ಏಪ್ರಿಲ್ 1 ರಿಂದ ಏರಿಕೆಯಾಗಲಿದೆ ಪೆಟ್ರೋಲ್-ಡೀಸೆಲ್ ದರ
ಕಳೆದ ಒಂದು ತಿಂಗಳಿನಲ್ಲಿ ಬಹುತೇಕ ಇಳಿಕೆಯ ಹಾದಿ ಹಿಡಿದಿದ್ದ ಪೆಟ್ರೋಲ್-ಡೀಸೆಲ್ ದರವು ಏಪ್ರಿಲ್ 1ರಿಂದ ಏರಿಕೆ ಕಾಣಲಿದೆ ಎಂದು ರಾಷ್ಟ್ರೀಯ ತೈಲ ಮಾರಾಟಗಾರ ಇಂಡಿಯನ್ ಆಯಿಲ್ ಕಾರ್ಪೋರೇಷನ್(ಐಒಸಿ) ಶುಕ್ರವಾರ ಹೇಳಿದೆ.
ಏಪ್ರಿಲ್ 1 ವಿಶ್ವದಲ್ಲೇ ಶುದ್ಧ ಪೆಟ್ರೋಲ್- ಡೀಸೆಲ್ ಬಳಕೆ ಭಾರತದಲ್ಲಿ ಆರಂಭದ ದಿನ
ಕಡಿಮೆ ಮಾಲಿನ್ಯವನ್ನು ಹೊರಸೂಸುವ ಬಿಎಸ್-VI ಇಂಧನಗಳನ್ನು ಪೂರೈಸಲು ಈಗಾಗಲೇ ಸಿದ್ಧತೆ ನಡೆಸಲಾಗಿದೆ. ಏಪ್ರಿಲ್ 1 ರಿಂದ ವಿಶ್ವದಲ್ಲೇ ಅತ್ಯಂತ ಶುದ್ಧ ಪೆಟ್ರೋಲ್-ಡೀಸೆಲ್ ಬಳಕೆಯು ಬಾರತದಲ್ಲಿ ಆರಂಭವಾಗಲಿದೆ. ಅತ್ಯಂತ ಕಡಿಮೆ ಪ್ರಮಾಣದಲ್ಲಿ ಸಲ್ಫರ್ ಅಂಶವಿರುವ ಬಿಎಸ್ VI ಪೆಟ್ರೋಲ್- ಡೀಸೆಲ್ ಉತ್ಪಾದನೆಯನ್ನು ಎಲ್ಲ ರಿಫೈನರೀಸ್ ಕಳೆದ ವರ್ಷದ ಕೊನೆಯಿಂದಲೇ ಆರಂಭಿಸಿದೆ.
'' ನಾನು ಜನರಿಗೆ ಭರವಸೆ ನೀಡುತ್ತೇನೆ, ಒಂದೇ ಬಾರಿ ದರ ಏರಿಕೆ ಮಾಡಿ ಗ್ರಾಹಕರಿಗೆ ಹೊರೆ ಹೆಚ್ಚಿಸುವುದಿಲ್ಲ. ಪೆಟ್ರೋಲ್ -ಡೀಸೆಲ್ ದರದಲ್ಲಿ ಕನಿಷ್ಠ ಹೆಚ್ಚಳ ಮಾಡಲಾಗುವುದು '' ಎಂದು ಕಂಪನಿಯ ಅಧ್ಯಕ್ಷ ಸಂಜೀವ್ ಸಿಂಗ್ ಹೇಳಿದ್ದಾರೆ.
ಸರ್ಕಾರಿ ಸ್ವಾಮ್ಯದ ತೈಲ ಸಂಸ್ಕರಣಾ ಘಟಕಗಳನ್ನು ನವೀಕರಣಗೊಳಿಸಲಾಗಿದ್ದು, ಇದಕ್ಕಾಗಿ 35,000 ಕೋಟಿ ರುಪಾಯಿಗಳನ್ನು ಖರ್ಚು ಮಾಡಲಾಗಿದೆ.