2020-21ರಲ್ಲಿ ಭಾರತದ ಜಿಡಿಪಿ ದರ 2.8 ಪರ್ಸೆಂಟ್ : ವಿಶ್ವಬ್ಯಾಂಕ್

ಭಾರತದ ಆರ್ಥಿಕ ವೃದ್ಧಿ ದರವು(ಜಿಡಿಪಿ) ಪ್ರಸಕ್ತ ಹಣಕಾಸು ವರ್ಷದಲ್ಲಿ ಅತ್ಯಂತ ಕಳಪೆ ಮಟ್ಟದಲ್ಲಿ ಇರಲಿದೆ ಎಂದು ವಿಶ್ವಬ್ಯಾಂಕ್ ಅಂದಾಜಿಸಿದೆ.

ಕೊರೊನಾವೈರಸ್‌ ಲಾಕ್‌ಡೌನ್‌ನಿಂದಾಗಿ 1991ರ ಉದಾರೀಕರಣ ನಂತರದ ಅತ್ಯಂತ ಕಳಪೆ ಮಟ್ಟದಲ್ಲಿ ಭಾರತದ ಜಿಡಿಪಿ ಇರಲಿದೆ. 2020-21ರ ಹಣಕಾಸು ವರ್ಷದಲ್ಲಿ ಜಿಡಿಪಿ ದರವು 1.5 ಪರ್ಸೆಂಟ್ ರಿಂದ 2.8 ಪರ್ಸೆಂಟ್‌ರ ಮಧ್ಯೆ ಪ್ರಗತಿ ಕಾಣಲಿದೆ ಎಂದು ತನ್ನ 'ದಕ್ಷಿಣ ಏಷ್ಯಾ ಆರ್ಥಿಕತೆ ಕೇಂದ್ರಿತ' ವರದಿಯಲ್ಲಿ ತಿಳಿಸಿದೆ.

ಕಳೆದ ವರ್ಷದ ಅಕ್ಟೋಬರ್‌ನಲ್ಲಿ 2020-21ರ 'ಜಿಡಿಪಿ' 5.4 ಪರ್ಸೆಂಟ್‌ ರಿಂದ 4.1 ಪರ್ಸೆಂಟ್‌ರಷ್ಟು ಇರಲಿದೆ ಎಂದು ಅಂದಾಜಿಸಿತ್ತು. ಆದರೆ ದೇಶದಲ್ಲಿ ಕೊರೊನಾವೈರಸ್ ಪಿಡುಗಿನಿಂದ ಭಾರತದ ಆರ್ಥಿಕತೆಯು ತೀವ್ರವಾಗಿ ಬಾಧಿತವಾಗಿದೆ. ಹೀಗಾಗಿ ಜಿಡಿಪಿ ಅತ್ಯಂತ ಕೆಳಮಟ್ಟದಲ್ಲಿ ಇರಲಿದೆ ಎಂದು ಅಂದಾಜಿಸಲಾಗಿದೆ.

ಹಣಕಾಸು ಕ್ಷೇತ್ರದಲ್ಲಿ ಅದಾಗಲೇ ಮಂದಗತಿಯ ಬೆಳವಣಿಗೆಯಲ್ಲಿ ಸಾಗುತ್ತಿದ್ದ ಭಾರತದ ಆರ್ಥಿಕತೆಯು ಕೊರೊನಾವೈರಸ್‌ನಿಂದಾಗಿ ಬಹು ದೊಡ್ಡ ಆಘಾತ ಅನುಭವಿಸಿದೆ. ಲಾಕ್‌ಡೌನ್‌ನಿಂದಾಗಿ ಆರ್ಥಿಕ ಚಟುವಟಿಕೆ ಮೇಲಿನ ನಿರ್ಬಂಧದಿಂದಾಗಿ ಸರಕುಗಳ ಪೂರೈಕೆ ವ್ಯತ್ಯಯ ಉಂಟಾಗಿದೆ. ಇದರಿಂದ ಸರಕು ಮತ್ತು ಸೇವೆ ಗಮನಾರ್ಹ ಕುಸಿತ ಕಂಡಿದೆ.