ಐಟಿ ರಿಟರ್ನ್ಸ್ ; ಮನೆ ಬಾಗಲಿಗೆ ಬರಲಿದೆ ನೆರವು

ಬೆಂಗಳೂರು, ಜು.25: ಆದಾಯ ತೆರಿಗೆ ಪಾವತಿ ಸುಲಭಗೊಳಿಸಲು ಹಾಗೂ ಸಾರ್ವಜನಿಕರಿಗೆ ತೆರಿಗೆ ಕಟ್ಟಲು ಅನುಕೂಲಕರ ಸೇವೆಗಳನ್ನು ಆದಾಯ ತೆರಿಗೆ ಇಲಾಖೆ ಪರಿಚಯಿಸಿದೆ. ‘Register for Home Visit' ಹಾಗೂ ‘Online Tax Help' ಎಂಬ ಈ ಸೇವೆಗಳು ಬೆಂಗಳೂರು ಸೇರಿದಂತೆ ದೇಶದ ಪ್ರಮುಖ ನಗರಗಳಲ್ಲಿ ಆರಂಭಗೊಂಡಿದೆ.

www.trpscheme.com ವೆಬ್ ತಾಣಕ್ಕೆ ಭೇಟಿ ನೀಡಿ ನುರಿತ ವೃತ್ತಿಪರರಿಂದ ಆನ್ ಲೈನ್ ಅಥವಾ ಮನೆಗೆ ಕರೆಸಿಕೊಂಡು ಸಲಹೆ ಪಡೆಯಬಹುದು. ಮೇಲ್ಕಂಡ ಸೇವೆಗಳಲ್ಲಿ ಯಾವುದಾದರೂ ಒಂದನ್ನು ಒಮ್ಮೆಗೆ ಬಳಸಬಹುದು.

ಆನ್ ಲೈನ್ ನಲ್ಲಿ ನಿಮ್ಮ ತೆರಿಗೆ ಸಂಬಂಧಿಸಿದ ಮಾಹಿತಿಯನ್ನು ದಾಖಲಿಸಿ, ನಂತರ ನಿಮ್ಮ ಸಮಸ್ಯೆ ಬಗ್ಗೆ ತಿಳಿಸಬಹುದು. ಆನ್ ಲೈನ್ ಮನವಿ ಪಡೆದ ನಂತರ ಇಮೇಲ್ ಅಥವಾ ಫೋನ್ ಮೂಲಕ 24 ಗಂಟೆಯೊಳಗೆ ಉತ್ತರಿಸಲಾಗುತ್ತದೆ.

ಆನ್ ಲೈನ್ ಉತ್ತರ ಸಮಂಜಸ ಎನಿಸದಿದ್ದರೆ, ತೆರಿಗೆ ನಿಪುಣರನ್ನು ಮನೆಗೆ ಕರೆಸಿಕೊಳ್ಳಬಹುದು. Tax Return Preparer (TRP) ನಿಮ್ಮ ಮನೆಗೆ ಬಂದು ನಿಮಗೆ ಸೂಕ್ತ ಸಲಹೆ ನೀಡಲಿದ್ದಾರೆ. ತೆರಿಗೆ ಮಾಹಿತಿ, ತೆರಿಗೆ ಪಾವತಿ ಬಗ್ಗೆ ಸೂಕ್ತ ಮಾಹಿತಿ, ಸಲಹೆ ನೀಡಲು 250 ರು. ಶುಲ್ಕ ವಿಧಿಸಲಾಗುತ್ತದೆ.

ಸದ್ಯಕ್ಕೆ ಈ ಸೌಲಭ್ಯ ಬೆಂಗಳೂರು, ಚೆನ್ನೈ, ಗುವಹಾಟಿ, ಹೈದರಾಬಾದ್, ಜೈಪುರ, ಕೋಲ್ಕತ್ತಾ, ಲಖ್ನೋ, ಮುಂಬೈ, ನವದೆಹಲಿ ಹಾಗೂ ಪಟ್ನಾದಲ್ಲಿ ಲಭ್ಯವಿದೆ. ಮುಂದಿನ ಹಂತದಲ್ಲಿ ಇನ್ನಷ್ಟು ನಗರಗಳಿಗೆ ಇದನ್ನು ವಿಸ್ತರಿಸಲಾಗುತ್ತದೆ ಎಂದು ಆದಾಯ ತೆರಿಗೆ ಇಲಾಖೆ ಹೇಳಿದೆ.

ಇದಲ್ಲದೆ TRP ಯೋಜನೆ ಫೋನ್ ಮೂಲಕ ಕೂಡಾ ಪಡೆಯಬಹುದು. 1800-10-23738ಕ್ಕೆ ಕರೆ ಮಾಡಿ ತೆರಿಗೆ ಸಂಬಂಧಿತ ಮಾಹಿತಿಯನ್ನು ಕೇಳಬಹುದು, ಹೆಚ್ಚಿನ ಮಾಹಿತಿ ಬೇಕಾದರೆ, ಆನ್ ಲೈನ್ ಮೂಲಕ ಮನವಿ ಸಲ್ಲಿಸಬೇಕಾಗುತ್ತದೆ.

ಪದವೀಧರ TRPಗಳು ಸ್ವೌದ್ಯೋಗಿಗಳಾಗಿದ್ದು ಆದಾಯ ತೆರಿಗೆ ಇಲಾಖೆಯಿಂದ ತರಬೇತಿ ಪಡೆದಿರುತ್ತಾರೆ. ವೈಯಕ್ತಿಕ ಹಾಗೂ ಸಂಸ್ಥೆಗೆ ಸಂಬಂಧಿಸಿದ ತೆರಿಗೆ ಪಾವತಿ ಮಾಹಿತಿ ಹಾಗೂ ಸಲಹೆಯನ್ನು ನೀಡುತ್ತಾರೆ.

ಐಟಿ ರಿಟರ್ನ್ಸ್ ಅಲ್ಲದೆ ತ್ರೈಮಾಸಿಕ TDS ಪಾವತಿಗೂ ಸಹಕರಿಸುತ್ತಾರೆ. TRPಗಳಿಗೆ 250 ರು ಶುಲ್ಕವನ್ನು ನಿರ್ವಹಣಾ ವೆಚ್ಚ ಎಂದು ನಿಗದಿಪಡಿಸಲಾಗಿದ್ದು, ಸಾರ್ವಜನಿಕರು ಯಾವುದೇ ಕಾರಣಕ್ಕೂ ಹೆಚ್ಚಿಗೆ ಹಣ ನೀಡುವ ಅಗತ್ಯತೆ ಇರುವುದಿಲ್ಲ. TRPಗಳು ಪಾವತಿಸುವ ಐಟಿ ರಿಟರ್ನ್ಸ್ ಆಧಾರದ ಮೇಲೆ ಆದಾಯ ತೆರಿಗೆ ಅವರಿಗೆ 1000 ರು ತನಕ ಭತ್ಯೆ ಕೂಡಾ ನೀಡುತ್ತದೆ.