Republic Day E-Pass: ಬೆಂಗಳೂರಿನ ಗಣರಾಜ್ಯೋತ್ಸವ ದಿನಾಚರಣೆ ನೀವೂ ನೋಡ್ಬೇಕಾ? ಹಾಗಿದ್ರೆ ಈ ಪಾಸ್‌ ಪಡೆಯಿರಿ

77ನೇ ಗಣರಾಜ್ಯೋತ್ಸವ ಆಚರಣೆಗೆ (Republic Day) ಇಡೀ ದೇಶವೇ ಸಜ್ಜಾಗಿ ನಿಂತಿದೆ. ದೆಹಲಿಯಂತೆಯೇ ಬೆಂಗಳೂರಿನಲ್ಲೂ (Bengaluru) ಕರ್ನಾಟಕ ರಾಜ್ಯ ಮಟ್ಟದಲ್ಲಿ ಗಣರಾಜ್ಯೋತ್ಸವ ಕಾರ್ಯಕ್ರಮವನ್ನು ಆಚರಿಸಲಾಗುತ್ತದೆ. ಪ್ರತೀ ವರ್ಷ ಬೆಂಗಳೂರಿನಲ್ಲೂ ಗಣರಾಜ್ಯೋತ್ಸವ ಪರೇಡ್‌ ನಡೆಸಲಾಗುತ್ತದೆ, ಈ ಪರೇಡ್‌ಗೆ ಮುಖ್ಯಮಂತ್ರಿ, ರಾಜ್ಯಪಾಲರು, ರಾಜ್ಯದ ಗೌರವಾನ್ವಿತ ಅತಿಥಿಗಳು, ಇತರ ಗಣ್ಯರು ಭಾಗವಹಿಸುತ್ತಾರೆ. ಇನ್ನು ಈ ಪರೇಡ್‌ ವೀಕ್ಷಿಸಲು ಸಾರ್ವಜನಿಕರೂ ಹೋಗುವ ಅವಕಾಶ ನೀಡಲಾಗುತ್ತದೆ. ಆದರೆ ಅದಕ್ಕಾಗಿ ಇ-ಪಾಸ್‌ ಸೌಲಭ್ಯವನ್ನು ಸಹ ನೀಡಲಾಗುತ್ತದೆ.

ಇದೀಗ ಬೆಂಗಳೂರಿನ ಫೀಲ್ಡ್‌ ಮಾರ್ಷಲ್‌ ಮಾಣೆಕ್‌ ಷಾ ಪರೇಡ್‌ ಗ್ರೌಂಡ್‌ನಲ್ಲಿ ಜನವರಿ 26 ರಂದು ನಡೆಯುವ 77ನೇ ಗಣರಾಜ್ಯೋತ್ಸವ ದಿನಾಚರಣೆ ಕಾರ್ಯಕ್ರಮ ವೀಕ್ಷಿಸಲು ಸಾರ್ವಜನಿಕರಿಗೆ ಇ-ಪಾಸ್‌ ವ್ಯವಸ್ಥೆ ನೀಡಲಾಗಿದೆ. ಹಾಗಿದ್ರೆ ಇ-ಪಾಸ್‌ ಪಡೆಯುವುದು ಹೇಗೆ? ಎಲ್ಲಿ ಅರ್ಜಿ ಸಲ್ಲಿಸಬೇಕು? ಈ ಕುರಿತು ಸಂಪೂರ್ಣ ಮಾಹಿತಿ ಈ ಲೇಖನದಲ್ಲಿದೆ ಓದಿ.

ಏನಿದು ಇ-ಪಾಸ್‌ ವ್ಯವಸ್ಥೆ?
2026ರಲ್ಲಿ 77ನೇ ವರ್ಷದ ಗಣರಾಜ್ಯೋತ್ಸವದ ಸಂದರ್ಭದಲ್ಲಿ ಬೆಂಗಳೂರಿನ ಫೀಲ್ಡ್‌ ಮಾರ್ಷಲ್‌ ಮಾಣೆಕ್‌ ಷಾ ಪರೇಡ್‌ ಗ್ರೌಂಡ್‌ನಲ್ಲಿ ನಡೆಯುವ ಕಾರ್ಯಕ್ರಮಕ್ಕೆ ಸಾರ್ವಜಇಕ ಪ್ರವೇಶಕ್ಕಾಗಿ ನೀಡಲಾಗುವ ಪಾಸ್‌ ವ್ಯವಸ್ಥೆ. ಇದರಿಂದ ಕಾರ್ಯಕ್ರಮದ ಸುರಕ್ಷತೆ ಮತ್ತು ವ್ಯವಸ್ಥೆಯನ್ನು ಉತ್ತಮಗೊಳಿಸಬಹುದಾಗಿದೆ. ಇದೇ ಉದ್ದೇಶದಿಂದ ಇ-ಪಾಸ್‌ ವ್ಯವಸ್ಥೆಯನ್ನು ಸಾರ್ವಜನಿಕರಿಗಾಗಿ ತರಲಾಗಿದೆ. ಇನ್ನು ಜನವರಿ 14 ರಿಂದ ಜನವರಿ 24 ರವರೆಗೆ (ಸಂಜೆ 5 ಗಂಟೆಯವರೆಗೆ) ಇ-ಪಾಸ್‌ಗಾಗಿ ಅರ್ಜಿ ಸಲ್ಲಿಸಬಹುದು. ಪ್ರಸ್ತುತ ಅರ್ಜಿ ಪ್ರಕ್ರಿಯೆ ನಡೆಯುತ್ತಿದ್ದು, ನಾಳೆ (ಜ.24) ಕೊನೆಯ ದಿನವಾಗಿದೆ.

ಬೆಂಗಳೂರು ಗಣರಾಜ್ಯೋತ್ಸವ ದಿನಾಚರಣೆಯ ವಿವರ:

• ದಿನಾಂಕ ಮತ್ತು ಸಮಯ: ಜನವರಿ 26, 2026 (ಸೋಮವಾರ), ಬೆಳಿಗ್ಗೆ 9 ಗಂಟೆಯಿಂದ ಆರಂಭವಾಗಲಿದೆ. ಕಾರ್ಯಕ್ರಮದಲ್ಲಿ ಪರೇಡ್‌, ಸಾಂಸ್ಕೃತಿಕ ಕಾರ್ಯಕ್ರಮಗಳು, ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಭಾಷಣೆ ಮತ್ತು ಇತರ ಆಚರಣೆಗಳು ನಡೆಯಲಿದೆ.
• ಸ್ಥಳ: ಫೀಲ್ಡ್‌ ಮಾರ್ಷಲ್‌ ಮಾನೇಕ್‌ಷಾ ಪರೇಡ್‌ ಗ್ರೌಂಡ್‌, ಬೆಂಗಳೂರು.
• ಪ್ರವೇಶ ಗೇಟ್‌: ಇನ್ನು ಇ-ಪಾಸ್‌ ಹೊಂರಿರುವವರಿಗೆ ಗೇಟ್‌ ನಂಬರ್‌ 5 ರ ಮೂಲಕ ಮಾತ್ರ ಪ್ರವೇಶವಿರುತ್ತದೆ. ಪ್ರಿಂಟೆಡ್‌ ಅಥವಾ ಡಿಜಿಟಲ್‌ ಪಾಸ್‌ ತೋರಿಸಬಹುದು.
• ನಿಯಮ ಕಡ್ಡಾಯ: ಪ್ರವೇಶ ಉಚಿತ. ಇಪಾಸ್‌ ಇದ್ದರೆ ಮಾತ್ರ ಅವಕಾಶ. ಸಾರ್ವಜನಿಕರಿಗೆ ಸೀಮಿತ ಸೀಟುಗಳು ಲಭ್ಯ.

ಆನ್‌ಲೈನ್‌ನಲ್ಲಿ ಇ-ಪಾಸ್‌ ಹೀಗೆ ಪಡೆಯಿರಿ:

• ಸೇವಾ ಸಿಂಧು ಪೋರ್ಟಲ್‌ ಮೂಲಕ ಅರ್ಜಿ ಸಲ್ಲಿಸಬಹುದು. ಅದಕ್ಕಾಗಿ ಕೆಲವು ಟ್ರಿಕ್ಸ್‌ ಫಾಲೋ ಮಾಡಬೇಕು.
• ವೆಬ್‌ಸೈಟ್‌ www.sevasindhu.karnataka.gov.in ಗೆ ಭೇಟಿ ನೀಡಿ ಅಥವಾ ಸೇವಾ ಸಿಂಧು ಆಪ್‌ ಡೌನ್‌ಲೋಡ್‌ ಮಾಡಬಹುದು
• ರಿಜಿಸ್ಟರ್‌ ಮಾಡಿ: ಮೊದಲ ಬಾರಿಗೆ ಸೇವಾ ಸಿಂಧು ಬಳಸುವುದಾದ್ರೆ, ಮೊಬೈಲ್‌ ನಂಬರ್‌ ಅಥವಾ ಆಧಾರ್‌ ಕಾರ್ಡ್‌ ಬಳಸಿ ರಿಜಿಸ್ಟರ್‌ ಮಾಡಿಕೊಳ್ಳಿ.
• ಸರ್ವಿಸ್‌ ಸರ್ಚ್‌ ಮಾಡಿ: ಸರ್ಚ್‌ ಬಾರ್‌ನಲ್ಲಿ "Republic Day E-Pass" ಎಂದು ಸರ್ಚ್‌ ಮಾಡಿ.
• ಅಲ್ಲಿ ನೀವು ಅರ್ಜಿ ಫಾರ್ಮ್‌ ಭರ್ತಿ ಮಾಡಬೇಕು.
• ವೈಯಕ್ತಿಕ ವಿವರ, ಆಧಾರ್‌ ವಿವರ, ಕುಟುಂಬದ ಸದಸ್ಯರ ವಿವರ, ಫೋಟೋ ಅಪ್‌ಲೋಡ್‌ ಮಾಡಬೇಕು.
• ಆ ನಂತರ ಸಬ್‌ಮಿಟ್‌ ಕ್ಲಿಕ್‌ ಮಾಡಬೇಕು.
• ಒಂದೆರಡು ದಿನದ ನಂತರ ಪಾಸ್‌ ಡೌನ್‌ಲೋಡ್‌ ಅವಕಾಶವಿರುತ್ತದೆ.