ಗುಡ್‌ನ್ಯೂಸ್: ಗೃಹ ಸಾಲ ಬಡ್ಡಿ ದರ ಇಳಿಕೆ ಮಾಡಿದ ಎಸ್‌ಬಿಐ

ಕೋವಿಡ್-19 ಸಾಂಕ್ರಾಮಿಕ ರೋಗದ ಹೆಚ್ಚಳವು ದೇಶದಲ್ಲಿ ನಾನಾ ಸಮಸ್ಯೆಗಳಿಗೆ ಕಾರಣವಾಗಿದೆ. ಇದರ ನಡುವೆ ಮನೆ ಕಟ್ಟುವವರಿಗೆ ಗುಡ್‌ನ್ಯೂಸ್ ಇಲ್ಲಿದೆ. ದೇಶದ ಅತಿದೊಡ್ಡ ಸರ್ಕಾರಿ ಬ್ಯಾಂಕ್‌ ಸ್ಟೇಟ್‌ ಬ್ಯಾಂಕ್ ಆಫ್ ಇಂಡಿಯಾ (ಎಸ್‌ಬಿಐ) ಗೃಹ ಸಾಲ ಬಡ್ಡಿ ದರ ಇಳಿಕೆ ಮಾಡಿದೆ.

ಶನಿವಾರ ಹೊಸ ಬಡ್ಡಿದರಗಳನ್ನು ಪ್ರಕಟಿಸಿದ ಎಸ್‌ಬಿಐ, ಗೃಹ ಸಾಲ ಬಡ್ಡಿದರವನ್ನು ಶೇಕಡಾ 6.70ಕ್ಕೆ ಇಳಿಸಿದೆ. ಅಲ್ಲದೆ ಮಹಿಳಾ ಸಾಲಗಾರರಿಗೆ 5 ಬಿಪಿಎಸ್‌ ವಿಶೇಷ ರಿಯಾಯಿತಿ ಸಿಗಲಿದೆ ಎಂದು ಬ್ಯಾಂಕ್‌ ಪ್ರಕಟಣೆಯಲ್ಲಿ ತಿಳಿಸಿದೆ.

ಬಡ್ಡಿದರ ಕಡಿತದೊಂದಿಗೆ, ಎಸ್‌ಬಿಐ ಗೃಹ ಸಾಲ ಬಡ್ಡಿದರಗಳು ಈಗ 30 ಲಕ್ಷ ರೂ.ವರೆಗಿನ ಸಾಲಗಳಿಗೆ ಶೇಕಡಾ 6.70ರಷ್ಟು, 30 ಲಕ್ಷ ರೂ.ಗಿಂತ ಹೆಚ್ಚಿನ ಸಾಲಗಳಿಗೆ ಮತ್ತು 75 ಲಕ್ಷದವರೆಗಿನ ಸಾಲಗಳಿಗೆ ಶೇಕಡಾ 6.95ರಿಂದ ಪ್ರಾರಂಭವಾಗುತ್ತವೆ. ಇನ್ನು 75 ಲಕ್ಷ ರೂ.ಗಿಂತ ಹೆಚ್ಚಿನ ದೊಡ್ಡ ಸಾಲಗಳಿಗೆ ಶೇಕಡಾ 7.05 ರಷ್ಟು ಬಡ್ಡಿದರ ಎಂದು ಬ್ಯಾಂಕ್ ತಿಳಿಸಿದೆ.

5 ಬಿಪಿಎಸ್ ಹೆಚ್ಚುವರಿ ಬಡ್ಡಿ ರಿಯಾಯಿತಿ ಪಡೆಯಲು ಗ್ರಾಹಕರು ತಮ್ಮ ಮನೆಯಿಂದಲೇ ಸುಲಭವಾಗಿ ಯೋನೊ ಆ್ಯಪ್ ಮೂಲಕ ಸಾಲಕ್ಕೆ ಅರ್ಜಿ ಸಲ್ಲಿಸಬಹುದು ಎಂದು ಎಸ್‌ಬಿಐ ತಿಳಿಸಿದೆ.

ಈ ಮೊದಲು ಎಸ್‌ಬಿಐ ಗೃಹ ಸಾಲ ಬಡ್ಡಿ ದರವನ್ನು ಮಾರ್ಚ್ 31 ರವರೆಗೆ ಶೇಕಡಾ 6.7ಕ್ಕೆ ಇಳಿಸಿತ್ತು. ನಂತರದಲ್ಲಿ ಏಪ್ರಿಲ್ 1 ರಿಂದ ದರಗಳನ್ನು 6.95ಕ್ಕೆ ಏರಿಸಲಾಗಿತ್ತು. ಇದೀಗ ಮತ್ತೆ ಗೃಹ ಸಾಲ ಬಡ್ಡಿದರ ಇಳಿಕೆಗೊಂಡಿದೆ.