ಯೆಸ್‌ ಬ್ಯಾಂಕ್‌ನಿಂದ 397 ಕೋಟಿ ರುಪಾಯಿ ಹಿಂಪಡೆದ ಪುರಿಯ ಶ್ರೀ ಜಗನ್ನಾಥ ದೇವಾಲಯ

ಆರ್ಥಿಕ ಬಿಕ್ಕಟ್ಟಿನಿಂದ ಆರ್‌ಬಿಐ ನಿರ್ಬಂಧಕ್ಕೊಳಗಾಗಿ ಮುಕ್ತಗೊಂಡಿರುವ ಯೆಸ್ ಬ್ಯಾಂಕ್ ಇಂದಿನಿಂದ ಕಾರ್ಯಾಚರಣೆ ಆರಂಭಿಸಿದೆ. ಗುರುವಾರ ಪುರಿಯ ಶ್ರೀ ಜಗನ್ನಾಥ ದೇವಾಲಯ ಆಡಳಿತ ಮಂಡಳಿಯು 397 ಕೋಟಿಗೂ ಹೆಚ್ಚು ಹಣವನ್ನು ವಾಪಸ್ ಪಡೆದಿದೆ.

ಯೆಸ್ ಬ್ಯಾಂಕ್ ಹಿರಿಯ ಉಪಾಧ್ಯಕ್ಷ ಜಯದೇವ್ ದಾಸ್ ಬರೆದ ಪತ್ರವೊಂದರಲ್ಲಿ, "ನಿಮ್ಮ ಸೂಚನೆಯಂತೆ ನಾವು 397,23,27,636 ( 389 ಕೋಟಿ ಮತ್ತು ಬಡ್ಡಿ 8,23,27,636 ಕೋಟಿ) ರುಪಾಯಿ ಜಗನ್ನಾಥ್ ಟೆಂಪಲ್ ಕಾರ್ಪಸ್ ಫಂಡ್‌ನ ಗೊತ್ತುಪಡಿಸಿದ ಎಸ್‌ಬಿಐ ಖಾತೆಗೆ ರವಾನಿಸಿದ್ದೇವೆ. " ಎಂದು ತಿಳಿಸಿದ್ದಾರೆ.

ಯೆಸ್ ಬ್ಯಾಂಕ್‌ನಲ್ಲಿ ದೇವಾಲಯದ ಇನ್ನೂ 2 ಎಫ್‌ಡಿ ಬಾಕಿ ಉಳಿದಿದ್ದು 156 ಕೋಟಿ ಮೌಲ್ಯದ್ದಾಗಿದೆ. ಇದರ ಮೆಚ್ಯುರಿಟಿ ದಿನಾಂಕವು 30 ಮಾರ್ಚ್‌ 2020ರ ಬಳಿಕ ಗೊತ್ತುಪಡಿಸಿದ ಖಾತೆಗೆ ರವಾನಿಸಲಾಗುವುದು ಎಂದು ಯೆಸ್‌ ಬ್ಯಾಂಕ್ ಅಧಿಕಾರಿ ತಿಳಿಸಿದ್ದಾರೆ.

ಎಸ್‌ಬಿಐ ಯೆಸ್ ಬ್ಯಾಂಕಿನಲ್ಲಿ 7,250 ಕೋಟಿ ರುಪಾಯಿ ಹೂಡಿಕೆಯನ್ನು ಮಾಡುವುದಾಗಿ ಘೋಷಿಸಿದೆ. ತಲಾ 10 ರುಪಾಯಿಗೆ 725 ಕೋಟಿ ಷೇರುಗಳನ್ನು ಸ್ವಾಧೀನಪಡಿಸಿಕೊಳ್ಳುವುದಾಗಿ ಹೇಳಿದೆ.