ಅಕ್ಟೋಬರ್ ಚಿಲ್ಲರೆ ಹಣದುಬ್ಬರ ದರ 7.61 ಪರ್ಸೆಂಟ್; IIP 0.2 ಪರ್ಸೆಂಟ್ ಬೆಳವಣಿಗೆ

ಚಿಲ್ಲರೆ ಹಣದುಬ್ಬರ ದರವು ಸತತ ಎರಡನೇ ತಿಂಗಳು- ಅಕ್ಟೋಬರ್ ನಲ್ಲಿ 7 ಪರ್ಸೆಂಟ್ ದಾಟಿದೆ. ಸಾಂಖ್ಯಿಕ ಮತ್ತ ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯವು ಗುರುವಾರದಂದು ಭಾರತದ ಚಿಲ್ಲರೆ ಹಣದುಬ್ಬರ ದರದ ದತ್ತಾಂಶವನ್ನು ಬಿಡುಗಡೆ ಮಾಡಿದೆ. ಗ್ರಾಹಕ ದರ ಸೂಚ್ಯಂಕ (ಸಿಪಿಐ) ಆಧಾರದಲ್ಲಿ ರೀಟೇಲ್ ಹಣದುಬ್ಬರ ದರವು ಅಕ್ಟೋಬರ್ ನಲ್ಲಿ 7.61 ಪರ್ಸೆಂಟ್ ಇದ್ದು, ಸೆಪ್ಟೆಂಬರ್ ನಲ್ಲಿ 7.27 ಪರ್ಸೆಂಟ್ ಇತ್ತು.

ಈ ಮಧ್ಯೆ, ದೇಶದ ಕೈಗಾರಿಕೆ ಉತ್ಪಾದನೆಯನ್ನು ತೋರಿಸುವ ಇಂಡೆಕ್ಸ್ ಆಫ್ ಇಂಡಸ್ಟ್ರಿಯಲ್ ಪ್ರೊಡಕ್ಷನ್ (ಐಐಪಿ) ಕಳೆದ ವರ್ಷಕ್ಕೆ ಹೋಲಿಸಿದಲ್ಲಿ 0.2 ಪರ್ಸೆಂಟ್ ಬೆಳವಣಿಗೆ ದಾಖಲಿಸಿದ್ದು, ಸೆಪ್ಟೆಂಬರ್ ತಿಂಗಳಿನಲ್ಲಿ 123.2 ಇದೆ. ಗ್ರಾಹಕ ದರ ಸೂಚ್ಯಂಕವು ಆರ್ ಬಿಐ ಇರಿಸಿಕೊಂಡಿರುವ 6 ಪರ್ಸೆಂಟ್ ಮಿತಿಗಿಂತ ಮೇಲಕ್ಕೆ ಸತತ ಏಳನೇ ತಿಂಗಳು ಹೆಚ್ಚಳ ಕಂಡಿದೆ.

ಸದ್ಯಕ್ಕೆ ಹಣಕಾಸು ನೀತಿಯಲ್ಲಿ ಸರಳ ಮಾಡುವ ಭರವಸೆ ಇಲ್ಲದಂತಾಗಿದೆ. ಆಹಾರ ಬೆಲೆಯಲ್ಲಿ ಹೆಚ್ಚಳ ಮುಂದುವದಿದೆ. ಕಳೆದ ಅಕ್ಟೋಬರ್ ನಲ್ಲಿ ಇದು 11 ಪರ್ಸೆಂಟ್ ದಾಟಿದೆ. ಗ್ರಾಹಕ ಆಹಾರ ದರ ಸೂಚ್ಯಂಕ (ಸಿಎಫ್ ಪಿಐ) ಅಥವಾ ಆಹಾರ ಹಣದುಬ್ಬರ ದರವು ಅಕ್ಟೋಬರ್ ನಲ್ಲಿ 11.07 ಪರ್ಸೆಂಟ್ ಆಗಿದ್ದರೆ, ಸೆಪ್ಟೆಂಬರ್ ನಲ್ಲಿ 10.68 ಪರ್ಸೆಂಟ್ ಇತ್ತು.

ಅಕ್ಟೋಬರ್ ಕೊನೆಗೆ ಈರುಳ್ಳಿ ಬೆಲೆಯು ನೂರು ರುಪಾಯಿ ಇತ್ತು. ಚಳಿಗಾಲದ ಬೆಳೆ ಮಾರುಕಟ್ಟೆಗೆ ಬರುವ ಸಾಧ್ಯತೆ ಹಾಗೂ ಸರ್ಕಾರದ ಕ್ರಮಗಳ ಹಿನ್ನೆಲೆಯಲ್ಲಿ ಈರುಳ್ಳಿ ಬೆಲೆ ಇಳಿಕೆ ಮಾಡಲು ಸಹಾಯ ಆಯಿತು.