ಚಿಲ್ಲರೆ ಹಣದುಬ್ಬರ ದರ ಡಿಸೆಂಬರ್ ನಲ್ಲಿ 7.35 ಪರ್ಸೆಂಟ್ ಗೆ ಏರಿಕೆ

ಚಿಲ್ಲರೆ ಹಣದುಬ್ಬರ ದರವು 2019ರ ಡಿಸೆಂಬರ್ ನಲ್ಲಿ 7.35% ಗೆ ಏರಿಕೆಯಾಗಿದೆ. ನವೆಂಬರ್ ತಿಂಗಳಲ್ಲಿ ಈ ಪ್ರಮಾಣ 5.54% ಇತ್ತು ಎಂದು ಸರ್ಕಾರದ ದತ್ತಾಂಶಗಳ ಮೂಲಕ ತಿಳಿದುಬಂದಿದೆ. 2018ರ ಡಿಸೆಂಬರ್ ನಲ್ಲಿ ಚಿಲ್ಲರೆ ಹಣದುಬ್ಬರ ಪ್ರಮಾಣವು 2.11 ಪರ್ಸೆಂಟ್ ಇತ್ತು.

2019ರ ಡಿಸೆಂಬರ್ ನಲ್ಲಿ ತರಕಾರಿಗಳ ಹಣದುಬ್ಬರವು 60.5%ಗೆ ಏರಿಕೆಯಾಗಿದೆ. ನವೆಂಬರ್ ನಲ್ಲಿ ಇದರ ಪ್ರಮಾಣ 36% ಇತ್ತು. ಹಣದುಬ್ಬರವನ್ನು ಗಮನದಲ್ಲಿ ಇಟ್ಟುಕೊಂಡೇ ಡಿಸೆಂಬರ್ ನಲ್ಲಿ ಬಡ್ಡಿ ದರದಲ್ಲಿ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಯಾವುದೇ ಬದಲಾವಣೆ ಮಾಡಿರಲಿಲ್ಲ. ಅದಕ್ಕೂ ಮುನ್ನ ಐದು ಬಾರಿ ಬಡ್ಡಿ ಕಡಿತಗೊಳಿಸಿ, 135 ಬೇಸಿಸ್ ಪಾಯಿಂಟ್ ಇಳಿಕೆ ಮಾಡಿತ್ತು.

ಭಾರತದ ವಾರ್ಷಿಕ ಹಣದುಬ್ಬರ ದರವು 6.20%ಗೆ ಏರಿಕೆ ಆಗಲಿದೆ ಎಂದು ರಾಯಿಟರ್ಸ್ ನಿಂದ ನಡೆಸಿದ ಸಮೀಕ್ಷೆಯಲ್ಲಿ ಐವತ್ತರಷ್ಟು ಆರ್ಥಿಕತಜ್ಞರು ಅಭಿಪ್ರಾಯ ಪಟ್ಟಿದ್ದರು. ಬಡ್ಡಿ ದರದ ಬಗ್ಗೆ ಫೆಬ್ರವರಿ 6ನೇ ತಾರೀಕು ನಡೆಯುವ ಸಭೆಯಲ್ಲಿ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ನಿರ್ಧಾರ ಮಾಡಲಿದೆ.