20ರಿಂದ 25 ಪರ್ಸೆಂಟ್ ಸಾಗಣೆ ವೆಚ್ಚ ಹೆಚ್ಚಳಕ್ಕೆ ನೀ ಕೊಡೆ- ನಾ ಬಿಡೆ

ತೈಲ ಬೆಲೆಯಲ್ಲಿ ಭಾರೀ ಏರಿಕೆ, ನಿರ್ವಹಣೆ ವೆಚ್ಚದಲ್ಲಿ ಹೆಚ್ಚಳ ಹಾಗೂ ಸಿಬ್ಬಂದಿ ಕೊರತೆ ಆಗುತ್ತಿರುವ ಹಿನ್ನೆಲೆಯಲ್ಲಿ ಟ್ರಕ್ ಗಳ ಸರಕು- ಸಾಗಣೆ ದರವು 20ರಿಂದ 25 ಪರ್ಸೆಂಟ್ ಹೆಚ್ಚಳ ಆಗಬಹುದು. ಆದರೆ ಬೆಲೆ ಏರಿಕೆ ಬಗ್ಗೆ ಒಂದಕ್ಕೆ ಸಾವಿರ ಬಾರಿ ಆಲೋಚಿಸುವಂತಾಗಿದೆ. ಏಕೆಂದರೆ ಬೇಡಿಕೆ ನಿಧಾನಕ್ಕೆ ಕುದುರುತ್ತಿದೆ. ಇಂಥ ಸಂದರ್ಭದಲ್ಲಿ ತೈಲ ಬೆಲೆ ಗರಿಷ್ಠ ಮಟ್ಟದಲ್ಲಿದೆ.

ಹಲವು ಒಕ್ಕೂಟಗಳಿಂದ ಈಗಾಗಲೇ ತಮ್ಮ ಕಾಯಂ ಗ್ರಾಹಕರಿಗೆ ದರ ಹೆಚ್ಚಳದ ಬಗ್ಗೆ ಮನವಿ ಕಳುಹಿಸಲಾಗಿದೆ. ಡೀಸೆಲ್ ದರದಲ್ಲಿ ಸಿಕ್ಕಾಪಟ್ಟೆ ಏರಿಕೆ ಆಗಿರುವುದರಿಂದ ನಷ್ಟದಲ್ಲಿ ವ್ಯವಹಾರ ನಡೆಸಬೇಕಾಗಿದೆ ಎನ್ನುತ್ತಾರೆ ಮಾಲೀಕರು. ಲಾಕ್ ಡೌನ್ ನಿಂದ ಇನ್ನೂ ಚೇತರಿಕೆ ಕಾಣುತ್ತಿದ್ದೇವೆ. ಈ ಮಧ್ಯೆ ತೈಲ ದರ, ಕಾರ್ಮಿಕರ ಕೂಲಿ ಕೂಡ ಹೆಚ್ಚಾಗಿ ವ್ಯಾಪಾರಕ್ಕೆ ಹೊಡೆತ ನೀಡುತ್ತಿದೆ ಎಂದು ಹೇಳುತ್ತಾರೆ.

ಲಾರಿಗಳಲ್ಲಿ ಸರಕು- ಸಾಗಣೆ ಆಗುವುದು ಬಹುತೇಕ ಕೃಷಿ ಉತ್ಪನ್ನಗಳು ಮತ್ತು ನಿತ್ಯ ಬಳಕೆ ವಸ್ತುಗಳು. ಸಾಗಣೆಗೆ ಬೇಡಿಕೆ ಹೆಚ್ಚಾಗಿರುವುದರಿಂದ ರಸ್ತೆಗೆ ಇಳಿಯುವ ವಾಹನಗಳ ಪ್ರಮಾಣ ಲಾಕ್ ಡೌನ್ ಅವಧಿಗಿಂತ ಶೇಕಡಾ ಐವತ್ತರಷ್ಟು ಹೆಚ್ಚಾಗಿದೆ. ಟ್ರಕ್ ಗಳ ಬಾಡಿಗೆ ದರ ಹೆಚ್ಚಾದರೂ ಗ್ರಾಹಕರು ಹೆಚ್ಚಿನ ಹಣ ನೀಡಲು ಸಿದ್ಧವಿಲ್ಲ ಎಂಬುದು ಬಹುತೇಕರ ಆಕ್ಷೇಪ.

ಸ್ಥಳೀಯವಾಗಿ ವ್ಯಾಪಾರಕ್ಕೆ ಹೊಡೆತ ಬಿದ್ದಿದೆ. ಅದಕ್ಕೆ ಬೇಡಿಕೆ ಕಡಿಮೆ ಆಗಿರುವುದೇ ಕಾರಣ. ಇಷ್ಟು ದೊಡ್ಡ ಮಟ್ಟದ ನಿರ್ವಹಣಾ ವೆಚ್ಚವನ್ನು ಕೈಯಿಂದ ಹಾಕಿಕೊಂಡು, ನಷ್ಟ ಅನುಭವಿಸುತ್ತಾ ದೀರ್ಘ ಕಾಲ ನಡೆಸುವುದು ಕಷ್ಟ ಎನ್ನುತ್ತಾರೆ ಬಹುತೇಕ ಲಾರಿ ಮಾಲೀಕರು.