ನಿರಂತರ ಆದಾಯ ಇಲ್ಲದ ವ್ಯಕ್ತಿಗಳು ಏನು ಮಾಡಬೇಕು?

ಬಜೆಟ್ ತಯಾರಿಸಿ

ನಿಮ್ಮ ಹಣವನ್ನು ಸಮರ್ಪಕವಾಗಿ ಉಪಯೋಗಿಸಲು ನೀವು ನಿರ್ಧರಿಸಿದ್ದೇ ಆದಲ್ಲಿ ಮೊದಲು ಸೂಕ್ತವಾದ ಆರ್ಥಿಕ ಬಜೆಟ್ ತಯಾರಿಸುವುದು ಅಗತ್ಯ. ಆದಾಯ ಅನಿಶ್ಚಿತವಾಗಿರುವಾಗ ಬಜೆಟ್ ಹಾಕಿಕೊಳ್ಳುವುದು ಸಹ ಕಷ್ಟದ ವಿಷಯವೇ ಆಗಿದೆ. ಒಮ್ಮೊಮ್ಮೆ ಆದಾಯ ಹೆಚ್ಚಾಗಬಹುದು, ಮತ್ತೊಮ್ಮೆ ಕಡಿಮೆ ಆಗಬಹುದು. ಇಂಥ ಸಂದರ್ಭಗಳಲ್ಲಿ ಅತಿ ಕಡಿಮೆ ಆದಾಯವನ್ನು ಗಮನದಲ್ಲಿಟ್ಟುಕೊಂಡು ಬಜೆಟ್ ಹಾಕಿಕೊಳ್ಳಬೇಕು. ಹೀಗೆ ಕಡಿಮೆ ಆದಾಯದ ಮೇಲೆ ಯೋಜನೆಯನ್ನು ರೂಪಿಸಿ ಅದಕ್ಕೆ ತಕ್ಕಂತೆ ಬದುಕಲಾರಂಭಿಸಿದರೆ, ಕೆಲ ದಿನಗಳಲ್ಲಿಯೇ ನಿಮ್ಮ ಬಳಿ ಸಾಕಷ್ಟು ಹಣ ಉಳಿತಾಯವಾಗುತ್ತದೆ. ಅಂದರೆ ಹೆಚ್ಚುವರಿ ಆದಾಯ ಬಂದಾಗಲೆಲ್ಲ ಅದು ಸೇವಿಂಗ್ಸ್ ರೂಪದಲ್ಲಿ ಸಂಗ್ರಹವಾಗುತ್ತದೆ. ಅಂಚೆ ಇಲಾಖೆಯ ಯೋಜನೆಗಳ ಬಗ್ಗೆ ನಿಮಗೆ ಗೊತ್ತಿರಬೇಕಾದ ಸಂಗತಿಗಳು

ಜೀವವಿಮೆ ಹಾಗೂ ಆರೋಗ್ಯ ವಿಮೆ ಪಡೆದುಕೊಳ್ಳಿ

ನಿತ್ಯ ಆಫೀಸಿಗೆ ಹೋಗಿ ಮಾಡುವ ಕೆಲಸಗಳು ಒಂದು ರೀತಿ ಕಟ್ಟಿ ಹಾಕಿದಂತೆನಿಸಿದರೂ ಅದಕ್ಕೆ ಅದರದೇ ಆದ ಅನುಕೂಲತೆಗಳೂ ಇವೆ. ದಿನದಲ್ಲಿ ಕಚೇರಿಗೆ ಹೋಗಿ ಕೆಲಸ ಮಾಡುವವರಿಗೆ ಅವರ ಕಂಪನಿಯಿಂದ ಸಿಗುವ ಜೀವವಿಮೆ ಹಾಗೂ ಆರೋಗ್ಯ ವಿಮೆ ಸೌಲಭ್ಯಗಳು ಇಂಥ ಪ್ರಯೋಜನಗಳಲ್ಲೊಂದಾಗಿವೆ. ನೀವು ಸ್ವ ಉದ್ಯೋಗ ಅಥವಾ ಫ್ರೀ ಲಾನ್ಸಿಂಗ್ ಮಾಡುವವರಾಗಿದ್ದರೆ ನಿಮಗೆ ಇಂಥ ಸೌಲಭ್ಯಗಳನ್ನು ಯಾರೂ ನೀಡಲಾರರು. ಹೀಗಾಗಿ ಜವಾಬ್ದಾರಿಯುತ ಗೃಹಸ್ಥರಾಗಿರುವವರೆಲ್ಲರೂ ತಾವಾಗಿಯೇ ವಿಮೆಯ ಸುರಕ್ಷತೆಯನ್ನು ಪಡೆದುಕೊಳ್ಳಬೇಕಾಗುತ್ತದೆ.
ನಿಶ್ಚಿತ ಅವಧಿಗೆ ವಿಮಾ ಸುರಕ್ಷೆ ನೀಡುವ ಟರ್ಮ ಲೈಫ್ ಇನ್ಸುರೆನ್ಸ್ ಖರೀದಿಸಬೇಕು. ಒಂದೊಮ್ಮೆ ವಿಮಾ ಅವಧಿಯೊಳಗೆ ಪಾಲಿಸಿದಾರ ಆಕಸ್ಮಿಕ ಮರಣ ಹೊಂದಿದಲ್ಲಿ ಆತನ ನಾಮಿನಿಗೆ ಇನ್ಸುರೆನ್ಸ್ ಡೆಥ್ ಬೆನಿಫಿಟ್ ಹಾಗೂ ವಿಮೆಯ ಖಾತರಿ ಮೊತ್ತ ಎರಡೂ ಸಿಗುತ್ತವೆ. ಯಾವುದೇ ಗೃಹ ಸಾಲ ಅಥವಾ ಕಾರು ಸಾಲಗಳು ಇದ್ದಲ್ಲಿ ಅವುಗಳನ್ನು ತೀರಿಸಲು ಈ ಮೊತ್ತ ನೆರವಾಗುತ್ತವೆ. ಹೀಗೆ ಆಪತ್ಕಾಲದಲ್ಲಿಯೂ ನಿಮ್ಮ ಕುಟುಂಬದ ಸುರಕ್ಷತೆಯನ್ನು ಖಾತರಿಪಡಿಸಬಹುದು.

ತುರ್ತು ನಿಧಿ ಇರಲಿ

ಆದಾಯ ಅನಿಶ್ಚಿತವಾಗಿರುವಾಗ ತುರ್ತು ನಿಧಿ ಕಾಯ್ದುಕೊಳ್ಳುವುದು ಅತಿ ಅಗತ್ಯವಾಗಿದೆ. ಯಾವುದೋ ಬಾಕಿ ಮೊತ್ತ ಬರುವುದು ತಡವಾದ ಸಂದರ್ಭಗಳಲ್ಲಿ ತುರ್ತು ನಿಧಿ ಸಹಾಯಕ್ಕೆ ಬರುತ್ತದೆ. ಕೈಕೆಲಸ ಅಥವಾ ಫ್ರೀಲಾನ್ಸಿಂಗ್ ಕೆಲಸ ಮಾಡುವಾಗ ಆದಾಯ ಯಾವಾಗ ಸಿಗುತ್ತದೆ ಎಂಬ ಬಗ್ಗೆ ಖಾತರಿ ಇರುವುದಿಲ್ಲ. ಒಮ್ಮೊಮ್ಮೆ ಬೇಗನೆ ಬಾಕಿ ಪಾವತಿಯಾದರೆ, ಇನ್ನು ಕೆಲವೊಮ್ಮೆ ತೀರಾ ತಡವಾಗಿ ಬರಬಹುದು. ಇಂಥ ಕಠಿಣ ಪರಿಸ್ಥಿತಿಗಳನ್ನು ನಿಭಾಯಿಸಲು ತುರ್ತು ನಿಧಿ ಸಂಗ್ರಹಿಸಿ ಇಟ್ಟುಕೊಳ್ಳುವುದು ಜಾಣತನವಾಗಿದೆ. ಕಾಯಿಲೆ ಅಥವಾ ತುರ್ತಾಗಿ ಎಲ್ಲೋ ಹೋಗಬೇಕಾದ ಸಂದರ್ಭಗಳಲ್ಲಿಯೂ ಈ ನಿಧಿ ಆಪತ್ಬಾಂಧವನಾಗಿ ಕೈ ಹಿಡಿಯುತ್ತದೆ.

ಮಿತಿ ಮೀರಿ ಖರ್ಚು ಮಾಡುವಂತಿಲ್ಲ

ಯಾವುದೋ ಬಾಕಿ ಮೊತ್ತ ಕೈಸೇರಿದಾಗ ಒಮ್ಮೆಲೇ ಎಲ್ಲ ಹಣವನ್ನು ಖರ್ಚು ಮಾಡುವುದು ಸರಿಯಲ್ಲ. ಅತಿಯಾಗಿ ಖರ್ಚು ಮಾಡುವ ಪ್ರವೃತ್ತಿಗೆ ಕಡಿವಾಣ ಹಾಕಲೇಬೇಕು. ಕೈತುಂಬಾ ಹಣ ಇದ್ದಾಗ ಬೇಕಾಬಿಟ್ಟಿ ಖರ್ಚು ಮಾಡಿದರೆ ಭವಿಷ್ಯದಲ್ಲಿ ಹಣಕಾಸು ಕೊರತೆ ಎದುರಿಸಬೇಕಾಗಿ ಬರಬಹುದು. ಹಣ ಬಂದ ಕ್ಷಣದಲ್ಲಿ ಲೆಕ್ಕಾಚಾರ ಹಾಕಿಯೇ ಖರ್ಚು ಮಾಡಬೇಕು. ಇಲ್ಲವಾದರೆ ಮುಂದಿನ ದಿನಗಳಲ್ಲಿ ಯಾವುದೋ ತೀರಾ ಅಗತ್ಯ ಸಂದರ್ಭಗಳಲ್ಲಿ ಹಣ ಇಲ್ಲದೆ ಪರದಾಡುವಂತಾಗಬಹುದು. ಹೀಗಾಗಿ ಅನಿಶ್ಚಿತ ಆದಾಯ ಹೊಂದಿರುವವರು ಖರ್ಚಿನ ಮೇಲೆ ನಿಗಾ ವಹಿಸಲೇಬೇಕು.

ಸಾಲದಿಂದ ದೂರವಿರಿ

ನಿಮ್ಮ ಆದಾಯ ಅನಿಶ್ಚಿತವಾಗಿದ್ದರೆ ನೀವು ಸಾಲಗಳಿಂದ ದೂರವಿರುವುದೇ ವಾಸಿ. ಕ್ರೆಡಿಟ್ ಕಾರ್ಡ ಹೊರತುಪಡಿಸಿದರೆ ಬಹುತೇಕ ಎಲ್ಲ ಬಗೆಯ ಸಾಲಗಳ ಕಂತುಗಳನ್ನು ಪ್ರತಿತಿಂಗಳು ನಿಯಮಿತವಾಗಿ ಪಾವತಿಸಬೇಕಾಗುತ್ತದೆ. ಪರ್ಸನಲ್ ಲೋನ ಅಥವಾ ಗೃಹ ಸಾಲ ಪಡೆದುಕೊಂಡರೆ ಒಪ್ಪಂದದಂತೆ ಪ್ರತಿ ತಿಂಗಳು ನಿಗದಿತ ದಿನಾಂಕದಂದು ಇಎಂಐ ಕಟ್ಟಲೇಬೇಕು. ಇಂಥ ಇಎಂಐಗಳು ಸಾಮಾನ್ಯವಾಗಿ ಬ್ಯಾಂಕ್ ಖಾತೆಯಿಂದ ಆಟೊ ಡೆಬಿಟ್ ಆಗುತ್ತವೆ. ಆದಾಯ ಸುನಿಶ್ಚಿತವಾಗಿಲ್ಲದಿರುವಾಗ ಬ್ಯಾಂಕ್ ಬ್ಯಾಲೆನ್ಸ್ ಇಡುವುದು ಕಷ್ಟಕರ. ನಿಗದಿತ ದಿನಾಂಕದಂದು ಬ್ಯಾಂಕ್ ಖಾತೆಯಲ್ಲಿ ಹಣವಿಲ್ಲದಿದ್ದರೆ ಚೆಕ್ ಬೌನ್ಸ್ ಆಗುವ ಅಪಾಯವಿರುತ್ತದೆ. ಇದರಿಂದ ಕಾನೂನು ತೊಡಕುಗಳನ್ನು ಎದುರಿಸಬೇಕಾಗುತ್ತದೆ. ಅಲ್ಲದೆ ಮುಂದಿನ ದಿನಗಳಲ್ಲಿ ಮತ್ತೊಂದು ಸಾಲ ಪಡೆಯುವ ಸಾಧ್ಯತೆಗಳೂ ಕ್ಷೀಣಿಸುತ್ತವೆ.

ಆರ್ಥಿಕ ಶಿಸ್ತು ಇರಲಿ

ಸಾಮಾನ್ಯವಾಗಿ ಜೀವನದ ಒಂದಿಲ್ಲೊಂದು ಹಂತದಲ್ಲಿ ಎಲ್ಲರೂ ಅನಿಶ್ಚಿತ ಆದಾಯದ ಪರಿಸ್ಥಿತಿಗಳನ್ನು ಎದುರಿಸಬೇಕಾಗುತ್ತದೆ. ಇಂಥ ಅವಧಿಯಲ್ಲಿ ನಿಮ್ಮ ಇತಿ ಮಿತಿಗಳನ್ನು ಅರಿತು ಬಾಳಿದರೆ ಯಾವುದೇ ಸಮಸ್ಯೆ ಉಂಟಾಗುವುದಿಲ್ಲ. ಜೀವನದಲ್ಲಿ ಆರ್ಥಿಕ ಶಿಸ್ತು ಅಳವಡಿಸಿಕೊಂಡಲ್ಲಿ ಅನಿಶ್ಚಿತ ಆದಾಯದ ಸಂದರ್ಭಗಳಲ್ಲಿಯೂ ನೆಮ್ಮದಿಯ ಜೀವನ ನಡೆಸಬಹುದು.