ಚೀನಾಗೆ ಶಾಕ್ : ಬೈಟ್‌ಡ್ಯಾನ್ಸ್‌ ಬ್ಯಾಂಕ್ ಅಕೌಂಟ್ ಮೇಲೆ ಭಾರತ ನಿರ್ಬಂಧ

ಚೀನಾದ ಕಿರು ವೀಡಿಯೋ ಅಪ್ಲಿಕೇಶನ್ ಟಿಕ್‌ಟಾಕ್ ಅನ್ನು ನಿಷೇಧಿಸಿದ ನಂತರ ಭಾರತ ಸರ್ಕಾರವು ಮೂಲ ಕಂಪನಿ ಬೈಟ್‌ಡಾನ್ಸ್‌ನ ಬ್ಯಾಂಕ್ ಖಾತೆಯನ್ನು ಸ್ಥಗಿತಗೊಳಿಸಿದೆ. ತೆರಿಗೆ ವಂಚನೆ ಆರೋಪದ ಮೇಲೆ ಸರ್ಕಾರ ಈ ಕ್ರಮ ಕೈಗೊಂಡಿದೆ. ಈ ಕಾರಣದಿಂದಾಗಿ, ಭಾರತ ಸರ್ಕಾರವು ಭಾರತದಲ್ಲಿ ಬೈಟ್‌ಡ್ಯಾನ್ಸ್‌ನ ಬ್ಯಾಂಕ್ ಖಾತೆಗಳನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಿದೆ.

ತನ್ನ ಕಾರ್ಯಾಚರಣೆ ಮೇಲೆ ಪರಿಣಾಮ ಬೀರಬಹುದು ಎಂಬ ಕಾರಣಕ್ಕಾಗಿ ಈ ಕ್ರಮವನ್ನು ವಿರೋಧಿಸಿ ಬೈಟ್‌ಡ್ಯಾನ್ಸ್‌ ಮುಂಬೈ ಹೈಕೋರ್ಟ್‌ ಮೊರೆ ಹೋಗಿದೆ.

ಕಳೆದ ವರ್ಷ ಚೀನಾದೊಂದಿಗಿನ ಗಡಿ ಸಂಘರ್ಷದ ಬಳಿಕ ಬೈಟ್‌ಡ್ಯಾನ್ಸ್ ಒಡೆತನದ ಟಿಕ್‌ಟಾಕ್ ಅನ್ನು ಭಾರತದಲ್ಲಿ ನಿಷೇಧಿಸಲಾಯಿತು. ಇದಾದ ಬಳಿಕ ಕಂಪನಿಯು ಉದ್ಯೋಗಿಗಳನ್ನು ಕಡಿತಗೊಳಿಸಿತ್ತು. ಇನ್ನೂ ಕಂಪನಿಯಲ್ಲಿ ಸುಮಾರು 1,300 ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದಾರೆ.

ಬೈಟ್‌ಡ್ಯಾನ್ಸ್ ಕಂಪನಿಯು ಆನ್‌ಲೈನ್ ಜಾಹಿರಾತಿಗೆ ಸಂಬಂಧಿಸಿದಂತೆ ವ್ಯವಹಾರದಲ್ಲಿ ಮಾರ್ಚ್ 2021ರಲ್ಲಿ ತೆರಿಗೆ ವಂಚನೆ ಮಾಡಿರುವುದನ್ನು ಅಧಿಕಾರಿಗಳು ಪತ್ತೆ ಮಾಡಿದ್ದಾರೆ. ಹೀಗಾಗಿ ಬೈಟ್‌ಡ್ಯಾನ್ಸ್‌ ಭಾರತದಲ್ಲಿ ಸಿಟಿಬ್ಯಾಂಕ್ ಮತ್ತು ಎಚ್‌ಎಸ್‌ಬಿಸಿ ಬ್ಯಾಂಕ್‌ಗಳಲ್ಲಿ ಹೊಂದಿರುವ ಖಾತೆಗಳನ್ನು ಮಾರ್ಚ್ ಮಧ್ಯಭಾಗದಿಂದ ನಿರ್ಬಂಧಿಸಲಾಗಿದೆ.

ಎರಡು ಬ್ಯಾಂಕ್‌ ಖಾತೆಗಳು ಅಷ್ಟೇ ಅಲ್ಲದೆ ತೆರಿಗೆ ಗುರುತಿನ ಸಂಖ್ಯೆ ಹೊಂದಿರುವ ಇತರ ಬ್ಯಾಂಕ್ ಖಾತೆಗಳಿಂದಲೂ ಹಣ ವಾಪಸ್ ಪಡೆಯಲು ಕಂಪನಿಗೆ ಅವಕಾಶ ನೀಡಬಾರದು ಎಂದು ಸಿಟಿಬ್ಯಾಂಕ್ ಮತ್ತು ಎಚ್‌ಎಸ್‌ಬಿಸಿ ಬ್ಯಾಂಕ್‌ಗಳಿಗೆ ಅಧಿಕಾರಿಗಳು ನಿರ್ದೇಶನ ನೀಡಿದ್ದಾರೆ ಎನ್ನಲಾಗಿದೆ.