ಯೆಸ್ ಬ್ಯಾಂಕ್ ಕಪೂರ್, ವಾಧ್ವಾನ್ 2200 ಕೋಟಿ ಆಸ್ತಿ ಜಪ್ತಿ ಮಾಡಿದ ಇ.ಡಿ.

ಯೆಸ್ ಬ್ಯಾಂಕ್ ಅಕ್ರಮ ಹಣ ವರ್ಗಾವಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಯೆಸ್ ಬ್ಯಾಂಕ್ ಸ್ಥಾಪಕ ರಾಣಾ ಕಪೂರ್, ಡಿಎಚ್ ಎಫ್ ಎಲ್ ನ ದಿವಾಳಿಯಾಗಿರುವ ಪ್ರವರ್ತಕರಾದ ಕಪಿಲ್- ದೀರಜ್ ವಾಧ್ವಾನ್ ಗೆ ಸೇರಿದ 2200 ಕೋಟಿ ಆಸ್ತಿಯನ್ನು ಜಾರಿ ನಿರ್ದೇಶನಾಲಯವು (ಇ.ಡಿ.) ಜಪ್ತಿ ಮಾಡಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ರಾಣಾ ಕಪೂರ್ ಗೆ ಸೇರಿದ ಮುಂಬೈ ಪೆದ್ದರ್ ರಸ್ತೆಯ ಬಂಗಲೆ, ಮಲಬಾರ್ ಹಿಲ್ ಪ್ರದೇಶದಲ್ಲಿನ ಆರು ಫ್ಲ್ಯಾಟ್ ಗಳು, ಅಮೃತಾ ಶೆರ್ಗಿಲ್ ಮಾರ್ಗ್ ನಲ್ಲಿನ 48 ಕೋಟಿ ಮೌಲ್ಯದ ಆಸ್ತಿ ಜಪ್ತಿ ಮಾಡಲಾಗಿದೆ. ಇದರ ಜತೆಗೆ ನ್ಯೂಯಾರ್ಕ್ ನಲ್ಲಿನ ಒಂದು, ಲಂಡನ್ ನಲ್ಲಿನ ಎರಡು, ಆಸ್ಟ್ರೇಲಿಯಾದಲ್ಲಿನ ವಾಣಿಜ್ಯ ಆಸ್ತಿ ಹಾಗೂ ಐದು ವಿಲಾಸಿ ಕಾರುಗಳನ್ನು ವಶಕ್ಕೆ ಪಡೆಯಲಾಗಿದೆ.

ಯೆಸ್ ಬ್ಯಾಂಕ್ ಪ್ರಕರಣ: ಮೊದಲ ಚಾರ್ಜ್‌ಶೀಟ್ ದಾಖಲಿಸಿದ ಸಿಬಿಐ

ರಿಯಲ್ ಎಸ್ಟೇಟ್ ಕಂಪೆನಿಗೆ ಅನುಕೂಲ ಮಾಡಿಕೊಡಲು ಕಾನೂನುಬಾಹಿರವಾಗಿ ಲಂಚ ಪಡೆದ ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಣಾ ಕಪೂರ್ ನನ್ನು ಬಂಧಿಸುವುದಕ್ಕೆ ಸಿಬಿಐ ಮುಂದಾಗಿತ್ತು. ಆದರೆ ಜುಲೈ 11ನೇ ತಾರೀಕಿನ ತನಕ ಮುಂಬೈ ವಿಶೇಷ ಕೋರ್ಟ್ ನಿಂದ ಮಧ್ಯಂತರ ರಕ್ಷಣೆ ಕಪೂರ್ ಗೆ ಸಿಕ್ಕಿದೆ.

ಅವಂತ ಗ್ರೂಪ್ ನಿಂದ ನವದೆಹಲಿಯ ಲ್ಯೂಟೆನ್ ವಲಯದ ಬಂಗಲೆ ಖರೀದಿ ವ್ಯವಹಾರದಲ್ಲಿ 307 ಕೋಟಿ ರುಪಾಯಿ ಲಂಚ ಪಡೆದ ಆರೋಪದ ಮೇಲೆ ಸಿಬಿಐನಿಂದ ಈ ವರ್ಷದ ಮಾರ್ಚ್ ನಲ್ಲಿ ರಾಣಾ ಕಪೂರ್ ವಿರುದ್ಧ ಪ್ರಕರಣ ದಾಖಲಾಗಿತ್ತು.