ರಿಲಯನ್ಸ್ ದಾಖಲೆ: ಷೇರು ಮಾರುಕಟ್ಟೆ ಮೌಲ್ಯ 10,00,000 ಕೋಟಿ

ಮುಕೇಶ್ ಅಂಬಾನಿಯ ರಿಲಯನ್ಸ್ ಇಂಡಸ್ಟ್ರೀಸ್ ಭಾರತೀಯ ಷೇರು ಮಾರುಕಟ್ಟೆಯಲ್ಲಿ ಗುರುವಾರ ಹೊಸ ದಾಖಲೆ ಬರೆದಿದೆ. 10,00,000 ಕೋಟಿ ಮಾರುಕಟ್ಟೆ ಮೌಲ್ಯ ತಲುಪಿದ ಮೊದಲ ಕಂಪೆನಿ ಎಂಬ ದಾಖಲೆ ರಿಲಯನ್ಸ್ ಬರೆದಿದೆ. ಮಂಗಳವಾರದಂದು ರಿಲಯನ್ಸ್ ನ ಮಾರುಕಟ್ಟೆ ಬಂಡವಾಳ ಮೌಲ್ಯವು 9.96 ಲಕ್ಷ ಕೋಟಿ ರುಪಾಯಿ ಇತ್ತು.

ರಿಲಯನ್ಸ್ ಇಂಡಸ್ಟ್ರೀಸ್ ಮಾರುಕಟ್ಟೆ ಬಂಡವಾಳ ಮೌಲ್ಯವು 9 ಲಕ್ಷ ಕೋಟಿಯಿಂದ 10 ಲಕ್ಷ ಕೋಟಿ ತಲುಪಲು 21 ಸೆಷನ್ಸ್ ಆಗಿದೆ. ಇನ್ನು 8 ಲಕ್ಷ ಕೋಟಿಯಿಂದ 9 ಲಕ್ಷ ಕೋಟಿ ತಲುಪುವುದಕ್ಕೆ 20 ಸೆಷನ್ ಆಗಿದೆ. ರಿಲಯನ್ಸ್ ಇಂಡಸ್ಟ್ರಿ 40 ಪರ್ಸೆಂಟ್ ಏರಿಕೆ ದಾಖಲಿಸಿದೆ. ಆ ಕಾರಣಕ್ಕೆ ಹತ್ತು ಲಕ್ಷ ಕೋಟಿ ರುಪಾಯಿ ಮಾರುಕಟ್ಟೆ ಬಂಡವಾಳ ಆಗಿದೆ.

ಇನ್ನು ಮುಕೇಶ್ ಅಂಬಾನಿ ಆಸ್ತಿ ಈ ಕ್ಯಾಲೆಂಡರ್ ವರ್ಷದಲ್ಲಿ $ 15.7 ಬಿಲಿಯನ್ ಏರಿಕೆ ಆಗಿದೆ. ಜಾಗತಿಕ ಮಟ್ಟದ ಶತ ಕೋಟ್ಯಧಿಪತಿಗಳ ಪಟ್ಟಿಯಲ್ಲಿ ಏಳನೇ ಅತಿ ಹೆಚ್ಚು ಗಳಿಕೆ ಕಂಡ ಶ್ರೀಮಂತ ಎನಿಸಿಕೊಂಡಿದ್ದಾರೆ. ಕಾರ್ಲೋಸ್ ಸ್ಲಿಮ್ ಗಿಂತ ಮುಕೇಶ್ ಅಂಬಾನಿ ಮುಂದಿದ್ದು, $ 4 ಬಿಲಿಯನ್ ಹೆಚ್ಚು ಆಸ್ತಿ ಹೊಂದಿದ್ದಾರೆ.

ಬ್ಲೂಮ್ ಬರ್ಗ್ ನ ಶತಕೋಟ್ಯಧಿಪತಿಗಳ ಸೂಚ್ಯಂಕದ ಪ್ರಕಾರ, $ 60 ಬಿಲಿಯನ್ ಆಸ್ತಿ ಹೊಂದುವ ಮೂಲಕ ಈ ಭೂಮಿಯ ಮೇಲಿನ 12ನೇ ಅತಿ ದೊಡ್ಡ ಶ್ರೀಮಂತ ಎನಿಸಿಕೊಂಡಿದ್ದಾರೆ ಮುಕೇಶ್ ಅಂಬಾನಿ. ಭಾರತದ ಷೇರು ಮಾರುಕಟ್ಟೆಯ ಬಂಡವಾಳ ಮೌಲ್ಯದ ವಿಚಾರದಲ್ಲಿ ರಿಲಯನ್ಸ್ ಗೆ ಸಮೀಪ ಸ್ಪರ್ಧಿ ಎಂದರೆ ಟಿಸಿಎಸ್. ಅದರ ಬಂಡವಾಳ ಮೌಲ್ಯ 7.81 ಲಕ್ಷ ಕೋಟಿ.