ಸ್ವಚ್ಛ ಭಾರತ್ ಅಭಿಯಾನಕ್ಕೆ ಕೋಟಿ ಕೋಟಿ ಕೊಟ್ಟ ಆ ಮೂರು ಸಂಸ್ಥೆ ಯಾವುದು?

ಪ್ರಧಾನಿ ನರೇಂದ್ರ ಮೋದಿ ಅವರ ಮಹತ್ವಾಕಾಂಕ್ಷಿ ಸ್ವಚ್ಛ ಭಾರತ್ ಅಭಿಯಾನಕ್ಕೆ ಕಳೆದ ಐದು ವರ್ಷದಲ್ಲಿ 774.4 ಕೋಟಿ ರುಪಾಯಿ ಕೊಡುಗೆ ಹರಿದುಬಂದಿದೆ. ಅದರಲ್ಲಿ ಒಂದು ಸಾರ್ವಜನಿಕ ಸ್ವಾಮ್ಯದ ಕಂಪೆನಿ ಹಾಗೂ ಎರಡು ಖಾಸಗಿ ಮೂಲಗಳು ದೊಡ್ಡ ಮಟ್ಟದ ಕೊಡುಗೆ ನೀಡಿವೆ. ಈ ಬಗ್ಗೆ ಮಾಹಿತಿ ಹಕ್ಕು ಕಾಯ್ದೆ ಅಡಿಯಲ್ಲಿ ಕೇಳಲಾದ ಪ್ರಶ್ನೆಗೆ ದೊರೆತ ಉತ್ತರ ಆಶ್ಚರ್ಯಕರವಾಗಿದೆ.

ಕೇರಳ ಮೂಲದ ದತ್ತಿ ಸಂಸ್ಥೆ ಮಾತಾ ಅಮೃತಾನಂದಮಯಿ ಮಠವು 100 ಕೋಟಿ ರುಪಾಯಿ ದೇಣಿಗೆಯನ್ನು ಸ್ವಚ್ಛ ಭಾರತ್ ಅಭಿಯಾನಕ್ಕೆ ನೀಡಿದ್ದರೆ, ಲಾರ್ಸನ್ ಅಂಡ್ ಟೂಬ್ರೋದಿಂದ 60 ಕೋಟಿ ರುಪಾಯಿ ನೀಡಲಾಗಿದೆ. ಇನ್ನು ಸರ್ಕಾರಿ ಸ್ವಾಮ್ಯದ ಪವರ್ ಫೈನಾನ್ಸ್ ಕಾರ್ಪೊರೇಷನ್ 49.24 ಕೋಟಿ ರುಪಾಯಿ ದೇಣಿಗೆ ನೀಡಿದೆ. ಅಂದಹಾಗೆ ಇಂಡಿಯನ್ ಎಕ್ಸ್ ಪ್ರೆಸ್ ಈ ಬಗ್ಗೆ ಆರ್ ಟಿಐನಲ್ಲಿ ಪ್ರಶ್ನೆ ಕೇಳಿತ್ತು.

ಆದರೆ, ಅತ್ಯಂತ ಹೆಚ್ಚು ಶ್ರಮಪಟ್ಟ ಹೊರತಾಗಿಯೂ ವಿದೇಶದಿಂದ ದೊಡ್ಡ ಮೊತ್ತದ ಹಣ ಈ ಅಭಿಯಾನಕ್ಕೆ ಬಂದಿಲ್ಲ. ಸ್ವಚ್ಛ ಭಾರತ್ ಅಭಿಯಾನಕ್ಕೆ ಕಳೆದ ಐದು ವರ್ಷಗಳಲ್ಲಿ ವಿದೇಶದಿಂದ ಬಂದ ಮೊತ್ತ 13 ಲಕ್ಷ ರುಪಾಯಿಗಿಂತ ಸ್ವಲ್ಪ ಹೆಚ್ಚು ಅಷ್ಟೇ. ಇನ್ನು ಭಾರತವನ್ನು ಬಯಲು ಶೌಚಮುಕ್ತ ದೇಶವಾಗಿ ಮಾಡುವ ಪ್ರಧಾನಿ ನರೇಂದ್ರ ಮೋದಿ ಅವರ ಕನಸಿಗೆ ದೊಡ್ಡ ಮಟ್ಟದಲ್ಲಿ ಪ್ರತಿಫಲ ಸಿಕ್ಕಿದೆ.