ವಿಜಯ ರಾಜೇ ಸಿಂಧಿಯಾ ಜನ್ಮಶತಮಾನೋತ್ಸವ ಸ್ಮರಣೆಗಾಗಿ 100 ರು. ನಾಣ್ಯ ಬಿಡುಗಡೆ

ವಿಜಯ ರಾಜೇ ಸಿಂಧಿಯಾ ಜನ್ಮಶತಮಾನೋತ್ಸವ ಸ್ಮರಣೆಗಾಗಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಸೋಮವಾರದಂದು (ಅಕ್ಟೋಬರ್ 12, 2020) 100 ರುಪಾಯಿ ನಾಣ್ಯವನ್ನು ವರ್ಚುವಲ್ ಕಾರ್ಯಕ್ರಮದಲ್ಲಿ ಬಿಡುಗಡೆ ಮಾಡಿದರು. ಈ ವಿಶೇಷ ನಾಣ್ಯವನ್ನು ಹಣಕಾಸು ಸಚಿವಾಲಯವು ಟಂಕಿಸಿದೆ. ಅಂದ ಹಾಗೆ ವಿಜಯ ರಾಜೇ ಸಿಂಧಿಯಾ ಅವರು ಜನಸಂಘದ ನಾಯಕಿ ಹಾಗೂ ಬಿಜೆಪಿಯ ಸ್ಥಾಪಕ ಸದಸ್ಯರಲ್ಲಿ ಒಬ್ಬರು.

"ವಿಜಯ ರಾಜೇ ಸಿಂಧಿಯಾ ಅವರ ಗೌರವಾರ್ಥ ಪ್ರಧಾನಮಂತ್ರಿ ನರೇಂದ್ರ ಮೋದಿ 100 ರುಪಾಯಿಯ ವಿಶೇಷ ನಾಣ್ಯವನ್ನು ವರ್ಚುವಲ್ ಕಾರ್ಯಕ್ರಮದಲ್ಲಿ ಬಿಡುಗಡೆ ಮಾಡಲಿದ್ದಾರೆ. ವಿಜಯ ರಾಜೇ ಸಿಂಧಿಯಾ ಅವರನ್ನು ಗ್ವಾಲಿಯರ್ ನ ರಾಜಮಾತಾ ಅಂತಲೇ ಖ್ಯಾತಿ ಗಳಿಸಿದ್ದರು," ಎಂದು ಸಂಸ್ಕೃತಿ ಸಚಿವಾಲಯದ ಹೇಳಿಕೆಯಲ್ಲಿ ತಿಳಿಸಲಾಗಿತ್ತು.

ಸಿಂಧಿಯಾ ಅವರ ಕುಟುಂಬ ಸದಸ್ಯರು, ಇತರ ಗಣ್ಯರು ದೇಶದ ನಾನಾ ಭಾಗಗಳಿಂದ ವರ್ಚುವಲ್ ಪ್ಲಾಟ್ ಫಾರ್ಮ್ ನಲ್ಲಿ ಈ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿತ್ತು. ಇನ್ನು ಮೋದಿ ಕೂಡ ತಮ್ಮ ಟ್ವಿಟ್ಟರ್ ನಲ್ಲಿ ಈ ಬಗ್ಗೆ ಪೋಸ್ಟ್ ಮಾಡಿದ್ದರು.

ರಾಜಮಾತಾ ಸಿಂಧಿಯಾ ಅವರ ಜೀವನ ಹಾಗೂ ಕೆಲಸ ಯಾವಾಗಲೂ ಬಡವರಿಗೆ ಭರವಸೆ ತುಂಬುವಂಥದ್ದು. ಅವರ ಜೀವನ ಜನಸೇವೆಗೆ ಮೀಸಲಾಗಿತ್ತು ಎಂದು ಪ್ರಧಾನಮಂತ್ರಿ ಕಾರ್ಯಾಲಯ ಟ್ವೀಟ್ ಮಾಡಿದೆ. ವಿಜಯ ರಾಜೇ ಸಿಂಧಿಯಾ ಅವರು ಜನಿಸಿದ್ದು ಅಕ್ಟೋಬರ್ 12, 1919ರಲ್ಲಿ. ಅವರ ಮಗಳು ವಸುಂಧರಾ ರಾಜೇ ಹಾಗೂ ಮೊಮ್ಮಗ ಜ್ಯೋತಿರಾದಿತ್ಯ ಸಿಂಧಿಯಾ ಬಿಜೆಪಿಯ ಹಿರಿಯ ಮುಖಂಡರಾಗಿದ್ದಾರೆ.