ಏಷ್ಯಾದಲ್ಲಿ ಕಳೆದ 1 ವರ್ಷದಲ್ಲಿ ತೀರಾ ಕೆಟ್ಟ ಪ್ರದರ್ಶನ ತೋರಿದ ಭಾರತದ ರುಪಾಯಿ

ದೇಶದಲ್ಲಿ ಆರ್ಥಿಕ ಬೆಳವಣಿಗೆಯಲ್ಲಿ ತೀವ್ರ ಕುಸಿತ ಮತ್ತು ಹಣದುಬ್ಬರದ ಏರಿಕೆಯು ಡಾಲರ್ ಎದುರು ರುಪಾಯಿ ವಿನಿಮಯ ದರದ ಮೇಲೆ ಪರಿಣಾಮ ಬೀರುತ್ತಿದೆ. ದಕ್ಷಿಣ ಕೊರಿಯಾದ ವನ್ ಮತ್ತು ಪಾಕಿಸ್ತಾನ ರುಪಾಯಿ ಹೊರತುಪಡಿಸಿ, ಕಳೆದ ಒಂದು ವರ್ಷದಲ್ಲಿ ಭಾರತದ ರುಪಾಯಿ ಏಷ್ಯಾದಲ್ಲಿ ಅತ್ಯಂತ ಕೆಟ್ಟ ಪ್ರದರ್ಶನ ನೀಡಿದ ಕರೆನ್ಸಿಗಳಲ್ಲಿ ಒಂದಾಗಿದೆ.

1 ವರ್ಷದಲ್ಲಿ ಡಾಲರ್ ಎದುರು ರುಪಾಯಿ ಮೌಲ್ಯ 2 ಪರ್ಸೆಂಟ್ ಇಳಿಕೆ

2019 ರ ಜನವರಿಯ ಆರಂಭದಿಂದಲೂ ಯುಎಸ್ ಡಾಲರ್ ಎದುರು ಭಾರತೀಯ ರುಪಾಯಿ ಸುಮಾರು 2 ಪರ್ಸೆಂಟ್ ಕಡಿಮೆಯಾಗಿದೆ. ಇದೇ ಅವಧಿಯಲ್ಲಿ ಅಮೆರಿಕಾ ಡಾಲರ್ ಎದುರು ಥಾಯ್‌ ಬಹ್ಟ್ 6.3 ಪರ್ಸೆಂಟ್, ಮಲೇಷಿಯಾದ ರಿಂಗ್‌ಗಿಟ್‌ನಲ್ಲಿ 1.5 ಪರ್ಸೆಂಟ್ ಮತ್ತು ಫಿಲಿಫೈನ್ಸ್ ಪೆಸೊ 3 ಪರ್ಸೆಂಟ್ ಲಾಭ ಗಳಿಸಿವೆ ಎಂದು ವರದಿಯಾಗಿದೆ.

ಆರ್ಥಿಕ ಬೆಳವಣಿಗೆ ನಿರೀಕ್ಷೆಗಿಂತ ಕುಸಿತವೇ ಪ್ರಮುಖ ಕಾರಣ

ಭಾರತದ ಆರ್ಥಿಕ ಬೆಳವಣಿಗೆಯಲ್ಲಿ ನಿರೀಕ್ಷೆಗಿಂತ ತೀಕ್ಷ್ಣವಾದ ಕುಸಿತವೇ ರುಪಾಯಿಯ ಕಳಪೆ ಸಾಧನೆ ಕಾರಣ ಎಂದು ಆರ್ಥಿಕ ತಜ್ಞರು ಹೇಳಿದ್ದಾರೆ.

"ಕರೆನ್ಸಿಯ ಶಕ್ತಿ ಮತ್ತು ವಿತರಿಸುವ ದೇಶದಲ್ಲಿ ಆರ್ಥಿಕ ಬೆಳವಣಿಗೆಯ ನಡುವೆ ಬಲವಾದ ಸಂಬಂಧವಿದೆ. ಭಾರತವು ಇತರೆ ರಾಷ್ಟ್ರಗಳಿಗೆ ಹೋಲಿಸಿದರೆ ಒಟ್ಟು ದೇಶೀಯ ಉತ್ಪನ್ನದ ಬೆಳವಣಿಗೆಯಲ್ಲಿ ಒಂದು ದೊಡ್ಡ ಕುಸಿತವನ್ನು ಕಂಡಿದೆ. ಇದು ಕರೆನ್ಸಿಯ ಮೇಲೆ ಕೆಳಮಟ್ಟದ ಒತ್ತಡಕ್ಕೆ ಕಾರಣವಾಗುತ್ತದೆ "ಎಂದು ಈಕ್ವಿನೋಮಿಕ್ಸ್ ರಿಸರ್ಚ್ & ಅಡ್ವೈಸರಿ ಸರ್ವಿಸಸ್‌ನ ಸ್ಥಾಪಕ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಜಿ.ಚೋಕ್ಕಲಿಂಗಂ ಹೇಳಿದ್ದಾರೆ.

ಚೋಕ್ಕಲಿಂಗಂ ಅವರ ಪ್ರಕಾರ, ಕ್ಯಾಲೆಂಡರ್ ವರ್ಷದಲ್ಲಿ (ಸಿವೈ) 2019 ರಲ್ಲಿ ಈಕ್ವಿಟಿ ಮತ್ತು ಸಾಲ ಮಾರುಕಟ್ಟೆಯಲ್ಲಿ 20 ಬಿಲಿಯನ್ ಮೌಲ್ಯದ ವಿದೇಶಿ ಬಂಡವಾಳದ ಒಳಹರಿವಿನ ಹೊರತಾಗಿಯೂ ಭಾರತೀಯ ರೂಪಾಯಿ ಮೌಲ್ಯ ಕುಸಿಯಿತು. "ಬಂಡವಾಳದ ಒಳಹರಿವು ರೂಪಾಯಿಗೆ ಹೊಡೆತವನ್ನು ತಂದುಕೊಟ್ಟಿತು. ಉದಾಹರಣೆಗೆ, ಲೆಹ್ಮನ್ ಬಿಕ್ಕಟ್ಟು ಭಾರತದಲ್ಲಿ ಆರ್ಥಿಕ ಬೆಳವಣಿಗೆಯಲ್ಲಿ ತೀವ್ರ ಕುಸಿತಕ್ಕೆ ಕಾರಣವಾಗಿದ್ದರಿಂದ 2008 ರಲ್ಲಿ ರೂಪಾಯಿ ಸುಮಾರು 20 ಪ್ರತಿಶತದಷ್ಟು ಕಡಿಮೆಯಾಗಿದೆ "ಎಂದು ಅವರು ಹೇಳಿದ್ದಾರೆ.

 

ಭಾರತದ ರುಪಾಯಿಗಿಂತ ಬಾಂಗ್ಲಾ ಟಕಾ ಉತ್ತಮ

ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ ಕಾರ್ಪೊರೇಟ್ ತೆರಿಗೆಯನ್ನು ಕಡಿತಗೊಳಿಸಿದ ನಂತರ ಭಾರತಕ್ಕೆ ಬಂಡವಾಳದ ಒಳಹರಿವು ಸುಧಾರಿಸಿತು. ಆದರೆ ಅಂಕಿ-ಅಂಶಗಳ ಪ್ರಕಾರ ಬಾಂಗ್ಲಾದೇಶ ಟಕಾ ಈಗ ಭಾರತದ ರೂಪಾಯಿಗಿಂತ ಉತ್ತಮವಾಗಿದೆ ಎಂದು ಸೂಚಿಸುತ್ತದೆ. ಕಳೆದ 12 ತಿಂಗಳಲ್ಲಿ ಟಕಾ 1.5 ಪರ್ಸೆಂಟ್ರಷ್ಟು ಕುಸಿದಿದ್ದು, ಭಾರತೀಯ ರುಪಾಯಿಯನ್ನು 100 ಬೇಸಿಸ್ ಪಾಯಿಂಟ್‌ಗಳಿಂದ (ಬಿಪಿಎಸ್, ಅಥವಾ ಬಿಪ್ಸ್) ಮೀರಿಸಿದೆ. ಒಂದು ಬೇಸಿಸ್ ಪಾಯಿಂಟ್ ಶೇಕಡಾ ನೂರನೇ ಒಂದು ಭಾಗವಾಗಿದೆ.

ಮಾರುಕಟ್ಟೆಯಲ್ಲಿ ಪಾಕಿಸ್ತಾನ ರುಪಾಯಿಯ ಅತ್ಯಂತ ಕಳಪೆ ಪ್ರದರ್ಶನ

ಪಾಕಿಸ್ತಾನದ ರುಪಾಯಿ ಕೂಡ ಜಾಗತಿಕ ಮಾರುಕಟ್ಟೆಯಲ್ಲಿ ಅತ್ಯಂತ ಕೆಟ್ಟ ಪ್ರದರ್ಶನ ನೀಡಿದ್ದು, ಕಳೆದ 12 ತಿಂಗಳಲ್ಲಿ 9.5 ಪರ್ಸೆಂಟ್ರಷ್ಟು ಕುಸಿದಿದೆ. ಇದು ಪ್ರಸ್ತುತ ಒಂದು ಡಾಲರ್‌ಗೆ 154.4 ರುಪಾಯಿಗೆ ವಹಿವಾಟು ನಡೆಸುತ್ತಿದೆ. ಒಂದು ವರ್ಷದ ಹಿಂದೆ ಒಂದು ಡಾಲರ್‌ಗೆ 139.8 ರುಪಾಯಿ ವಹಿವಾಟು ನಡೆಸುತ್ತಿತ್ತು. ಪಾಕಿಸ್ತಾನದ ಜೊತೆಗೆ ದಕ್ಷಿಣ ಕೊರಿಯಾದ ಕರೆನ್ಸಿ ಕೂಡ ಅತ್ಯಂತ ಕೆಟ್ಟ ಪ್ರದರ್ಶನ ತೋರಿದ್ದು, ಡಾಲರ್ ಎದುರು ಅದರ ಮೌಲ್ಯ 5 ಪರ್ಸೆಂಟ್ರಷ್ಟು ನಷ್ಟವಾಗಿದೆ. ಇದು ಪ್ರಸ್ತುತ ಡಾಲರ್‌ಗೆ 1,167.1 ಕ್ಕೆ ವಹಿವಾಟು ನಡೆಸುತ್ತಿದೆ.

2019-20ರ ಹಣಕಾಸು ವರ್ಷದಲ್ಲಿ ಸ್ಥಿರ ಬೆಲೆ ಏರಿಕೆ ನಿರೀಕ್ಷೆ

ಭಾರತದ ಆರ್ಥಿಕತೆಯು 2019-20ರ ಹಣಕಾಸು ವರ್ಷದಲ್ಲಿ ಸ್ಥಿರ ಬೆಲೆಯಲ್ಲಿ 5 ಪರ್ಸೆಂಟ್‌ರಷ್ಟು ಏರಿಕೆಯಾಗುವ ನಿರೀಕ್ಷೆಯಿದೆ. ಆದರೆ ಇದು ಒಂದು ವರ್ಷದ ಹಿಂದೆ 6.8 ಪರ್ಸೆಂಟ್ರ ಬೆಳವಣಿಗೆಯಿಂದ 183 ಬಿಪ್‌ಗಳು ಕಡಿಮೆಯಾಗಿದೆ. ಅಂತರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) ಇತ್ತೀಚಿನ ವಿಶ್ವ ಆರ್ಥಿಕ ಔಟ್‌ಲುಕ್ ಡೇಟಾಬೇಸ್ ಪ್ರಕಾರ, ಯಾವುದೇ ಪ್ರಮುಖ ಉದಯೋನ್ಮುಖ ಆರ್ಥಿಕತೆಯನ್ನು ಹೊಂದಿರುವ ರಾಷ್ಟ್ರಗಳಲ್ಲಿ, ಆರ್ಥಿಕ ಬೆಳವಣಿಗೆಯ ತೀವ್ರ ಕುಸಿತಗಳಲ್ಲಿ ಇದು ಒಂದಾಗಿದೆ.

ಏಷ್ಯಾದ ಆರ್ಥಿಕತೆಗಳಲ್ಲಿ, ಪಾಕಿಸ್ತಾನ ಮಾತ್ರ 2019 ರಲ್ಲಿ ಆರ್ಥಿಕ ಬೆಳವಣಿಗೆಯಲ್ಲಿ ತೀವ್ರ ಕುಸಿತ ಕಾಣುವ ನಿರೀಕ್ಷೆಯಿದೆ. ಐಎಂಎಫ್ ಪ್ರಕಾರ, ಪಾಕಿಸ್ತಾನದ ಆರ್ಥಿಕತೆಯು 2019 ರಲ್ಲಿ 3.3 ಪರ್ಸೆಂಟ್ರಷ್ಟು ಏರಿಕೆಯಾಗುವ ನಿರೀಕ್ಷೆಯಿದೆ.