ಬ್ಯಾಂಕ್‌ ಗ್ರಾಹಕರಿಗೆ ಗುಡ್‌ನ್ಯೂಸ್: 2020ರಿಂದ ಇರೋದಿಲ್ಲ NEFT ಶುಲ್ಕ

ಬ್ಯಾಂಕ್ ಗ್ರಾಹಕರಿಗೆ ಆರ್‌ಬಿಐ ಸಿಹಿಸುದ್ದಿ ನೀಡಿದೆ. 2020 ಜನವರಿಯಿಂದ ಉಳಿತಾಯ ಖಾತೆ ಹೊಂದಿರುವ ಗ್ರಾಹಕರಿಗೆ ಯಾವುದೇ ಬ್ಯಾಂಕ್‌ಗಳು NEFT(ರಾಷ್ಟ್ರೀಯ ಎಲೆಕ್ಟ್ರಾನಿಕ್ ನಿಧಿ ವರ್ಗಾವಣೆ) ಶುಲ್ಕ ವಿಧಿಸುವಂತಿಲ್ಲ ಎಂದು ಆದೇಶ ಹೊರಡಿಸಿದೆ. ಈ ಮೂಲಕ ಡಿಜಿಟಲ್‌ ಪಾವತಿಯನ್ನು ಪ್ರೋತ್ಸಾಹಿಸುವುದು ಕೂಡ ಆರ್‌ಬಿಐನ ಉದ್ದೇಶವಾಗಿದೆ.

NEFT ಎನ್ನುವುದು ಆರ್‌ಬಿಐ ನಿರ್ವಹಿಸುವ ಎಲೆಕ್ಟ್ರಾನಿಕ್ ನಿಧಿ ವರ್ಗಾವಣೆ ಮಾಡುವ ವ್ಯವಸ್ಥೆಯಾಗಿದ್ದು, ಒಂದು ಬ್ಯಾಂಕ್‌ನಿಂದ ಮತ್ತೊಂದು ಬ್ಯಾಂಕ್‌ಗೆ ಹಣವನ್ನು ವರ್ಗಾಯಿಸುತ್ತದೆ. ಡಿಜಿಟಲ್ ವರ್ಗಾವಣೆಯನ್ನು ಪ್ರೋತ್ಸಾಹಿಸುವ ಸಲುವಾಗಿ ಆರ್‌ಬಿಐ ಈ ಶುಲ್ಯವನ್ನು ತೆಗೆದುಹಾಕಲು ನಿರ್ಧರಿಸಲಾಗಿದೆ. ಅಲ್ಲದೆ ಬ್ಯಾಂಕುಗಳಿಗೆ ಒಂದು ವಾರದೊಳಗೆ ಸೂಚನೆಗಳನ್ನು ನೀಡಲಾಗುವುದು ಎಂದು ಕೇಂದ್ರ ಬ್ಯಾಂಕ್‌ ಹೇಳಿಕೆಯಲ್ಲಿ ತಿಳಿಸಿದೆ.

ಪ್ರಸ್ತುತ 2 ರಿಂದ 5 ಲಕ್ಷ ರುಪಾಯಿಗಳ ಆರ್‌ಟಿಜಿಎಸ್ ವಹಿವಾಟಿಗೆ ಗರಿಷ್ಟ 30 ರುಪಾಯಿ. 5 ಲಕ್ಷಕ್ಕಿಂತ ಹೆಚ್ಚಿನ ವಹಿವಾಟುಗಳಿಗೆ ಗರಿಷ್ಟ 55 ರುಪಾಯಿ ವಿಧಿಸಲಾಗುತ್ತಿತ್ತು. ಅಂತೆಯೇ ಬ್ಯಾಂಕ್ ಶಾಖೆಗಳಲ್ಲಿ 10 ಸಾವಿರ ರುಪಾಯಿವರೆಗಿನ NEFT ವಹಿವಾಟುಗಳಿಗೆ 2.50 ರುಪಾಯಿ (+GST) ವಿಧಿಸಲಾಗುತ್ತದೆ. 10 ಸಾವಿರದಿಂದ 1 ಲಕ್ಷವರೆಗಿನ ವಹಿವಾಟಿಗೆ 5 ರುಪಾಯಿ(+GST), 1 ಲಕ್ಷದಿಂದ 2 ಲಕ್ಷದವರೆಗಿನ ವಹಿವಾಟಿಗೆ 15 ರುಪಾಯಿ(+GST), 2 ಲಕ್ಷಕ್ಕಿಂತಲೂ ಹೆಚ್ಚಿನ ಹಣ ವಹಿವಾಟಿಗೆ ಗರಿಷ್ಠ 25 ರುಪಾಯಿ (+GST) ವಿಧಿಸಲಾಗುತ್ತಿತ್ತು.

RTGS ಎಂದರೆ ದೊಡ್ಡ ಮೌಲ್ಯದ ನಿಧಿಯನ್ನ ತಕ್ಷಣವೇ ವರ್ಗಾವಣೆ ಮಾಡುವುದಾಗಿದೆ. ಮತ್ತು NEFT 2 ಲಕ್ಷವರೆಗಿನ ನಿಧಿ ವರ್ಗಾವಣೆಗೆ ಬಳಸಲಾಗುತ್ತದೆ.