ಬಹುನಿರೀಕ್ಷಿತ ಎಲ್‌ಐಸಿ ಐಪಿಒಗೆ ಸೆಬಿ ಅಸ್ತು

ಬಹುನಿರೀಕ್ಷಿತ ಭಾರತೀಯ ಜೀವ ವಿಮಾ ನಿಗಮ (ಎಲ್‌ಐಸಿ) ಐಪಿಒಗೆ ಸೆಬಿ ಅನುಮೋದನೆ ನೀಡಿದ್ದು, ಶೀಘ್ರದಲ್ಲೇ ಎಲ್‌ಐಸಿ ಐಪಿಒ ಆರಂಭ ಆಗಲಿದೆ ಎಂದು ವರದಿಯು ಉಲ್ಲೇಖ ಮಾಡಿದೆ. ಜೀವ ವಿಮಾ ನಿಗಮದ (ಎಲ್‌ಐಸಿ) ಆರಂಭಿಕ ಸಾರ್ವಜನಿಕ ಕೊಡುಗೆ (ಐಪಿಒ) ಗಾಗಿ ಮಾರುಕಟ್ಟೆ ನಿಯಂತ್ರಕ ಸೆಕ್ಯುರಿಟೀಸ್ ಮತ್ತು ಎಕ್ಸ್‌ಚೇಂಜ್ ಬೋರ್ಡ್ ಆಫ್ ಇಂಡಿಯಾ (ಸೆಬಿ) ಗೆ ಸರ್ಕಾರವು ಫೆಬ್ರವರಿಯಲ್ಲಿ ಕರಡು ಪತ್ರವನ್ನು ಸಲ್ಲಿಕೆ ಮಾಡಿದೆ. ಈಗ ಈ ಕರಡು ಪತ್ರಕ್ಕೆ ಅನುಮೋದನೆ ಲಭಿಸಿದೆ.

ಎಲ್‌ಐಸಿ ಐಪಿಒಗೆ ಸೆಬಿ ವೀಕ್ಷಣಾ ಪತ್ರವನ್ನು ನೀಡಿದ್ದು 22 ದಿನಗಳ ಒಳಗಾಗಿ ಈ ಅನುಮತಿ ಲಭ್ಯವಾಗಿದೆ ಎಂದು ವರದಿ ಉಲ್ಲೇಖ ಮಾಡಿದೆ. ಮಾರುಕಟ್ಟೆ ನಿಯಂತ್ರಕಕ್ಕೆ ಸಲ್ಲಿಸಿದ ಕರಡು ರೆಡ್ ಹೆರಿಂಗ್ ಪ್ರಾಸ್ಪೆಕ್ಟಸ್ (ಡಿಆರ್‌ಎಚ್‌ಪಿ) ಪ್ರಕಾರ ಸರ್ಕಾರವು ಎಲ್‌ಐಸಿಯ 31 ಕೋಟಿಗೂ ಹೆಚ್ಚು ಈಕ್ವಿಟಿ ಷೇರುಗಳನ್ನು ಮಾರಾಟ ಮಾಡುತ್ತದೆ.

ಎಲ್‌ಐಸಿ ಸಂಪೂರ್ಣವಾಗಿ ಸರ್ಕಾರಿ ಸ್ವಾಮ್ಯದ ಸಂಸ್ಥೆಯಾಗಿದ್ದು, ಸರ್ಕಾರವು ಶೇಕಡ ನೂರರಷ್ಟು ಷೇರನ್ನು ಹೊಂದಿದೆ. ಈಗ ಸರ್ಕಾರ ಈ ಐಪಿಒ ಮೂಲಕ 31.62 ಕೋಟಿ (31,62,49,885) ಷೇರುಗಳನ್ನು ಮಾರಾಟ ಮಾಡಲಿದೆ. ಇನ್ನು ಈ ಪೈಕಿ ಶೇಕಡ ಶೇ. 50ರಷ್ಟು ಷೇರುಗಳು ಕ್ಯೂಐಬಿಗಳಿಗೆ ಮೀಸಲಿರಿಸಲಾಗುತ್ತದೆ. ಹಾಗೆಯೇ ಸಾಂಸ್ಥಿಕೇತರ ಹೂಡಿಕೆದಾರರಿಗೆ ಶೇ. 15ರಷ್ಟು ಷೇರುಗಳನ್ನು ಮೀಸಲಿಡಲಾಗುತ್ತದೆ. ಉಳಿದ ಶೇ. 35 ಷೇರುಗಳನ್ನು ಸಾರ್ವಜನಿಕರಿಗೆ ನೀಡಲಾಗುತ್ತದೆ.

ಎಲ್‌ಐಸಿ ಐಪಿಒ ಬಗ್ಗೆ ಮಾಹಿತಿ

ಸರಿ ಸುಮಾರು1.35 ಮಿಲಿಯನ್ ನೋಂದಾಯಿತ ಏಜೆಂಟ್‌ಗಳ ದೇಶದಲ್ಲಿ ಅತಿದೊಡ್ಡ ಏಜೆಂಟ್ ನೆಟ್‌ವರ್ಕ್ ಹೊಂದಿರುವ ಸಂಸ್ಥೆಯು ಪಾಲಿಸಿದಾರರನ್ನು IPO ಗೆ 10 ಪ್ರತಿಶತ ರಿಯಾಯಿತಿಯೊಂದಿಗೆ ಆಕರ್ಷಿಸಲು ಪ್ರಯತ್ನಿಸುತ್ತದೆ.

ಭಾರತೀಯ ಜೀವ ವಿಮಾ ನಿಗಮದ (ಎಲ್‌ಐಸಿ) ಆರಂಭಿಕ ಸಾರ್ವಜನಿಕ ಕೊಡುಗೆ(ಐಪಿಒ)ಯು ಮಾರ್ಚ್ 10 ರಿಂದ 14 ರವರೆಗೆ ನಡೆಯಲಿದ್ದು, ಮಾರುಕಟ್ಟೆ ವದಂತಿಗಳ ಪ್ರಕಾರ ಷೇರು ಮಾರಾಟವು ಸುಮಾರು 65,400 ಕೋಟಿ ರೂ.

1.35 ಮಿಲಿಯನ್ ನೋಂದಾಯಿತ ಏಜೆಂಟ್‌ಗಳ್ಳನ್ನು ಹೊಂದಿರುವ ದೇಶದ ಅತಿದೊಡ್ಡ ನೆಟ್‌ವರ್ಕ್‌ ವಿಮಾಸಂಸ್ಥೆ 10 ಪ್ರತಿಶತ ರಿಯಾಯಿತಿಯೊಂದಿಗೆ IPO ಗೆ ಪಾಲಿಸಿದಾರರನ್ನು ಆಕರ್ಷಿಸಲು ಪ್ರಯತ್ನಿಸುತ್ತದೆ. ಖಚಿತವಾಗಿ ಹೇಳುವುದಾದರೆ, ಅನೇಕ ಪಾಲಿಸಿದಾರರು ಈಕ್ವಿಟಿಗಳಲ್ಲಿ ಮೊದಲ ಬಾರಿ ಹೂಡಿಕೆದಾರರಾಗಿರುತ್ತಾರೆ.

ಉಕ್ರೇನ್‌ ಯುದ್ಧದ ನಡುವೆ ಎಲ್‌ಐಸಿ ಐಪಿಒ ಬರಲಿದೆಯೇ?

ಸರ್ಕಾರಿ ವಿಮಾ ದೈತ್ಯ ಲೈಫ್ ಇನ್ಶುರೆನ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (ಎಲ್‌ಐಸಿ) ಯ ಬಹುನಿರೀಕ್ಷಿತ ಆರಂಭಿಕ ಸಾರ್ವಜನಿಕ ಕೊಡುಗೆಯನ್ನು (ಐಪಿಒ) ಮುಂದಿನ ಹಣಕಾಸು ವರ್ಷದಲ್ಲಿ ಮಾಡುವ ಸಾಧ್ಯತೆ ಇದೆ. ರಷ್ಯಾ ಹಾಗೂ ಉಕ್ರೇನ್‌ ಬಿಕ್ಕಟ್ಟಿನ ಕಾರಣದಿಂದಾಗಿ ಎಲ್‌ಐಸಿ ಐಪಿಒ ಸಮಯವನ್ನು ಮರು ಮೌಲ್ಯಮಾಪನ ಮಾಡಲು ಸರ್ಕಾರವು ಸಭೆಯನ್ನು ನಡೆಸುವ ಸಾಧ್ಯತೆಯಿದೆ ಎಂದು ವರದಿ ಆಗಿದೆ.

ಎಲ್ಐಸಿ ಪಟ್ಟಿಯ ಮರುಮೌಲ್ಯಮಾಪನಕ್ಕಾಗಿ ಸಭೆಯು "ಈ ವಾರ" ನಡೆಯಲಿದೆ ಎಂದು ಗೌಪ್ಯ ಸರ್ಕಾರಿ ಅಧಿಕಾರಿಯೊಬ್ಬರು ಸುದ್ದಿ ವಾಹಿನಿಗೆ ತಿಳಿಸಿದರು. ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಈ ವಿಷಯದ ಬಗ್ಗೆ ಸರ್ಕಾರದ ನಿಲುವನ್ನು ಈಗಾಗಲೇ ತಿಳಿಸಿದ್ದಾರೆ. ರಷ್ಯಾ-ಉಕ್ರೇನ್‌ ಯುದ್ಧದ ನಡುವೆ ಎಲ್‌ಐಸಿ ಐಪಿಒ ವಿಳಂಬ ಆಗುವ ಸಾಧ್ಯತೆ ಬಗ್ಗೆ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಸುಳಿವು ನೀಡಿದ್ದಾರೆ. ಆದರೆ ಈ ವಿಳಂಬವು ಸರಿಸುಮಾರು ಮುಂದಿನ ಹಣಕಾಸು ವರ್ಷದವರೆಗೆ ಆಗಲಿದೆ ಎಂದು ವರದಿಯು ಉಲ್ಲೇಖ ಮಾಡಿದೆ.