Charge To New Users: ಎಕ್ಸ್ ಹೊಸ ಬಳಕೆದಾರರಿಗೆ ಟ್ವೀಟ್‌ಗಳಿಗೆ ವರ್ಷಕ್ಕೆ 1 ಡಾಲರ್ ಶುಲ್ಕ!

ಈ ಹಿಂದೆ ಟ್ವಿಟ್ಟರ್ ಆಗಿದ್ದ ಎಕ್ಸ್‌ ಅನ್ನು ವಿಶ್ವದ ಶ್ರೀಮಂತ ವ್ಯಕ್ತಿ ಎಲಾನ್ ಮಸ್ಕ್ ಖರೀದಿ ಮಾಡಿದ ಬಳಿಕ ಹಲವಾರು ಬದಲಾವಣೆಗಳನ್ನು ಮಾಡಲಾಗಿದೆ. ಈಗ ಎಕ್ಸ್‌ ಸೇವೆಗಾಗಿ ಹೊಸ ಬಳಕೆದಾರರಿಗೆ ಶುಲ್ಕ ವಿಧಿಸುವ ಯೋಜನೆಯನ್ನು ದೃಢಪಡಿಸಿದೆ. ಕಂಪನಿಯು "ನಾಟ್ ಎ ಬಾಟ್" ಎಂಬ ಹೊಸ ಚಂದಾದಾರಿಕೆಯ ಕುರಿತು ವಿವರಗಳನ್ನು ಹಂಚಿಕೊಂಡಿದೆ. ಪ್ರಸ್ತುತ ನ್ಯೂಜಿಲೆಂಡ್ ಮತ್ತು ಫಿಲಿಪೈನ್ಸ್‌ನಲ್ಲಿ ಇದರ ಪ್ರಯೋಗ ಮಾಡಲಾಗುತ್ತಿದೆ.

ಈ ಹೊಸ ನಿಯಮದ ಪ್ರಕಾರವಾಗಿ ಹೊಸ ಬಳಕೆದಾರರು ಪ್ರತಿ ವರ್ಷಕ್ಕೆ ಒಂದು ಡಾಲರ್ ಅನ್ನು ಪಾವತಿ ಮಾಡಬೇಕಾಗುತ್ತದೆ. "ಅಕ್ಟೋಬರ್ 17, 2023 ರಿಂದ ನಾವು ಎರಡು ದೇಶಗಳಲ್ಲಿನ ಹೊಸ ಬಳಕೆದಾರರಿಗೆ ಹೊಸ ಚಂದಾದಾರಿಕೆ ವಿಧಾನವಾದ 'ನಾಟ್ ಎ ಬಾಟ್' ಅನ್ನು ಪರೀಕ್ಷಿಸಲು ಪ್ರಾರಂಭಿಸಿದ್ದೇವೆ," ಎಂದು ಎಕ್ಸ್ ವಿವರಿಸಿದೆ.

"ಸ್ಪ್ಯಾಮ್, ಪ್ಲಾಟ್‌ಫಾರ್ಮ್‌ನಲ್ಲಿ ಮ್ಯಾನಿಪುಲೇಷನ್, ಬಾಟ್ ಚಟುವಟಿಕೆಯನ್ನು ಕಡಿಮೆ ಮಾಡಲು ನಮ್ಮ ಈಗಾಗಲೇ ಮಹತ್ವದ ಪ್ರಯತ್ನಗಳನ್ನು ಹೆಚ್ಚಿಸಲು ಈ ಹೊಸ ಪರೀಕ್ಷೆಯನ್ನು ಅಭಿವೃದ್ಧಿಪಡಿಸಲಾಗಿದೆ. ಇದಕ್ಕೆ ಸಣ್ಣ ಶುಲ್ಕವನ್ನು ನೀಡಲಾಗುತ್ತದೆ. ಎಕ್ಸ್‌ನಲ್ಲಿ ಬಾಟ್‌ಗಳು ಮತ್ತು ಸ್ಪ್ಯಾಮರ್‌ಗಳನ್ನು ಎದುರಿಸಲು ನಮಗೆ ಸಹಾಯ ಮಾಡಲು ಈ ವಿಧಾನ ಆರಂಭಿಸಲಾಗುತ್ತಿದೆ," ಎಂದು ಎಕ್ಸ್ ತಿಳಿಸಿದೆ.

ಯೋಜನೆಯ ಅಡಿಯಲ್ಲಿ, ಹೊಸ ಬಳಕೆದಾರರು ತಮ್ಮ ಫೋನ್ ಸಂಖ್ಯೆಗಳನ್ನು ಪರಿಶೀಲಿಸುವ ಅಗತ್ಯವಿದೆ. ಟ್ವೀಟ್‌ಗಳು, ರಿಟ್ವೀಟ್‌ಗಳು, ಬುಕ್‌ಮಾರ್ಕ್‌ಗಳು ಮತ್ತು ಇಷ್ಟಗಳಂತಹ ಪ್ರಮುಖ ಫೀಚರ್‌ಗಳನ್ನು ಬಳಸಲು ಬಯಸಿದರೆ 1 ಡಾಲರ್ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ. ಪಾವತಿ ಮಾಡದೆ ಎಕ್ಸ್‌ ಅನ್ನು ಓದಲು ಮಾತ್ರ ಇರುವ ಮೋಡ್‌ನಲ್ಲಿ ಮಾತ್ರ ಬಳಕೆ ಮಾಡಲು ಸಾಧ್ಯವಾಗುತ್ತದೆ.

ಸದ್ಯಕ್ಕೆ ಅಸ್ತಿತ್ವದಲ್ಲಿರುವ ಬಳಕೆದಾರರಿಗೆ ಶುಲ್ಕ ಅನ್ವಯಿಸುವುದಿಲ್ಲ ಎಂದು ಕಂಪನಿ ಹೇಳಿದೆ. "ಇದು ಲಾಭದಾಯಕ ಡ್ರೈವ್ ಅಲ್ಲ," ಎಂದು ಎಕ್ಸ್ ಹೇಳಿದೆ. ಆರಂಭಿಕ ಪರೀಕ್ಷೆಯಲ್ಲಿ ಎಕ್ಸ್ ಒಂದು ದಿನ ಎಲ್ಲಾ ಬಳಕೆದಾರರಿಗೆ ಶುಲ್ಕ ವಿಧಿಸಲು ಯೋಜಿಸಿದೆ ಎಂಬ ಊಹಾಪೋಹಗಳಿಗೆ ಇದು ಬಲನೀಡಿದ್ದಂತಿದೆ.

ಕಳೆದ ತಿಂಗಳು ಇಸ್ರೇಲಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಜೊತೆ ಮಾತನಾಡುತ್ತಾ ಎಲಾನ್ ಮಸ್ಕ್ ಬಾಟ್‌ಗಳು ಮತ್ತು ಸ್ಪ್ಯಾಮ್ ಅನ್ನು ಎದುರಿಸುವ ಪ್ರಯತ್ನದ ಭಾಗವಾಗಿ ಕೆಲವು ರೀತಿಯ ಕಡ್ಡಾಯ ಪಾವತಿಯನ್ನು ಪರಿಗಣಿಸುವುದಾಗಿ ಸೂಚಿಸಿದರು. "ಚಂದಾದಾರಿಕೆ ಆಯ್ಕೆಗಳು ಕಾರ್ಯನಿರ್ವಹಿಸುವ ಮುಖ್ಯ ಪರಿಹಾರವೆಂದು ಸಾಬೀತಾಗಿದೆ," ಎಂದು ಎಕ್ಸ್‌ ತನ್ನ ಬೆಂಬಲ ಖಾತೆಯಿಂದ ಪೋಸ್ಟ್‌ನಲ್ಲಿ ಹೇಳಿದೆ.