ರಿಲಯನ್ಸ್ ಜಿಯೋ ಬ್ರಾಡ್ ಬ್ಯಾಂಡ್ ಸೇವೆ ಫ್ರೀ ಫ್ರೀ ಫ್ರೀ...

ಕೊರೊನಾ ವೈರಾಣು ವ್ಯಾಪಿಸುತ್ತಿರುವ ಹಿನ್ನೆಲೆಯಲ್ಲಿ ದೇಶದಾದ್ಯಂತ ಬಹುತೇಕ ಕಂಪೆನಿಗಳು ಸಿಬ್ಬಂದಿಗೆ 'ವರ್ಕ್ ಫ್ರಮ್ ಹೋಮ್'ಗೆ ಅವಕಾಶ ನೀಡಿವೆ. ಈ ಸನ್ನಿವೇಶದಲ್ಲಿ ರಿಲಯನ್ಸ್ ಜಿಯೋದಿಂದ ಉಚಿತ ಬ್ರಾಡ್ ಬ್ಯಾಂಡ್ ಸೇವೆಯನ್ನು ಸೋಮವಾರ ಘೋಷಣೆ ಮಾಡಿದ್ದು, ಇದು ಎಲ್ಲ ಹೊಸ ಗ್ರಾಹಕರಿಗೂ ಅನ್ವಯ ಆಗುತ್ತದೆ. ಇನ್ನು ಈಗಾಗಲೇ ಇರುವ ಗ್ರಾಹಕರಿಗೆ ಡೇಟಾ ಮಿತಿಯನ್ನು ದುಪ್ಪಟ್ಟು ಮಾಡಲಾಗಿದೆ.

ಟಾಪ್ ಅಪ್ ವೋಚರ್ ಗಳಲ್ಲಿ ಕೂಡ ಡೇಟಾ ಮಿತಿಯನ್ನು ದುಪ್ಪಟ್ಟು ಮಾಡಿದ್ದು, ಜಿಯೋ ಹೊರತುಪಡಿಸಿದ ಇತರ ನೆಟ್ ವರ್ಕ್ ಗಳಿಗೆ ಕರೆ ಮಾಡುವ ಉಚಿತ ನಿಮಿಷಗಳ ಅವಧಿಯನ್ನು ಸಹ ಹೆಚ್ಚಿಸಲಾಗಿದೆ. "ಎಲ್ಲರೂ ಮನೆಯಿಂದಲೇ ಕನೆಕ್ಟ್ ಆಗುವುದಕ್ಕೆ ಜಿಯೋದಿಂದ ಬೇಸಿಕ್ ಜಿಯೋ ಫೈಬರ್ ಬ್ರಾಡ್ ಬ್ಯಾಂಡ್ ಕನೆಕ್ಸ್ಟಿವಿಟಿ (10 Mbps) ಒದಗಿಸಲಾಗುತ್ತದೆ.

"ಅದು ಯಾವ ಪ್ರದೇಶದಲ್ಲಿ ಈ ಸಂಪರ್ಕ ಒದಗಿಸಲು ಸಾಧ್ಯವಿದೆಯೋ ಅಲ್ಲಿಗೆ ಅನ್ವಯಿಸುತ್ತದೆ. ಕೊರೊನಾ ಅವಧಿಯಲ್ಲಿ ಯಾವುದೇ ಸೇವಾ ಶುಲ್ಕ ಇರುವುದಿಲ್ಲ" ಎಂದು ಕಂಪೆನಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.

ಜಿಯೋ ಫೈಬರ್ ಬ್ರಾಡ್ ಬ್ಯಾಂಡ್ ಗ್ರಾಹಕರು ಇನ್ ಸ್ಟಲೇಷನ್ ಸಂದರ್ಭದಲ್ಲಿ 2500 ರುಪಾಯಿ ಪಾವತಿಸಬೇಕಾಗುತ್ತದೆ. ಅದರಲ್ಲಿ 1500 ರುಪಾಯಿಯನ್ನು ಕನೆಕ್ಷನ್ ಸರೆಂಡರ್ ಮಾಡುವ ಸಂದರ್ಭದಲ್ಲಿ ಹಿಂತಿರುಗಿಸಲಾಗುತ್ತದೆ" ಎಂದು ತಿಳಿಸಲಾಗಿದೆ. ಜಿಯೋದಿಂದ ಕನಿಷ್ಠ ರೀಫಂಡಬಲ್ ಮೊತ್ತದೊಂದಿಗೆ ರೌಟರ್ ಗಳನ್ನು ಸಹ ಒದಗಿಸಲಾಗುತ್ತಿದೆ.