Bengaluru Office Market: ಬೆಂಗಳೂರು ಕಚೇರಿ ಮಾರುಕಟ್ಟೆ ನೀರಸ, ಏನಿದು, ನಡೆದಿದ್ದೇನು, ಮುಂದೇನು?

ಭಾರತದ ಪ್ರಮುಖ ಕಚೇರಿ ಮಾರುಕಟ್ಟೆಯಾದ ಬೆಂಗಳೂರು ಜುಲೈ-ಸೆಪ್ಟೆಂಬರ್ ಅವಧಿಯಲ್ಲಿ ಭಾರೀ ಕುಸಿತವನ್ನು ಕಂಡಿದೆ ಎಂದು ವೆಸ್ಟಿಯನ್ ವರದಿ ಹೇಳಿದೆ. ಬೆಂಗಳೂರಿನಲ್ಲಿ ಆಫೀಸ್ ಸ್ಪೇಸ್ ಒಟ್ಟು ಗುತ್ತಿಗೆಯು ವರ್ಷದಿಂದ ವರ್ಷಕ್ಕೆ ಶೇಕಡ 28 ರಷ್ಟು ಇಳಿಕೆಯಾಗಿದೆ. ಇನ್ನು ಹೊಸ ಪೂರೈಕೆಯು ಕೂಡಾ ಶೇಕಡ 25 ರಷ್ಟು ಕಡಿಮೆಯಾಗಿದೆ ಎಂದು ವೆಸ್ಟಿಯನ್ ತಿಳಿಸಿದೆ.

ರಿಯಲ್ ಎಸ್ಟೇಟ್ ಸಲಹೆಗಾರ ವೆಸ್ಟಿಯನ್ ಬೆಂಗಳೂರಿನಲ್ಲಿ ದೊಡ್ಡ ಐಟಿ ಕಂಪನಿಗಳು ತಮ್ಮ ಸಿಬ್ಬಂದಿಯನ್ನು ಮತ್ತೆ ಕಚೇರಿಗೆ ಬರಬೇಕು ಎಂದು ಹೇಳಿರುವ ಕಾರಣದಿಂದಾಗಿ ಕಚೇರಿ ಬೇಡಿಕೆ ಹೆಚ್ಚಾಗುವ ನಿರೀಕ್ಷೆಯಿದೆ ಎಂದು ಹೇಳಿಕೊಂಡಿದೆ. ಆದರೆ ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಮಾತ್ರ ಬೆಂಗಳೂರಿನ್ಲಲಿ ಕಚೇರಿ ಮಾರುಕಟ್ಟೆ ಭಾರೀ ಕುಸಿದಿದೆ.

ವೆಸ್ಟಿಯನ್ ಈ ಕ್ಯಾಲೆಂಡರ್ ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ತನ್ನ ಕಚೇರಿ ಮಾರುಕಟ್ಟೆ ವರದಿಯನ್ನು ಬಿಡುಗಡೆ ಮಾಡಿದೆ. ಇದು ಕಛೇರಿ ಗುತ್ತಿಗೆಯಲ್ಲಿ ಶೇಕಡ 21 ರಷ್ಟು ಬೆಳವಣಿಗೆಯನ್ನು ಮತ್ತು ಅಗ್ರ ಏಳು ನಗರಗಳಲ್ಲಿ ಹೊಸ ಪೂರೈಕೆಯಲ್ಲಿ ಶೇಕಡ 26 ರಷ್ಟು ಹೆಚ್ಚಳವನ್ನು ತೋರಿಸುತ್ತದೆ.

ಅಂಕಿಅಂಶಗಳ ಪ್ರಕಾರ, ಜುಲೈ-ಸೆಪ್ಟೆಂಬರ್ ಅವಧಿಯಲ್ಲಿ ಪ್ರಮುಖ ಏಳು ನಗರಗಳಲ್ಲಿ ಕಚೇರಿ ಪಡೆಯುವ ಪ್ರಮಾಣವು ವರ್ಷದಿಂದ ವರ್ಷಕ್ಕೆ ಶೇಕಡ 21 ರಷ್ಟು ಅಥವಾ 15.9 ಮಿಲಿಯನ್ ಚದರ ಅಡಿಗಳಿಗೆ ಏರಿಕೆಯಾಗಿದೆ. ಬೆಂಗಳೂರು, ಹೈದರಾಬಾದ್, ಚೆನ್ನೈ, ಮುಂಬೈ, ಪುಣೆ, ದೆಹಲಿ-ಎನ್‌ಸಿಆರ್ ಮತ್ತು ಕೋಲ್ಕತ್ತಾ ಈ ಪ್ರಮುಖ ಏಳು ನಗರಗಳಾಗಿದೆ.

ಈ ಏಳು ನಗರಗಳಾದ್ಯಂತ, ಈ ಕ್ಯಾಲೆಂಡರ್ ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ಹೊಸ ಕಚೇರಿ ಸ್ಥಳಾವಕಾಶದ ಪೂರೈಕೆಯು ವಾರ್ಷಿಕವಾಗಿ 13.4 ಮಿಲಿಯನ್ ಚದರ ಅಡಿಗಳಿಗೆ ಶೇಕಡ 26 ರಷ್ಟು ಹೆಚ್ಚಾಗಿದೆ. "ವರದಿಯು ಭಾರತದಲ್ಲಿ ಗುಣಮಟ್ಟದ ಕಚೇರಿ ಸ್ಥಳಗಳಿಗೆ ಆರೋಗ್ಯಕರ ಬೇಡಿಕೆಯನ್ನು ತೋರಿಸುತ್ತದೆ," ಎಂದು ವೆಸ್ಟಿಯನ್ ಸಿಇಒ ಶ್ರೀನಿವಾಸ್ ರಾವ್ ಹೇಳಿದರು.

ಜುಲೈ-ಸೆಪ್ಟೆಂಬರ್ ಅವಧಿಯಲ್ಲಿ ಒಟ್ಟು ಗುತ್ತಿಗೆ

ಕುತೂಹಲಕಾರಿಯಾಗಿ, ಐಟಿ ಕಂಪನಿಗಳ ಬೃಹತ್ ಉಪಸ್ಥಿತಿಯನ್ನು ಹೊಂದಿರುವ ಅತಿದೊಡ್ಡ ಕಚೇರಿ ಮಾರುಕಟ್ಟೆಯಾದ ಬೆಂಗಳೂರು ಗುತ್ತಿಗೆ ವಹಿವಾಟುಗಳು ಮತ್ತು ಹೊಸ ಪೂರೈಕೆಯಲ್ಲಿ ಗಮನಾರ್ಹ ಕುಸಿತವನ್ನು ಕಂಡಿದೆ. ಬೆಂಗಳೂರಿನಲ್ಲಿ, ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಕಚೇರಿ ಸ್ಥಳವನ್ನು ಪಡೆಯುವ ಪ್ರಮಾಣವು ವರ್ಷದಿಂದ ವರ್ಷಕ್ಕೆ ಶೇಕಡ 28 ರಷ್ಟು 3.6 ಮಿಲಿಯನ್ ಚದರ ಅಡಿಗಳಿಗೆ ಇಳಿದಿದೆ.

ಇನ್ನು ಬೆಂಗಳೂರಿನಲ್ಲಿ ಹೊಸ ಪೂರೈಕೆಯು ವರ್ಷದಿಂದ ವರ್ಷಕ್ಕೆ ಶೇಕಡ 25 ರಷ್ಟು 2.7 ಮಿಲಿಯನ್ ಚದರ ಅಡಿಗಳಿಗೆ ಕುಸಿದಿದೆ. ದೆಹಲಿ-ಎನ್‌ಸಿಆರ್‌ನಲ್ಲಿ ಕಚೇರಿ ಸ್ಥಳದ ಗುತ್ತಿಗೆಯು ಜುಲೈ-ಸೆಪ್ಟೆಂಬರ್ ಅವಧಿಯಲ್ಲಿ ವರ್ಷದಿಂದ ವರ್ಷಕ್ಕೆ ಶೇಕಡ 14 ರಷ್ಟು 3 ಮಿಲಿಯನ್ ಚದರ ಅಡಿಗಳಿಗೆ ಇಳಿದಿದೆ. ಹೊಸ ಕಛೇರಿ ಸ್ಥಳದ ಪೂರೈಕೆಯು ಶೇಕಡ 82 ರಷ್ಟು 0.5 ಮಿಲಿಯನ್ ಚದರ ಅಡಿಗಳಿಗೆ ಕುಸಿದಿದೆ.

ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ, ಚೆನ್ನೈನಲ್ಲಿ ಕಚೇರಿ ಸ್ಥಳದ ಗುತ್ತಿಗೆ ವಹಿವಾಟುಗಳು 2 ಮಿಲಿಯನ್ ಚದರ ಅಡಿಗಳಿಗೆ ಅಥವಾ ಶೇಕಡ 82 ರಷ್ಟು ಏರಿಕೆಯಾಗಿದೆ. ಹೊಸ ಪೂರೈಕೆಯು 1.2 ಮಿಲಿಯನ್ ಚದರ ಅಡಿಗಳಿಗೆ ಅಥವಾ ಶೇಕಡ 71 ರಷ್ಟು ಹೆಚ್ಚಳವಾಗಿದೆ.

ಹೈದರಾಬಾದ್‌ನಲ್ಲಿ, ಕಚೇರಿ ಸ್ಥಳದ ಗುತ್ತಿಗೆಯು 3.7 ಮಿಲಿಯನ್ ಚದರ ಅಡಿಗಳಿಗೆ ಅಥವಾ ಶೇಕಡ 270 ರಷ್ಟು ಜಿಗಿದಿದೆ. ಹೊಸ ಪೂರೈಕೆಯು 5.5 ಮಿಲಿಯನ್ ಚದರ ಅಡಿಗಳಿಗೆ ಅಥವಾ ಶೇಕಡ 175 ರಷ್ಟು ಏರಿದೆ. ಮುಂಬೈನಲ್ಲಿ ಕಛೇರಿ ಸ್ಥಳದ ಗುತ್ತಿಗೆಯು ಶೇಕಡ 21 ರಷ್ಟು ಏರಿಕೆಯಾಗಿ 2.3 ಮಿಲಿಯನ್ ಚದರ ಅಡಿಗಳಿಗೆ ತಲುಪಿದೆ. ಹೊಸ ಪೂರೈಕೆಯು ಶೇಕಡ 125 ರಷ್ಟು 0.9 ಮಿಲಿಯನ್ ಚದರ ಅಡಿಗಳಿಗೆ ಜಿಗಿದಿದೆ.

ಪುಣೆಯು 1.1 ಮಿಲಿಯನ್ ಚದರ ಅಡಿಗಳಿಗೆ ಕಚೇರಿ ಗುತ್ತಿಗೆಯಲ್ಲಿ ಶೇಕಡ 83 ರಷ್ಟು ಏರಿಕೆ ಕಂಡಿದೆ. ಹೊಸ ಪೂರೈಕೆಯು 1.9 ಮಿಲಿಯನ್ ಚದರ ಅಡಿಗಳಿಗೆ ಶೇಕಡ 73 ರಷ್ಟು ಏರಿಕೆಯಾಗಿದೆ. ಕೋಲ್ಕತ್ತಾದ ಕಚೇರಿ ಮಾರುಕಟ್ಟೆಯು 0.2 ಮಿಲಿಯನ್ ಚದರ ಅಡಿ ಗುತ್ತಿಗೆ ವಹಿವಾಟು ಮತ್ತು 0.7 ಮಿಲಿಯನ್ ಚದರ ಅಡಿ ಹೊಸ ಪೂರೈಕೆಯನ್ನು ಕಂಡಿದೆ.