Money and Finance Horoscope 2021: ತುಲಾದಿಂದ ಮೀನ ಯಾರಿಗೇನು?
2020ನೇ ಇಸವಿ ನಿಮ್ಮ ಪಾಲಿಗೆ ಹೇಗಿತ್ತೋ ಏನೋ ಗೊತ್ತಿಲ್ಲ. ಅದರಲ್ಲೂ ಆರ್ಥಿಕ ಪರಿಸ್ಥಿತಿ ಹೇಗಿತ್ತೋ, ಕಷ್ಟ- ಸುಖ ಇತ್ಯಾದಿ ವಿಚಾರಗಳನ್ನು ಒಮ್ಮೆ ಮೆಲುಕು ಹಾಕಿ ನೋಡಿ. ಕೆಲವು ಘಟನೆಗಳ ಬಗ್ಗೆ ಮುಂಚೆಯೇ ಸುಳಿವು ಸಿಕ್ಕಿದ್ದರೆ ಚೆನ್ನಾಗಿರುತ್ತಿತ್ತು ಅನ್ನಿಸಿರಬಹುದು. ಅಥವಾ ಅಂದುಕೊಂಡಂತೆ ಆ ಕೆಲಸ ಮಾಡಿಬಿಟ್ಟಿದ್ದರೆ ಚೆನ್ನಾಗಿರುತ್ತಿತ್ತು ಅಂತಲೂ ಅನಿಸಿರಬಹುದು.
ಇರಲಿ, ಮಿಂಚಿ ಹೋದ ಕಾಲಕ್ಕೆ ಚಿಂತಿಸಿ ಫಲ ಇಲ್ಲ. ನಮ್ಮೆಲ್ಲರ ಎದುರಿಗೆ ಈಗ 2021ನೇ ಇಸವಿ ಇದೆ. ನಿಮ್ಮ ರಾಶಿಗಳ ಆಧಾರದಲ್ಲಿ ಹಣಕಾಸಿನ ಸ್ಥಿತಿ ಹೇಗಿರುತ್ತದೆ. ಏನು ಮಾಡಬೇಕು ಹಾಗೂ ಏನು ಮಾಡಬಾರದು ಎಂದು ತಿಳಿದುಕೊಳ್ಳಿ. ಒಂದಿಷ್ಟು ಮುಂಜಾಗ್ರತೆ ಹಾಗೂ ಕೆಲವು ವಿಷಯಗಳಲ್ಲಿ ಶೀಘ್ರ ತೀರ್ಮಾನ ಕೈಗೊಳ್ಳುವ ಮೂಲಕ ಈ ಹಿಂದಿನ ವರ್ಷದ ಹಳಹಳಿಕೆ ಬಿಟ್ಟುಬಿಡಿ.
Money and Finance Horoscope 2021: ಮೇಷದಿಂದ ಮೀನ ಯಾರಿಗೇನು?
ಈ ಹಿಂದೆ ಮೇಷದಿಂದ ಕನ್ಯಾ ತನಕ ರಾಶಿ ಭವಿಷ್ಯ ಪ್ರಕಟಿಸಲಾಗಿತ್ತು. ಇದರಲ್ಲಿ ತುಲಾದಿಂದ ಮೀನದ ತನಕ ಹಣಕಾಸು ಭವಿಷ್ಯ ತಿಳಿಯಿರಿ.
ತುಲಾ
- ಸೆಕೆಂಡ್ ವಾಹನ ಖರೀದಿ ಮಾಡುವಾಗ ನಷ್ಟ ಸಂಭವಿಸುವಂಥ ಯೋಗ ಇದೆ. ಆದ್ದರಿಂದ ಏಕಾಏಕಿ ನಿರ್ಧಾರಗಳನ್ನು ತೆಗೆದುಕೊಳ್ಳಬೇಡಿ. ಕಡಿಮೆ ಬೆಲೆಗೆ ಸಿಗುತ್ತಿದೆ ಎಂಬ ಆಮಿಷಕ್ಕೆ ಬೀಳಬೇಡಿ.
- ಸ್ನೇಹಿತರು ಹೇಳಿದರು ಎಂಬ ಕಾರಣಕ್ಕೆ ಕೆಲವು ವ್ಯವಹಾರಕ್ಕೆ, ಅದರಲ್ಲೂ ನಿಮಗೆ ಹೊಸದಾದ ವ್ಯವಹಾರಕ್ಕೆ ಕೈ ಹಾಕಿ, ಮುಂದುವರಿದಲ್ಲಿ ಹಣದ ವ್ಯವಹಾರಕ್ಕೆ ಅಡೆತಡೆ ಎದುರಾಗುತ್ತದೆ.
- ಸೈಟು, ಮನೆ, ವಾಹನ ಖರೀದಿಸುವ ಯೋಗ ಇದೆ. ಅದಕ್ಕಾಗಿ ಹೆಚ್ಚಿನ ಬಡ್ಡಿ ಕಟ್ಟಬೇಕಾಗುತ್ತದೆ.
- ವಿದೇಶದಲ್ಲಿ ಮಕ್ಕಳು ಇದ್ದಲ್ಲಿ ಅವರ ಕಡೆಯಿಂದ ಹಣ ಬರಲಿದೆ. ತುಂಬ ಅನುಕೂಲಸ್ಥ ಕುಟುಂಬದಿಂದ ವಿವಾಹ ಸಂಬಂಧಗಳು ದೊರೆಯುವ ಅವಕಾಶಗಳಿದ್ದು, ಬೆಳವಣಿಗೆಗೆ ಸಹಕಾರಿ ಆಗಲಿದೆ.
- ವ್ಯಾಪಾರ- ವ್ಯವಹಾರ ಮಾಡುತ್ತಿದ್ದಲ್ಲಿ ಈ ಹಿಂದಿನ ನಿಮ್ಮ ಶ್ರಮಕ್ಕೆ ತಕ್ಕ ಪ್ರತಿಫಲ ದೊರೆಯಲಿದೆ. ಇನ್ನು ಪಿತ್ರಾರ್ಜಿತವಾಗಿ ಬರಬಹುದು ಎಂದು ನಿರೀಕ್ಷೆ ಮಾಡಿದ್ದ ಆಸ್ತಿ- ಹಣಕಾಸು ಬರಲಿದೆ.
ವೃಶ್ಚಿಕ
- ನಿಮ್ಮ ನಂಬಿಕೆ- ವಿಶ್ವಾಸ ದುರುಪಯೋಗ ಮಾಡಿಕೊಂಡು, ಹಣದ ವಿಚಾರದಲ್ಲಿ ವಂಚನೆ ಮಾಡುವ ಸಾಧ್ಯತೆ ಇದೆ. ಸ್ನೇಹಿತರು- ಸಂಬಂಧಿಕರೇ ನಿಮ್ಮ ಹಣವನ್ನು ದುರ್ಬಳಕೆ ಮಾಡಿಕೊಳ್ಳಲಿದ್ದಾರೆ.
ನಿಮ್ಮ ಹಣದ ಹರಿವಿಗೆ ಏನೂ ಕೊರತೆ ಇರುವುದಿಲ್ಲ. ಇನ್ನು ಕುಟುಂಬದಲ್ಲಿ ಧಾರ್ಮಿಕ ಸಮಾರಂಭಗಳಿಗೆ, ಮದುವೆ ಮೊದಲಾದ ಕಾರ್ಯಕ್ರಮಗಳಿಗೆ ಹೆಚ್ಚಿನ ಖರ್ಚಾಗಲಿದೆ.
ಆಸ್ತಿ ಬರಬಹುದು ಎಂಬ ಕಾರಣಕ್ಕೆ ಕಾನೂನು ಹೋರಾಟದಲ್ಲಿ ತೊಡಗಿಕೊಂಡು, ಅದಕ್ಕಾಗಿ ಹಣ ಖರ್ಚಾಗಲಿದೆ. ಈ ವಿಚಾರದಲ್ಲಿ ನಿಮಗೆ ಸಂಪೂರ್ಣ ಲಾಭ ಆಗುವುದಿಲ್ಲ.- ಖರ್ಚು ಮಾಡಿದ್ದಕ್ಕೆ ತಕ್ಕಂತೆ ಪ್ರತಿಫಲ ದೊರೆಯುವುದಿಲ್ಲ. ವಿದೇಶ ಪ್ರಯಾಣದಲ್ಲಿ ಸ್ವಲ್ಪ ಹಿನ್ನಡೆಯಾಗಿ, ನೀವು ನಿರೀಕ್ಷೆ ಮಾಡಿದ್ದ ಆದಾಯವು ಅಂದುಕೊಳ್ಳಂತೆ ಬರುವುದಿಲ್ಲ.
- ಸೋದರ- ಸೋದರಿಯರ ಮಕ್ಕಳ ವಿವಾಹ ಅಥವಾ ಮತ್ಯಾವುದಾದರೂ ಕಾರಣಕ್ಕೆ ಆಸ್ತಿಯನ್ನು ಮಾರಿ ಅಥವಾ ಉಳಿತಾಯದ ಹಣವನ್ನು ತೆಗೆದು, ಕೊಡಬೇಕಾಗುತ್ತದೆ. ಹೊಸ ಜವಾಬ್ದಾರಿಗಳನ್ನು ಮೈ ಮೇಲೆ ಎಳೆದುಕೊಳ್ಳಬೇಡಿ.
ಧನುಸ್ಸು
- ನಿಮ್ಮ ಮಾತಿನಿಂದಲೇ ದೊಡ್ಡ ಮೊತ್ತದ ಹಣವನ್ನು ಕೈಯಿಂದ ಕಳೆದುಕೊಳ್ಳಲಿದ್ದೀರಿ ಅಥವಾ ನಿಮ್ಮ ಪಾಲಿಗೆ ಬರಬೇಕಾದ ಹಣವು ಬೇರೆಯವರ ಪಾಲಾಗಲಿದೆ.
- ಭೂಮಿ ವ್ಯವಹಾರ ಮಾಡುವಾಗ ಲೆಕ್ಕಾಚಾರದಿಂದ ಮಾಡಿ. ಕುಟುಂಬ ಸದಸ್ಯರನ್ನು ನಂಬಿಕೊಂಡು, ಅವರಿಗೆ ಈ ಜವಾಬ್ದಾರಿಯನ್ನು ವಹಿಸದಿರಿ.
- ನಿಮ್ಮ ಆರೋಗ್ಯ ಸಮಸ್ಯೆಗಳಿಗೆ ಅಥವಾ ತಂದೆಯ ಆರೋಗ್ಯ ಸಮಸ್ಯೆಗಳಿಗೆ ಸೂಕ್ತ ಚಿಕಿತ್ಸೆಯನ್ನು ಪಡೆದುಕೊಳ್ಳುವುದಕ್ಕೆ ಹೆಚ್ಚಿನ ಖರ್ಚು ಆಗಲಿದೆ.
- ನಿಮಗೆ ಆಗಬೇಕಾದ ಬಡ್ತಿ ಅಥವಾ ವೇತನ ಹೆಚ್ಚಳವನ್ನು ಮೇಲಧಿಕಾರಿಗಳು ತಡೆ ಹಿಡಿಯಲಿದ್ದಾರೆ. ವಿದೇಶದಲ್ಲಿ ಉದ್ಯೋಗಕ್ಕೆ ಪ್ರಯತ್ನಿಸುತ್ತಿದ್ದಲ್ಲಿ ಸ್ವಲ್ಪ ಸಮಯ ಆ ಪ್ರಯತ್ನವನ್ನು ನಿಲ್ಲಿಸುವುದು ಉತ್ತಮ.
- ಇನ್ನು ಹೊಸಬರ ಜತೆಗಿನ ವ್ಯವಹಾರವಂತೂ ಬಿಲ್ ಕುಲ್ ಬೇಡ. ಚೀಟಿ ವ್ಯವಹಾರದಿಂದ ದೂರವೇ ಇದ್ದುಬಿಡಿ.
ಮಕರ
ಹಣಕಾಸು ವಿಚಾರದಲ್ಲಿ ಮಿಶ್ರ ಫಲ ಅನುಭವಿಸಲಿದ್ದೀರಿ. ಪಿತ್ರಾರ್ಜಿತ ಆಸ್ತಿ ಮಾರಾಟದಿಂದ ಹಣ ಬರಲಿದೆ. ಆದರೆ ಅದು ನಿಮ್ಮ ಅಗತ್ಯಕ್ಕೆ ಹಾಗೂ ಸಮಯಕ್ಕೆ ಸಿಗುತ್ತದೆಯೇ ಎಂದು ಹೇಳುವುದು ಕಷ್ಟ.
ಹಣದ ವಿಚಾರಕ್ಕೇ ಬಂಧುಗಳು, ಸ್ನೇಹಿತರಿಂದ ಅವಮಾನಕ್ಕೆ ಗುರಿ ಆಗಲಿದ್ದೀರಿ. ಏಕಾಗ್ರತೆ ಕಳೆದುಕೊಳ್ಳದೆ ಮಕ್ಕಳ ಶಿಕ್ಷಣ, ಆರೋಗ್ಯಕ್ಕೆ ಅಗತ್ಯ ಇರುವ ಹಣವನ್ನು ಹೊಂದಿಸುವ ಕಡೆಗೆ ಗಮನ ನೀಡಿ.
ಇನ್ನು ವರ್ಷದ ಆರು ತಿಂಗಳು ಆದಾಯ ಹೆಚ್ಚಳ ಆಗಿ ಅಥವಾ ಯಾವುದಾದರೂ ಮೂಲದಿಂದ ಹಣ ಬಂದಲ್ಲಿ ಅದನ್ನು ಕೂಡಿಡುವ ಕಡೆಗೆ ಗಮನ ನೀಡಿ. ತಕ್ಷಣಕ್ಕೆ ಹೂಡಿಕೆ, ಲಾಭ ಎಂದು ಆಲೋಚಿಸದಿರಿ.
ನಿಮಗಿಂತ ಹಿರಿಯರು ಹೇಳುವ ಸಲಹೆಗಳನ್ನು ಕೇಳಿಸಿಕೊಂಡು, ಭವಿಷ್ಯದ ಭದ್ರತೆಗೆ ಹಣಕಾಸಿನ ಯೋಜನೆ ರೂಪಿಸಿ.
ಇನ್ನು ಉದ್ಯೋಗಸ್ಥರು ಕೆಲಸವನ್ನು ಬಿಟ್ಟು, ಹೊಸ ವ್ಯಾಪಾರ- ವ್ಯವಹಾರ ಎಂದು ಆರಂಭಿಸಿದಲ್ಲಿ ಕೈ ಸುಟ್ಟುಕೊಳ್ಳುವ ಸಾಧ್ಯತೆ ಇದೆ. ಬಡ್ಡಿ ವ್ಯವಹಾರಕ್ಕಂತೂ ಕೈ ಹಾಕಲೇಬೇಡಿ. ಇನ್ನು ವೇತನ ಹೆಚ್ಚಳ ನಿರೀಕ್ಷಿತ ಪ್ರಮಾಣದಲ್ಲಿ ಇರುವುದಿಲ್ಲ.
ಕುಂಭ
- ವಾಹನ ಖರೀದಿ, ಆರೋಗ್ಯ ಹಾಗೂ ಪ್ರಯಾಣದಲ್ಲಿ ಸಮಸ್ಯೆಗಳಾಗಿ ಹಣವನ್ನು ಕೈಯಿಂದ ವಿಪರೀತ ಖರ್ಚು ಮಾಡಲಿದ್ದೀರಿ. ತಾಯಿಯ ಆರೋಗ್ಯಕ್ಕಾಗಿ ಜಾಸ್ತಿ ಖರ್ಚಾಗಲಿದೆ.
- ಮಧುಮೇಹ ಮತ್ತಿತರ ಸಮಸ್ಯೆಗಳನ್ನು ಎದುರಿಸುತ್ತಿರುವವರಿಗೆ ಶಸ್ತ್ರಚಿಕಿತ್ಸೆ ಮಾಡಿಸಿಕೊಳ್ಳುವುದು ಅನಿವಾರ್ಯ ಆಗಿ, ಅದಕ್ಕಾಗಿ ಹಣವನ್ನು ಸಾಲ ಮಾಡಬೇಕಾಗಿ ಬರಬಹುದು.
- ಕ್ರೆಡಿಟ್ ಕಾರ್ಡ್ ಬಳಸುತ್ತಿರುವವರು, ಆನ್ ಲೈನ್ ವ್ಯವಹಾರ ಮಾಡುವವರು ಎಚ್ಚರಿಕೆಯಿಂದ ಇರಬೇಕು. ಏಕೆಂದರೆ ನಿಮಗೆ ವಂಚನೆ ಆಗುವ ಸಾಧ್ಯತೆ ಇದೆ.
- ಏಪ್ರಿಲ್ ನಿಂದ ಸೆಪ್ಟೆಂಬರ್ ಮಧ್ಯೆ ಹಾಗೂ ನವೆಂಬರ್ ಮತ್ತು ಡಿಸೆಂಬರ್ ನಲ್ಲಿ ನೀವು ಬಳಸುವ ಗ್ಯಾಜೆಟ್, ಲ್ಯಾಪ್ ಟಾಪ್, ಎಟಿಎಂ ಕಾರ್ಡ್, ಕ್ರೆಡಿಟ್ ಕಾರ್ಡ್ ಇತ್ಯಾದಿಗಳನ್ನು ಜೋಪಾನವಾಗಿ ನೋಡಿಕೊಳ್ಳಿ.
- ದೂರ ಪ್ರಯಾಣ ಮಾಡುವ ವೇಳೆ ಬೆಲೆ ಬಾಳುವ ವಸ್ತುಗಳನ್ನು ತೆಗೆದುಕೊಂಡು ಹೋಗಬೇಡಿ. ಸಂಬಂಧಿಕರ ಮನೆಗಳಿಗೆ ತೆರಳುವಾಗ ಸಾಧ್ಯವಾದಷ್ಟು ಒಡವೆಗಳನ್ನು ಹಾಕಿಕೊಳ್ಳದಿರುವುದು ಉತ್ತಮ.
ಮೀನ
- ವ್ಯಾಪಾರ- ವ್ಯವಹಾರ ಮಾಡುವವರಿಗೆ ದೊಡ್ಡ ಲಾಭದ ಅವಕಾಶಗಳು ದೊರೆಯುತ್ತವೆ. ಆದರೆ ಅದು ದೊರೆಯುವುದು ಸ್ವಲ್ಪ ಮಟ್ಟಿಗೆ ನಿಧಾನವಾಗುತ್ತದೆ.
- ಪ್ರಭಾವಿ ವ್ಯಕ್ತಿಗಳ ಪರಿಚಯದಿಂದ ನಿಮ್ಮ ವ್ಯಾಪಾರಕ್ಕೆ ಅನುಕೂಲ ಒದಗಿಬರುತ್ತದೆ. ವಾಹನ ಖರೀದಿ, ಮನೆ, ಸೈಟು ಖರೀದಿ ಇತ್ಯಾದಿ ಶುಭ ಫಲಗಳನ್ನು ನೀವು ಕಾಣಲಿದ್ದೀರಿ.
- ನಿಮ್ಮ ಹಾಗೂ ಕುಟುಂಬದವರ ಆರೋಗ್ಯದ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸಿದಲ್ಲಿ ಖರ್ಚು ಕಡಿಮೆ ಮಾಡಿಕೊಳ್ಳಬಹುದು.
- ನಿಮ್ಮಲ್ಲಿ ಕೆಲವರು ಹೊಸ ಕಂಪೆನಿ ಅಥವಾ ಸಂಸ್ಥೆಗಳನ್ನು ಆರಂಭಿಸುವ ಯೋಗ ಇದೆ. ಉದ್ಯೋಗ ಸ್ಥಳದಲ್ಲಿ ಮೇಲಧಿಕಾರಿಗಳ ಪ್ರಶಂಸೆ ದೊರೆಯಲಿದೆ. ಇದರ ಜತೆಗೆ ವಿದೇಶ ಪ್ರಯಾಣದ ಅವಕಾಶಗಳು ಕೂಡ ದೊರೆಯಲಿವೆ.
- ಚಿತ್ರರಂಗದಲ್ಲಿ ನಟರಾಗಿರುವವರಿಗೆ ಅತಿ ದೊಡ್ಡ ಅವಕಾಶ ದೊರೆಯಲಿದೆ. ಸಂಭಾವನೆಯಲ್ಲಿ ಭಾರೀ ಏರಿಕೆ ಕೂಡ ಆಗಲಿದೆ. ಸಂಗಾತಿಯ ಬೆಂಬಲದ ಮೂಲಕ ಆರಂಭಿಸಿದ ವ್ಯವಹಾರ ಸ್ವಲ್ಪ ನಿಧಾನವಾಗಿಯಾದರೂ ಫಲ ನೀಡಲು ಆರಂಭವಾಗುತ್ತದೆ.