ಗೃಹ ಸಾಲ ಪಡೆದವರಿಗೆ ಎಚ್ ಡಿಎಫ್ ಸಿಯಿಂದ ಗುಡ್ ನ್ಯೂಸ್

ಪ್ರಮುಖ ಹಣಕಾಸು ಸಂಸ್ಥೆಯಾದ ಎಚ್ ಡಿಎಫ್ ಸಿ ಮಂಗಳವಾರದಂದು ಸಾಲದ ಮೇಲಿನ ಬಡ್ಡಿ ದರವನ್ನು 15 ಬೇಸಿಸ್ ಪಾಯಿಂಟ್ ಕಡಿಮೆ ಮಾಡಿದೆ. ಅಂದ ಹಾಗೆ ಭಾರತದ ಅತಿ ದೊಡ್ಡ ಬ್ಯಾಂಕ್ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಸೇರಿದಂತೆ ಹಲವು ಹಣಕಾಸು ಸಂಸ್ಥೆಗಳು ಸಾಲದ ಮೇಲಿನ ಬಡ್ಡಿದರವನ್ನು ಇಳಿಕೆ ಮಾಡಿದ ನಂತರ ಎಚ್ ಡಿಎಫ್ ಸಿ ಕೂಡ ಆ ಕಡೆಗೆ ಹೆಜ್ಜೆ ಇಟ್ಟಿದೆ.

"ಎಚ್ ಡಿಎಫ್ ಸಿಯಿಂದ ಗೃಹಸಾಲದ ಮೇಲಿನ ರೀಟೇಲ್ ಪ್ರೈಮ್ ಲೆಂಡಿಂಗ್ ರೇಟ್ (RPLR) ಇಳಿಕೆ ಮಾಡಿದೆ. ಅದರ ಆಧಾರದಲ್ಲೇ ಅಡ್ಜಸ್ಟಬಲ್ ರೇಟ್ ಹೋಮ್ ಲೋನ್ಸ್ (ARHL) ನಿರ್ಧಾರ ಆಗುತ್ತದೆ. ಏಪ್ರಿಲ್ 22, 2020ರಿಂದ 15 ಬೇಸಿಸ್ ಪಾಯಿಂಟ್ ಇಳಿಕೆಯಾಗಲಿದೆ" ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಈ ಬದಲಾವಣೆಯು ಎಲ್ಲ ರೀಟೇಲ್ ಗೃಹ ಸಾಲ ಗ್ರಾಹಕರಿಗೂ ಅನ್ವಯ ಆಗಲಿದೆ ಎಂದು ತಿಳಿಸಲಾಗಿದೆ.

ಹೊಸ ದರವು 8.05- 8.85 ಪರ್ಸೆಂಟ್ ಇರಲಿದೆ. ಕಳೆದ ಕೆಲವು ತಿಂಗಳಿಂದ ಎಲ್ಲ ಬ್ಯಾಂಕ್ ಗಳ ಸಾಲದ ಮೇಲಿನ ಬಡ್ಡಿ ದರವು ಇಳಿಯುತ್ತಾ ಬಂದಿದೆ. ನಿಧಾನಗತಿಯ ಆರ್ಥಿಕತೆಗೆ ಜೀವ ತುಂಬಲು ಸರ್ಕಾರ ಹಾಗೂ ಆರ್ ಬಿಐ ಸೇರಿ ಈ ಕ್ರಮ ಕೈಗೊಳ್ಳುತ್ತಿದೆ. ಕೊರೊನಾ ಬಿಕ್ಕಟ್ಟು ಉಲ್ಬಣದ ಹಿನ್ನೆಲೆಯಲ್ಲಿ ಆರ್ ಬಿಐ ಕಳೆದ ತಿಂಗಳು 75 ಬೇಸಿಸ್ ಪಾಯಿಂಟ್ಸ್ ಇಳಿಕೆ ಮಾಡಿದೆ.