ರಿಲಯನ್ಸ್ ಜಿಯೋದಿಂದ ಹೊಸ ಹೈಸ್ಪೀಡ್ ಬ್ರಾಡ್ ಬ್ಯಾಂಡ್; ಫುಲ್ ಡೀಟೇಲ್ಸ್

ಇಡೀ ಭಾರತ 21 ದಿನ ಲಾಕ್ ಡೌನ್ ಎಂದು ಘೋಷಿಸಿದ ಮೇಲೆ 'ವರ್ಕ್ ಫ್ರಂ ಹೋಮ್' ಮಾಡುವವರ ಪ್ರಮಾಣದಲ್ಲಿ ವಿಪರೀತ ಹೆಚ್ಚಾಗಿದೆ. ಬಳಕೆದಾರರ ಅಗತ್ಯಗಳಿಗೆ ಸ್ಪಂದಿಸುವ ನಿಟ್ಟಿನಲ್ಲಿ ರಿಲಯನ್ಸ್ ಜಿಯೋದಿಂದ ಹೊಸ ಜಿಯೋಫೈಬರ್ ಸಂಪರ್ಕಗಳಿಗೆ ಹೈ- ಸ್ಪೀಡ್ ಡೇಟಾ ಒದಗಿಸಲಾಗುವುದು ಎಂದು ತಿಳಿದುಬಂದಿದೆ.

ಈ ಬಗ್ಗೆ ಎಕನಾಮಿಕ್ ಟೈಮ್ಸ್ ವರದಿ ಮಾಡಿದೆ. ರಿಲಯನ್ಸ್ ನಿಂದ ಜಿಯೋಫೈಬರ್ ಉಚಿತ ಬೇಸಿಕ್ ಬ್ರಾಡ್ ಬ್ಯಾಂಡ್ ಆರಂಭಿಸಲಿದೆ. ಈ ಯೋಜನೆಯಲ್ಲಿ ಕಂಪೆನಿಯು 10mbps ವೇಗದಲ್ಲಿ 100 GB ಡೇಟಾ ನೀಡುತ್ತದೆ. ಆ ನಂತರ ವೇಗವು 1 mbpsಗೆ ಇಳಿಯುತ್ತದೆ.

30 ದಿನ ಯಾವ ಸೇವಾ ಶುಲ್ಕ ಇಲ್ಲ

ಎಲ್ಲೆಲ್ಲಿ ಸಂಪರ್ಕ ಒದಗಿಸಲು ಸಾಧ್ಯವೋ ಅಲ್ಲಿ ಈ ಯೋಜನೆಯನ್ನು ನೀಡಲಿದೆ. 30 ದಿನಗಳ ಅವಧಿಗೆ ಯಾವ ಸೇವಾ ಶುಲ್ಕವೂ ಇರುವುದಿಲ್ಲ. ಹೋಮ್ ಗೇಟ್ ವೇ ಕೂಡ ಒದಗಿಸುವ ಕಂಪೆನಿಯು ಭದ್ರತಾ ಠೇವಣಿಯಾಗಿ 1500 ರುಪಾಯಿ ಹಾಗೂ ಇನ್ ಸ್ಟಲೇಷನ್ ಶುಲ್ಕವಾಗಿ 1000 ರುಪಾಯಿ ವಿಧಿಸುತ್ತದೆ.

10 mbpsಗಿಂತ ಹೆಚ್ಚು ವೇಗದ ಕನೆಕ್ಷನ್ ಕೂಡ ಒದಗಿಸಲಿದೆ

ಈ ಮೂಲಕ ಧ್ವನಿ ಕರೆ, ವಿಡಿಯೋ ಕರೆ, ಟಿವಿ ಕರೆ, ವಿಡಿಯೋ ಕಾನ್ಫರೆನ್ಸ್ ಮತ್ತಿತರ ಜಿಯೋ ಅಪ್ಲಿಕೇಷನ್ ಗಳನ್ನು ಬಳಸಿಕೊಳ್ಳಬಹುದು. ಇದರ ಜತೆಗೆ ಬಳಕೆದಾರರ ಆಯ್ಕೆಗೆ ತಕ್ಕಂತೆ ವೇಗವನ್ನು ಹೆಚ್ಚಿಸಿಕೊಳ್ಳುವುದಕ್ಕೂ ಅವಕಾಶ ಇದೆ. 10 mbpsಗಿಂತ ಹೆಚ್ಚು ವೇಗದ ಕನೆಕ್ಷನ್ ಕೂಡ ಒದಗಿಸಲಿದೆ. ಆದರೆ ಈ ಹೊಸ ಪ್ಲ್ಯಾನ್ ಹೊಸ ಗ್ರಾಹಕರಿಗೆ ಮಾತ್ರ ಅನ್ವಯಿಸುತ್ತದೆ.

251 ರುಪಾಯಿಯ ಪ್ಲ್ಯಾನ್ ಕೂಡ ಬಿಡುಗಡೆ

ಇದೇ ವೇಳೆ ವರ್ಕ್ ಫ್ರಮ್ ಹೋಮ್ ಮಾಡುವವರ ಸಲುವಾಗಿ 28 ದಿನಗಳ ವ್ಯಾಲಿಡಿಟಿ ಇರುವ, ನಿತ್ಯ 2GB ಡೇಟಾ ದೊರೆಯುವ, 251 ರುಪಾಯಿಯ ಪ್ಲ್ಯಾನ್ ಕೂಡ ಬಿಡುಗಡೆ ಮಾಡಿದೆ. ಆದರೆ ಈ ಪ್ಲ್ಯಾನ್ ನಲ್ಲಿ ಜಿಯೋ ಅಪ್ಲಿಕೇಷನ್, ವಾಯ್ಸ್ ಕಾಲ್ ಅಥವಾ ಮೆಸೇಜ್ ಉಚಿತವಾಗಿ ಕಳಿಸುವ ಅನುಕೂಲಗಳು ಇಲ್ಲ.

ಡೇಟಾ ಬಳಕೆ ವಿಪರೀತ ಹೆಚ್ಚಿದೆ

ಇತರ ಟೆಲಿಕಾಂ ನೆಟ್ ವರ್ಕ್ ಗಳಾದ ಏರ್ ಟೆಲ್, ವೊಡಾಫೋನ್ ಐಡಿಯಾ ಕೂಡ ವಿವಿಧ ಡೇಟಾ ಪ್ಲ್ಯಾನ್ ಗಳನ್ನು ಆರಂಭಿಸಿವೆ. ಇಡೀ ದೇಶದಲ್ಲಿ ಇಂಟರ್ ನೆಟ್ ಡೇಟಾ ಬಳಕೆ ದೊಡ್ಡ ಮಟ್ಟದಲ್ಲಿ ಹೆಚ್ಚಾಗಿದೆ. ಅದರಲ್ಲೂ ಕೊರೊನಾ ವೈರಾಣು ವ್ಯಾಪಿಸುತ್ತಿರುವ ಹಿನ್ನೆಲೆಯಲ್ಲಿ ಲಾಕ್ ಡೌನ್ ಘೋಷಣೆ ಮಾಡಿದ ಮೇಲೆ ಬೇಡಿಕೆ ಮತ್ತೂ ಹೆಚ್ಚಾಗಿದೆ.