ಇಪಿಎಫ್ ಚಂದಾದಾರ ಸಿಬ್ಬಂದಿಗೆ 7 ಲಕ್ಷದ ತನಕ ಇನ್ಷೂರೆನ್ಸ್; EPFO ಘೋಷಣೆ

ಎಂಪ್ಲಾಯೀಸ್ ಪ್ರಾವಿಡೆಂಟ್ ಫಂಡ್ ಆರ್ಗನೈಸೇಷನ್ (EPFO)ನಿಂದ ಕೋಟ್ಯಂತರ ಉದ್ಯೋಗಿಗಳಿಗೆ ಅನುಕೂಲ ಆಗುವಂಥ ಘೋಷಣೆಯನ್ನು ಬುಧವಾರ ಮಾಡಲಾಗಿದೆ. ಎಂಪ್ಲಾಯೀಸ್ ಡೆಪಾಸಿಟ್ ಲಿಂಕ್ಡ್ ಇನ್ಷೂರೆನ್ಸ್ (EDLI) ಯೋಜನೆ ಅಡಿಯಲ್ಲಿ ಈಗಿರುವ 6 ಲಕ್ಷ ರುಪಾಯಿ ಇದ್ದ ಗರಿಷ್ಠ ಮೊತ್ತವನ್ನು 7 ಲಕ್ಷ ರುಪಾಯಿಗೆ ಹೆಚ್ಚಿಸಲಾಗಿದೆ.

ಕಾರ್ಮಿಕ ಹಾಗೂ ಉದ್ಯೋಗ ಸಚಿವಾಲಯ ಹೇಳಿಕೆ ನೀಡಿದ್ದು, ಇಪಿಎಫ್ ಯೋಜನೆಯ ಚಂದಾದಾರರು ಎಲ್ಲರಿಗೂ EDLI ಯೋಜನೆಯಲ್ಲಿ ಇನ್ಷೂರೆನ್ಸ್ ಕವರ್ ಕಡ್ಡಾಯ. ಇಪಿಎಫ್ ಚಂದಾದಾರರು ಸಹಜ ಕಾರಣಗಳಿಂದಾಗಿ, ಅನಾರೋಗ್ಯದಿಂದ ಅಥವಾ ಅಪಘಾತದಲ್ಲಿ ಮೃತಪಟ್ಟಲ್ಲಿ ನಾಮಿನಿ ಆದವರಿಗೆ ಒಟ್ಟಿಗೆ 7 ಲಕ್ಷ ರುಪಾಯಿ ತನಕ ಮೊತ್ತವನ್ನು ಒಂದೇ ಸಲಕ್ಕೆ ಪಾವತಿಸಲಾಗುತ್ತದೆ.

ಇಪಿಎಫ್ ಹಾಗೂ ಮಿಸಲೇನಿಯಸ್ ಪ್ರಾವಿಷನ್ ಕಾಯ್ದೆ, 1952ರ ಅಡಿಯಲ್ಲಿ ಬರುವ ಎಲ್ಲ ಸಂಸ್ಥೆಗಳೂ ಇಡಿಎಲ್ ಐ ಕೆಳಗೆ ಬರುತ್ತವೆ. ಮೃತಪಡುವ ಮುನ್ನ ಹನ್ನೆರಡು ತಿಂಗಳ ಕಾಲ ಪಡೆದ ಸಂಬಳದ ಆಧಾರದಲ್ಲಿ ಇನ್ಷೂರೆನ್ಸ್ ಕವರ್ ಮೊತ್ತ ನಿರ್ಧಾರ ಆಗುತ್ತದೆ. ಇಡಿಎಲ್ ಐ ಯೋಜನೆಗೆ ಉದ್ಯೋಗದಾತರು ಹಾಗೂ ಕೇಂದ್ರ ಸರ್ಕಾರದಿಂದ ಕೊಡುಗೆ ನೀಡಲಾಗುತ್ತದೆ.

ಇದಕ್ಕೆ ಉದ್ಯೋಗಿಗಳು ಯಾವುದೇ ಕೊಡುಗೆ ನೀಡುವ ಅಗತ್ಯ ಇಲ್ಲ. ಈ ಸ್ಕೀಮ್ ಅಡಿಯಲ್ಲಿ ಕಳೆದ ಹನ್ನೆರಡು ತಿಂಗಳಲ್ಲಿ ಪಡೆದ ಸರಾಸರಿ ವೇತನವನ್ನು ಲೆಕ್ಕ ಹಾಕಿ, ಅದರ ಮೂವತ್ತು ಪಟ್ಟು ಅಥವಾ ಗರಿಷ್ಠ 7 ಲಕ್ಷ ರುಪಾಯಿ ದೊರೆಯುತ್ತದೆ. ಇಪಿಎಫ್ ಚಂದಾದಾರರು ಒಂದಕ್ಕಿಂತ ಹೆಚ್ಚು ಸಂಸ್ಥೆಯಲ್ಲಿ ಸಾಯುವ ಮುನ್ನ ಕೆಲಸ ಮಾಡಿದ್ದಲ್ಲಿ ಆಗ ಕೂಡ ಹಿಂದಿನ ಸಂಸ್ಥೆಯದೂ ಸೇರಿ ಹನ್ನೆರಡು ತಿಂಗಳ ಸರಾಸರಿ ವೇತನವನ್ನು ಗಣನೆಗೆ ತೆಗೆದುಕೊಳ್ಳಬೇಕು.