಜೆ ಆರು ಗಂಟೆ ಬಳಿಕ ಮುಹೂರ್ತ ಟ್ರೇಡಿಂಗ್‌ಗಾಗಿ ಷೇರು ಮಾರುಕಟ್ಟೆಯು ತೆರೆದುಕೊಂಡಿದೆ.

30 ಷೇರುಗಳ ಬಿಎಸ್‌ಇ ಸೂಚ್ಯಂಕ 663.73 ಅಂಕ ಅಥವಾ ಶೇಕಡ 1.12ರಷ್ಟು ಏರಿಕೆಯಾಗಿ 59970.88ಕ್ಕೆ ಮುಹೂರ್ತ ವಹಿವಾಟು ಆರಂಭ ಮಾಡಿದೆ. ಇನ್ನು ನಿಫ್ಟಿ 192.50 ಅಂಕ ಅಥವಾ ಶೇಕಡ 1.10ರಷ್ಟು ಹೆಚ್ಚಳವಾಗಿ 17768.80ಕ್ಕೆ ವಹಿವಾಟಿಗೆ ಇಳಿದಿದೆ. ಇನ್ನು 1748 ಷೇರುಗಳು ಏರಿಕೆಯಾಗಿದ್ದರೆ, 452 ಸ್ಟಾಕ್‌ಗಳು ಇಳಿಕೆಯಾಗಿದೆ. ಇನ್ನು 119 ಷೇರುಗಳು ಯಥಾಸ್ಥಿತಿ ಕಾಯ್ದುಕೊಂಡಿದೆ.

ಸಾಮಾನ್ಯವಾಗಿ ಮೂಹೂರ್ತ ಟ್ರೇಡಿಂಗ್ ವೇಳೆ ಷೇರು ಮಾರುಕಟ್ಟೆಯು ಏರುಗತಿಯಲ್ಲಿ ಸಾಗುತ್ತದೆ. ಈ ವರ್ಷವೂ ಕೂಡಾ ಷೇರುಪೇಟೆ ಜಿಗಿದಿದೆ. ಹೂಡಿಕೆದಾರರಿಗೆ ಈ ವಹಿವಾಟು ಹೆಚ್ಚಿನ ಲಾಭವನ್ನು ತರುವ ಸಾಧ್ಯತೆ ಇದೆ.

ಏನಿದು ಮುಹೂರ್ತ ಟ್ರೇಡಿಂಗ್?

ಪ್ರತಿ ವರ್ಷದವು ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಒಂದು ಗಂಟೆಗಳ ಕಾಲ ಮುಹೂರ್ತ ಟ್ರೇಡಿಂಗ್ ಸೆಷನ್ ನಡೆಯುತ್ತದೆ. ಕಳೆದ ವರ್ಷ ನವೆಂಬರ್ 4ರಂದು ಸೆಷನ್ ನಡೆದಿತ್ತು. ಈ ಬಾರಿ ಅಕ್ಟೋಬರ್ 24ರಂದು ಸೆಷನ್ ನಡೆಯಲಿದೆ. ದೀಪಾವಳಿಯ ಈ ಸಂದರ್ಭದಲ್ಲಿ ಹೂಡಿಕೆಯಿಂದಾಗಿ ಯಶಸ್ಸು ಹಾಗೂ ಲಾಭ ಲಭಿಸುತ್ತದೆ ಎಂಬ ನಂಬಿಕೆಯಿದ್ದು ಈ ಹಿನ್ನೆಲೆ ಪೂಜೆಯನ್ನು ನಡೆಸಿ ವಹಿವಾಟು ಆರಂಭಿಸಲಾಗುತ್ತದೆ.

ಈ ಸಮಯಕ್ಕೆ ನೆಸ್ಲೆ ಇಂಡಿಯಾ ಸ್ಟಾಕ್ ಭಾರೀ ಏರಿಕೆಯಾಗಿದೆ. ಶೇಕಡ 3.23ರಷ್ಟು ಹೆಚ್ಚಳವಾಗಿದ್ದು ರೂಪಾಯಿ 20,950.20ಕ್ಕೆ ತಲುಪಿದೆ. ಇನ್ನು ಈ ಮುಹೂರ್ತ ಟ್ರೇಡಿಂಗ್ ವೇಳೆ ಎಚ್‌ಯುಎಲ್ ಸ್ಟಾಕ್ ಭಾರೀ ಕುಸಿತ ಕಂಡ ಸ್ಟಾಕ್ ಆಗಿದೆ. ಷೇರು ಶೇಕಡ 3.22ರಷ್ಟು ಏರಿಕೆಯಾಗಿದ್ದು, 2,568.45 ರೂಪಾಯಿಗೆ ತಲುಪಿದೆ. ನಿಫ್ಟಿ ಪಿಎಸ್‌ಯು ಬ್ಯಾಂಕ್ ಟಾಪ್ ಸೆಕ್ಟರ್ ಆಗಿದ್ದರೆ, ನಿಫ್ಟಿ ಎಫ್‌ಎಂಸಿಜಿ ಸ್ಟಾಕ್ ಭಾರೀ ಇಳಿಕೆಯಾಗಿದೆ.