ಮಾರ್ಚ್‌ನಲ್ಲಿ ಚಿಲ್ಲರೆ ಹಣದುಬ್ಬರ 5.91 ಪರ್ಸೆಂಟ್‌ಗೆ ಇಳಿಕೆ

ಫೆಬ್ರವರಿ ತಿಂಗಳಿಗೆ ಹೋಲಿಸಿದರೆ ಚಿಲ್ಲರೆ ಹಣದುಬ್ಬರವು ಮಾರ್ಚ್‌ನಲ್ಲಿ 5.91 ಪರ್ಸೆಂಟ್‌ಗೆ ಇಳಿದಿದೆ, ಮುಖ್ಯವಾಗಿ ಆಹಾರ ಬೆಲೆಗಳಲ್ಲಿನ ವ್ಯತ್ಯಾಸದ ಕಾರಣದಿಂದಾಗಿ ಈ ಬದಲಾವಣೆ ಆಗಿದೆ ಎಂದು ಸರ್ಕಾರದ ಅಂಕಿ ಅಂಶಗಳು ತೋರಿಸಿದೆ.

ರಾಷ್ಟ್ರೀಯ ಸಂಖ್ಯಾಶಾಸ್ತ್ರೀಯ ಕಚೇರಿ (ಎನ್‌ಎಸ್‌ಒ) ಬಿಡುಗಡೆ ಮಾಡಿದ ಗ್ರಾಹಕ ಬೆಲೆ ಸೂಚ್ಯಂಕ (ಸಿಪಿಐ) ಆಧಾರಿತ ಚಿಲ್ಲರೆ ಹಣದುಬ್ಬರವು 2020 ರ ಫೆಬ್ರವರಿಯಲ್ಲಿ 6.58 ಪರ್ಸೆಂಟ್ ಮತ್ತು ಜನವರಿಯಲ್ಲಿ 7.59 ಪರ್ಸೆಂಟ್‌ಗೆ ಏರಿಕೆಯಾಗಿತ್ತು. ಇದು ಮೂರು ವರ್ಷಗಳಲ್ಲಿ ಗರಿಷ್ಟ ಮಟ್ಟ ಸಾಧಿಸಿತ್ತು. ಆದರೆ ಚಿಲ್ಲರೆ ಹಣದುಬ್ಬರ ಪ್ರಮಾಣ ಮಾರ್ಚ್‌ನಲ್ಲಿ ಗಣನೀಯ ಇಳಿಕೆ ಸಾಧಿಸಿದ್ದು, ಕಳೆದ ನಾಲ್ಕು ತಿಂಗಳಿನಲ್ಲಿ ಅತ್ಯಂತ ಕಡಿಮೆ ಪ್ರಮಾಣ ದಾಖಲಾಗಿದೆ.

ಫುಡ್ ಬಾಸ್ಕೆಟ್ ನಲ್ಲಿನ ಹಣದುಬ್ಬರವು ಮಾರ್ಚ್ 2020 ರಲ್ಲಿ 8.76 ಪರ್ಸೆಂಟ್‌ರಷ್ಟಿತ್ತು, ಫೆಬ್ರವರಿಯಲ್ಲಿ ಇದು 10.81 ಪರ್ಸೆಂಟ್ ದಾಖಲಾಗಿತ್ತು.

ಹಣದುಬ್ಬರ ಅಂಕಿಅಂಶಗಳ ಏರಿಕೆ ಆಹಾರದ ಬೆಲೆಯಲ್ಲಿ ತೀವ್ರ ಏರಿಕೆಯ ಹಿನ್ನೆಲೆಯಲ್ಲಿ ಹೆಚ್ಚಾಗುತ್ತದೆ. ಹಣದುಬ್ಬರವನ್ನು 4 ಪರ್ಸೆಂಟ್‌ರ ಮಟ್ಟದಲ್ಲಿ ಉಳಿಸಿಕೊಳ್ಳಲು ಸರ್ಕಾರ ಕೇಂದ್ರ ಬ್ಯಾಂಕ್‌ಗೆ ಆದೇಶಿಸಿದೆ.