ವಾಹನ ಸವಾರರಿಗೆ ಶಾಕ್‌! ಟೋಲ್ ಶುಲ್ಕ ಶೇ.5 ರಷ್ಟು ಹೆಚ್ಚಳ..ಮೈಸೂರು-ಬೆಂಗಳೂರು ಪ್ರಯಾಣ ಇನ್ನಷ್ಟು ದುಬಾರಿ..ಯಾವ ವಾಹನಕ್ಕೆ ಎಷ್ಟು?

ವಾಹನ ಸವಾರರಿಗೆ ದೊಡ್ಡ ಶಾಕ್‌... ನೀವು ರಾಷ್ಟ್ರೀಯ ಹೆದ್ದಾರಿಬೆಂಗಳೂರು-ಮೈಸೂರು ನಡುವೆ ಸಂಚರಿಸುತ್ತಿದ್ದರೆ ಈ ಸುದ್ದಿಯನ್ನು ಓದಲೇ ಬೇಕು.ಹೌದು,ಈಗಾಗಲೇ ಬೆಲೆ ಏರಿಕೆಯಿಂದ ಬೇಸತ್ತು ಹೋದ ಸಾರ್ವಜನಿಕರಿಗೆ ಮತ್ತೆ ಟೋಲ್ ಸುಂಕದ ಹೆಚ್ಚಳದ ಬರೆ ಬಿಂದಿದ್ದು, ಪ್ರಯಾಣ ಇನ್ನಷ್ಟು ದುಬಾರಿಯಾಗಲಿದೆ.

ಬೆಂಗಳೂರು-ಮೈಸೂರು ಎಕ್ಸ್‌ಪ್ರೆಸ್‌ ವೇ ನಿರ್ಮಾಣ ಆದಾಗಿನಿಂದಲೂ ಒಂದಲ್ಲ ಒಂದು ವಿಚಾರಕ್ಕೆ ಸುದ್ದಿಯಾಗುತ್ತಲೇ ಇತ್ತು. ಟೋಲ್‌ ದರವನ್ನು ಆಗಾಗ ಏರಿಕೆ ಮಾಡುತ್ತಲೇ ಇತ್ತು. ಆದರೆ ಇದೀಗ ಮತ್ತೆ ಬೆಂಗಳೂರು-ಮೈಸೂರು ರಾಷ್ಟ್ರೀಯ ಹೆದ್ದಾರಿ ಟೋಲ್ ದರ ಮತ್ತೆ ಹೆಚ್ಚಳ ಮಾಡಿದೆ. ಶೇ 5ರಿಂದ ಶೇ 10ರವರೆಗೆ ದರ ಏರಿಕೆ ಮಾಡಲಾಗಿದ್ದು, ಈ ಪರಿಷ್ಕೃತ ದರವನ್ನು ಏಪ್ರಿಲ್ 1, 2025ರ ಮಧ್ಯರಾತ್ರಿಯಿಂದ ಜಾರಿ ಮಾಡಲಾಗಿದೆ.

ಬೆಂಗಳೂರು-ಮೈಸೂರು ಎಕ್ಸ್‌ಪ್ರೆಸ್‌ ವೇ ಫೆಬ್ರವರಿ 2023 ರಲ್ಲಿ ಹೆದ್ದಾರಿ ಉದ್ಘಾಟನೆಯಾದ ನಂತರದ ಮೂರನೇ ಬಾರಿಗೆ ದರ ಪರಿಷ್ಕರಣೆ ಮಾಡಿದೆ. ಗಣಂಗೂರು, ಕಣಿಮಿಣಿಕೆ ಮತ್ತು ಶೇಷಗಿರಿಹಳ್ಳಿ ಟೋಲ್ ಪ್ಲಾಜಾಗಳು ರಾಷ್ಟ್ರೀಯ ಹೆದ್ದಾರಿ ಶುಲ್ಕ ನಿಯಮಗಳು, 2008 ರ ಅಡಿಯಲ್ಲಿ ವಾರ್ಷಿಕ ಹಣದುಬ್ಬರ-ಸಂಬಂಧಿತ ಪರಿಷ್ಕರಣೆಯ ಭಾಗವಾಗಿ ಈ ಹೆಚ್ಚಳವನ್ನು ಜಾರಿಗೆ ತಂದಿದ್ದು, ಗರಿಷ್ಠ ಶೇಕಡಾ 5 ಮತ್ತು ಕನಿಷ್ಠ ಶೇಕಡಾ 3 ರಷ್ಟು ಹೆಚ್ಚಳವನ್ನು ಮಾಡಿದೆ.

ಪ್ರಸ್ತುತ ಇಂದುವರೆಗೂಎರಡು ಪ್ಲಾಜಾಗಳಲ್ಲಿ ಟೋಲ್‌ಗಳನ್ನು ಸಂಗ್ರಹಿಸಲಾಗುತ್ತಿದೆ. ಆದರೆ NHAI ಪ್ರವೇಶ ಮತ್ತು ನಿರ್ಗಮನ ಸ್ಥಳಗಳಲ್ಲಿ ಬಹು ಟೋಲ್ ಬೂತ್‌ಗಳನ್ನು ಪ್ರಸ್ತಾಪಿಸಿದ್ದು, ವಾಹನ ಚಾಲಕರು ಪ್ರಯಾಣಿಸಿದ ದೂರವನ್ನು ಆಧರಿಸಿ ಪಾವತಿಸಲು ಅನುಮತಿ ಮಾಡಿಕೊಂಡಲಾಗಿದೆ.

80,000 ಕ್ಕೂ ಹೆಚ್ಚು ವಾಹನಗಳು ಪ್ರತಿದಿನ ಹೆದ್ದಾರಿಯಲ್ಲಿ ಪ್ರಯಾಣವನ್ನು ಮಾಡುತ್ತಾರೆ. ಈ ಹೊಸ ಟೋಲ್‌ ಸುಂಕವು ಪರಿಷ್ಕರಣೆಯು ಖಾಸಗಿ ಮತ್ತು ವಾಣಿಜ್ಯ ವಾಹನಗಳೆರಡರ ಮೇಲೂ ಸಹ ಹೆಚ್ಚಿನ ಪರಿಣಾಮವನ್ನು ಬೀರುತ್ತವೆ. ಇದರಿಂದ ಪ್ರಯಾಣಿಕರ ಜೇಬು ಖಾಲಿಯಾಗುತ್ತದೆ.

NHAI (ಹೆದ್ದಾರಿ ಪ್ರಾಧಿಕಾರದಿಂದ) ಅಧಿಕಾರಿಗಳ ಪ್ರಕಾರ ಶೇ.3 ರಿಂದ 5ರಷ್ಟು ಟೋಲ್ ಸುಂಕದ ಹೆಚ್ಚಳವು ಭಾರತದ ರಾಷ್ಟ್ರೀಯ ಹೆದ್ದಾರಿಗಳ ಮೇಲಿನ ದರಗಳನ್ನು ಪ್ರತಿ ವರ್ಷವೂ ಪರಿಷ್ಕರಿಸುವ ಯೋಜನೆಯ ಭಾಗವಾಗಿದೆ ಎಂದು ಅವರು ಸ್ಪಷ್ಟಪಡಿಸಲಾಗಿದೆ.

ಈ ದರ ಹೆಚ್ಚಳವು ಪ್ರತಿ ವರ್ಷದ ವಾರ್ಷಿಕ ಪರಿಷ್ಕರಣೆಯನ್ನು ಮಾಡಲಾಗುತ್ತದೆ. ಹೀಗಾಗಿ, ಮುಂದಿನ ವರ್ಷಗಳಿಂದ ಕೂಡ, ಶುಲ್ಕ ದರದಲ್ಲಿ ನಿರೀಕ್ಷಿತ ಏರಿಕೆಯಾಗಬಹುದು.

NHAI ಅಧಿಸೂಚನೆಯ ಪ್ರಕಾರ, ಬೆಂಗಳೂರು-ನಿಡಘಟ್ಟ ವಿಭಾಗದಲ್ಲಿ ಪ್ರಯಾಣಿಸುವ ಕಾರುಗಳು, ವ್ಯಾನ್‌ಗಳು ಮತ್ತು ಜೀಪ್‌ಗಳಂತಹ ವಾಹನಗಳು ಈಗ 24 ಗಂಟೆಗಳ ಒಳಗೆ ಏಕಮುಖ ಪ್ರಯಾಣಕ್ಕೆ 180 ರೂ. ಮತ್ತು ಸುತ್ತಿನ ಪ್ರಯಾಣಕ್ಕೆ 270 ರೂ. ಶುಲ್ಕವನ್ನು ವಿಧಿಸಲಾಗುತ್ತದೆ. ಹಿಂದೆ, ಈ ದರಗಳು 170 ರೂ. ಮತ್ತು 255 ರೂ.ಗಳಷ್ಟಿದ್ದವು. ಕಣಿಮಿಣಿಕೆ ಮತ್ತು ಶೇಷಗಿರಿಹಳ್ಳಿ ಟೋಲ್ ಪ್ಲಾಜಾಗಳಲ್ಲಿ ಟೋಲ್ ಸಂಗ್ರಹವನ್ನು ಸಹ ಮಾಡಲಾಗುತ್ತದೆ.

ಸಣ್ಣ ವಾಣಿಜ್ಯ ವಾಹನಗಳು, ಲಘು ಸರಕು ವಾಹನಗಳು ಮತ್ತು ಮಿನಿ ಬಸ್‌ಗಳಿಗೆ, ಒಂದೇ ಪ್ರಯಾಣದ ಟೋಲ್ ಶುಲ್ಕವನ್ನು 290 ರೂ.ಗಳಿಗೆ ಪರಿಷ್ಕರಣೆ ಮಾಡಲಾಗಿದೆ. ಹಿಂತಿರುಗುವ ಪ್ರಯಾಣದ ಶುಲ್ಕ 430 ರೂ.ಗಳಿಗೆ ಪರಿಷ್ಕರಿಸಲಾಗಿದೆ. ಇದು ಹಿಂದಿನ ದರಗಳಾದ ಕ್ರಮವಾಗಿ 275 ರೂ. ಮತ್ತು 415 ರೂ.ಗಳಿಂದ ಏರಿಕೆ ಮಾಡಲಾಗಿದೆ.

ಟ್ರಕ್‌ಗಳು ಮತ್ತು ಬಸ್‌ಗಳು (ಎರಡು ಆಕ್ಸಲ್‌ಗಳು) ಈಗ ಒಂದೇ ಪ್ರಯಾಣಕ್ಕೆ 605 ರೂ. ಮತ್ತು ಹಿಂತಿರುಗುವ ಪ್ರಯಾಣಕ್ಕೆ 905 ರೂ. ವಿಧಿಸಲಾಗುತ್ತದೆ. ಹಿಂದಿನ ದರಗಳು ಕ್ರಮವಾಗಿ 580 ರೂ.ಮತ್ತು 870 ರೂ. ಇದ್ದವು. ಟೋಲ್ ಪ್ಲಾಜಾದಿಂದ 20 ಕಿ.ಮೀ. ಒಳಗಿನ ವಾಣಿಜ್ಯೇತರ ವಾಹನಗಳಿಗೆ ಈಗ ಮಾಸಿಕ ಪಾಸ್ ಬೆಲೆ 350 ರೂ. ಆಗಿದ್ದು, ಇದು 340 ರೂ.ಗಳಿಂದ ಹೆಚ್ಚಳವಾಗಿದೆ.

ಬೆಂಗಳೂರಿನಿಂದ ನಿಡಘಟ್ಟ ಮಾರ್ಗ

ನಿಡಘಟ್ಟದಿಂದ ಮೈಸೂರು ಮಾರ್ಗಕ್ಕೆ, ಗಣಂಗೂರು ಗ್ರಾಮದಲ್ಲಿ ಟೋಲ್ ಸಂಗ್ರಹಕ್ಕಾಗಿ ಹೊರಡಿಸಲಾದ ಅಧಿಸೂಚನೆಯ ಪ್ರಕಾರ, ಕಾರು ಪ್ರಯಾಣಕ್ಕೆ 24 ಗಂಟೆಗಳ ಒಳಗೆ ಒಂದೇ ಪ್ರಯಾಣಕ್ಕೆ 175 ರೂ. ಮತ್ತು ಕಾರುಗಳು, ವ್ಯಾನ್‌ಗಳು ಮತ್ತು ಜೀಪ್‌ಗಳಿಗೆ ಹಿಂತಿರುಗಲು 260 ರೂ. ಪಾವತಿಸಬೇಕಾಗುತ್ತದೆ, ಹಿಂದಿನ ದರಗಳು 160 ಮತ್ತು 240 ರೂ. ಇತ್ತು.

ಲಘು ವಾಣಿಜ್ಯ ವಾಹನಗಳು, ಲಘು ಸರಕು ವಾಹನಗಳು ಮತ್ತು ಮಿನಿ ಬಸ್‌ಗಳಿಗೆ, ಒಂದೇ ಪ್ರಯಾಣದ ಟೋಲ್ ಶುಲ್ಕವನ್ನು 280 ರೂ.ಗಳಿಗೆ ಪರಿಷ್ಕರಿಸಲಾಗಿದೆ. ಹಿಂತಿರುಗುವ ಪ್ರಯಾಣದ ಶುಲ್ಕ 420 ರೂ.ಗಳಿಗೆ ಪರಿಷ್ಕರಿಸಲಾಗಿದೆ. ಇದು ಹಿಂದಿನ ದರಗಳು 275 ಮತ್ತು 415 ರೂ.ಗಳಿಂದ ಹೆಚ್ಚಳವಾಗಿದೆ.

ಟ್ರಕ್‌ಗಳು ಮತ್ತು ಬಸ್‌ಗಳು (ಎರಡು ಆಕ್ಸಲ್‌ಗಳು) ಈಗ ಒಂದೇ ಪ್ರಯಾಣಕ್ಕೆ 590 ರೂ. ಮತ್ತು ಹಿಂತಿರುಗುವ ಪ್ರಯಾಣಕ್ಕೆ 885 ರೂ. ವಿಧಿಸಲಾಗುವುದು, ಹಿಂದಿನ ದರಗಳು 580 ರೂ. ಮತ್ತು 870 ರೂ.ಗಳು ಇತ್ತು.

ಮೂರು ಆಕ್ಸಲ್ ವಾಣಿಜ್ಯ ವಾಹನಗಳು ಈಗ ಒಂದೇ ಪ್ರಯಾಣಕ್ಕೆ 645 ರೂ. ಮತ್ತು 24 ಗಂಟೆಗಳ ಒಳಗೆ ಹಿಂತಿರುಗಿದರೆ 965 ರೂ. ಪಾವತಿಸಬೇಕಾಗುತ್ತದೆ. ಭಾರೀ ನಿರ್ಮಾಣ ಯಂತ್ರೋಪಕರಣಗಳು, ಮಣ್ಣು ಚಲಿಸುವ ಉಪಕರಣಗಳು ಅಥವಾ ಬಹು-ಆಕ್ಸಲ್ ವಾಹನ (MAV) (4-6 ಆಕ್ಸಲ್‌ಗಳು) ಒಂದೇ ಪ್ರಯಾಣಕ್ಕೆ 925 ರೂ. ಮತ್ತು 24 ಗಂಟೆಗಳ ಒಳಗೆ ಹಿಂತಿರುಗಿದರೆ 1,385 ರೂ. ಪಾವತಿಸಬೇಕಾಗುತ್ತದೆ.
ದೊಡ್ಡ ಗಾತ್ರದ ವಾಹನಗಳು (7 ಅಥವಾ ಹೆಚ್ಚಿನ ಆಕ್ಸಲ್‌ಗಳು) ಒಂದೇ ಪ್ರಯಾಣಕ್ಕೆ 1,125 ರೂ. ಮತ್ತು 24 ಗಂಟೆಗಳ ಒಳಗೆ ಹಿಂತಿರುಗಿದರೆ 1690 ರೂ. ಪಾವತಿಸಬೇಕಾಗುತ್ತದೆ.

ಟೋಲ್ ಪ್ಲಾಜಾದಿಂದ 20 ಕಿ.ಮೀ. ಒಳಗಿನ ವಾಣಿಜ್ಯೇತರ ವಾಹನಗಳಿಗೆ ಈಗ ಮಾಸಿಕ ಪಾಸ್ ದರ 340 ರೂ.ಗಳಿಂದ 350 ರೂ.ಗಳಿಗೆ ಏರಿಕೆಯಾಗಿದೆ.

ಮಾಸಿಕ ಪಾಸ್ ದರ ಎಷ್ಟು ಆಗಿದೆ?

ನಿಡಘಟ್ಟ-ಮೈಸೂರು ವಿಭಾಗದಲ್ಲಿ ವಿವಿಧ ರೀತಿಯ ವಾಹನಗಳಿಗೆ ಮಾಸಿಕ ಪಾಸ್ ಶುಲ್ಕಗಳು ಹೀಗಿವೆ:

ಕಾರುಗಳು, ಜೀಪುಗಳು ಮತ್ತು ವ್ಯಾನ್‌ಗಳು: ಮಾಸಿಕ ಪಾಸ್ ಶುಲ್ಕ 5,810 (50 ಏಕ ಪ್ರಯಾಣಗಳಿಗಾಗಿ).

ಲಘು ವಾಣಿಜ್ಯ ವಾಹನಗಳು: 9,385.

ಟ್ರಕ್‌ಗಳು ಮತ್ತು ಬಸ್‌ಗಳು (ಎರಡು ಆಕ್ಸಲ್‌ಗಳು): 19,660.

ಮೂರು-ಆಕ್ಸಲ್ ವಾಣಿಜ್ಯ ವಾಹನಗಳು: 21,445.

4 ರಿಂದ 6 ಆಕ್ಸಲ್‌ಗಳ ಚಲಿಸುವ ವಾಹನಗಳು: 30,830.

ದೊಡ್ಡ ಗಾತ್ರದ ವಾಹನಗಳು: 37,530.

ಟೋಲ್ ಶುಲ್ಕಗಳು ಕಾರುಗಳು, ಜೀಪುಗಳು, ವ್ಯಾನ್‌ಗಳು ಮತ್ತು ಲಘು ಮೋಟಾರು ವಾಹನಗಳಿಗೆ ಸ್ಥಳೀಯ ಮಾಸಿಕ ಪಾಸ್‌ನ ಬೆಲೆ 350 ರೂ.ಗಳಾಗಿದ್ದು, ಇತರ ವಾಹನಗಳಿಗೆ ಇದು ಅನ್ವಯವಾಗುವುದಿಲ್ಲ.

ಒಂದು ಕಡೆ ಗ್ಯಾರಂಟಿ ಮೂಲಕ ಫಲಾನುಭವಿಗಳಿಗೆ ಅನುಕೂಲ ಕಲ್ಪಿಸಿದರೆ ಮತ್ತೊಂದು ಕಡೆ ಬೆಲೆ ಏರಿಕೆ ಮೂಲಕ ಜನರ‌ ಜೋಬನ್ನು ರಾಜ್ಯ ಸರ್ಕಾರ ಬರಿದು ಮಾಡುತ್ತಿದೆ. ಇದು ಸಾಲದ್ದು ಎಂದು ಕೇಂದ್ರ ಸರ್ಕಾರ ಸಹ ಟೋಲ್ ಹೆಚ್ಚಳಕ್ಕೆ ಅನುಮೋದನೆ ಕೊಟ್ಟು ಮತ್ತೆ ಸಾರ್ವಜನಿಕ ಬೆಲೆ ಏರಿಕೆಯ ಬರೆ ಹಾಕಿದೆ.

ಬೆಂಗಳೂರು ಮೈಸೂರು ಸಂಚರಿಸಿದರೆ ಪ್ರಯಾಣ ದುಬಾರಿಯಾಗಿದ್ದು,ಹೊಸ ಶುಲ್ಕ ಪರಿಷ್ಕರಣೆಯು ನಿತ್ಯ ಪ್ರಯಾಣ ಮಾಡುವವರ ಮೇಲೆ ನೇರ ಪರಿಣಾಮ ಬೀರಲಿದೆ. ಅದೇ ರೀತಿ ಸರಕು ಸಾಗಣೆಯ, ಸಾರ್ವಜನಿಕ ಸಾರಿಗೆ ಮುಂತಾದವುಗಳ ಮೇಲಿನ ಸುಂಕದ ಹೊರೆ ಅಂತಿಮವಾಗಿ ಜನರ ಮೇಲೆಯೇ ಬೀಳಲಿದೆ.

ಟೋಲ್ ಶುಲ್ಕ ಹೆಚ್ಚಳವು ಪ್ರಯಾಣಿಕರು ಮತ್ತು ಸಾರಿಗೆ ನಿರ್ವಾಹಕರಲ್ಲಿ ಕಳವಳವನ್ನು ಉಂಟುಮಾಡಿದೆ, ಹೆಚ್ಚುತ್ತಿರುವ ವೆಚ್ಚಗಳು ತಮ್ಮ ಆರ್ಥಿಕ ಹೊರೆಯನ್ನು ಮತ್ತಷ್ಟು ಹೆಚ್ಚಳ ಮಾಡುತ್ತಿದೆ.ಟೋಲ್ ಶುಲ್ಕ ಹೆಚ್ಚಳ ಸಹ ಮತ್ತಷ್ಟು ಹೊರೆಯಾಗುತ್ತಲೇ ಇದೆ.