PAN- ಆಧಾರ್ ಜೋಡಣೆ ಡಿಸೆಂಬರ್ 31ಕ್ಕೆ ಆಗದಿದ್ದಲ್ಲಿ ಮುಂದೇನು?

ಏಳು ಬಾರಿ ಗಡುವು ವಿಸ್ತರಣೆ ಆದ ನಂತರ ಇದೀಗ ಡಿಸೆಂಬರ್ ಮೂವತ್ತೊಂದನೇ ತಾರೀಕಿಗೆ ಪ್ಯಾನ್ ಕಾರ್ಡ್ ಹಾಗೂ ಅಧಾರ್ ಜೋಡಣೆಗೆ ಮತ್ತೊಂದು ಅಂತಿಮ ಅವಕಾಶ ನೀಡಲಾಗಿದೆ. ಒಂದು ವೇಳೆ ಆದಾಯ ತೆರಿಗೆ ಇಲಾಖೆ ಮತ್ತೊಂದು ಅವಕಾಶ ನೀಡದಿದ್ದಲ್ಲಿ 2019ನೇ ಇಸವಿಯ ಕ್ಯಾಲೆಂಡರ್ ಬದಲಾಗುವುದರೊಳಗೆ ಕಡ್ಡಾಯವಾಗಿ ಈ ಎರಡು ದಾಖಲೆಗಳನ್ನು ಜೋಡಣೆ ಮಾಡಲೇಬೇಕಾಗುತ್ತದೆ.

ಒಂದು ವೇಳೆ ಈ ಗಡುವು ಮೀರಿದರೆ ನಿಮ್ಮ ಪ್ಯಾನ್ ಕಾರ್ಡ್ 2020ನೇ ಇಸವಿಯಿಂದ "ಕಾರ್ಯ ನಿರ್ವಹಿಸುವುದಿಲ್ಲ". ಕಳೆದ ವಾರವಷ್ಟೇ ಆದಾಯ ತೆರಿಗೆ ಇಲಾಖೆಯಿಂದ ಒಂದು ಟ್ವೀಟ್ ಮಾಡಿದ್ದು, ಅಂತಿಮ ಗಡುವನ್ನು ನೆನಪಿಸಿದ್ದು, ಒಂದು ವೇಳೆ ಆಧಾರ್- ಪ್ಯಾನ್ ಕಾರ್ಡ್ ಜೋಡಣೆ ಆಗದಿದ್ದಲ್ಲಿ ನಿಮ್ಮ ಪ್ಯಾನ್ ಕಾರ್ಡ್ 'ಕಾರ್ಯ ನಿರ್ವಹಿಸದಂತೆ' ಮಾಡಬಹುದು ಎನ್ನಲಾಗಿದೆ.

'ಕಾರ್ಯ ನಿರ್ವಹಿಸದ' ಎಂಬ ಪದದ ಸರಿಯಾದ ಅರ್ಥ ಏನು ಎಂಬ ಸ್ಪಷ್ಟನೆಯಿಲ್ಲ. ಜೋಡಣೆ ಆಗದಿರುವ ಪ್ಯಾನ್ ಕಾರ್ಡ್ ಗಳು ಜನವರಿಯಿಂದ ಕಾರ್ಯ ನಿರ್ವಹಿಸುವುದಿಲ್ಲ ಎಂಬ ಅರ್ಥವೇ ಬರುವಂತಿದೆ. ಇಲ್ಲಿ ಇನ್ನೊಂದು ಮಾತು. ಮತ್ತೆ ಪ್ಯಾನ್ ಕಾರ್ಡ್ ಜತೆ ಆಧಾರ್ ಜೋಡಣೆಯಾದ ಮೇಲೆ ಕಾರ್ಯ ನಿರ್ವಹಿಸುತ್ತದೆ.

ಅನಿವಾಸಿ ಭಾರತೀಯರಿಗೆ ಕೂಡ ಆಧಾರ್- ಪ್ಯಾನ್ ಜೋಡಣೆ ಕಡ್ಡಾಯ ಎಂಬುದನ್ನು ವರದಿಗಳು ತಿಳಿಸುತ್ತಿವೆ. ಆದಾಯ ತೆರಿಗೆ ವ್ಯಾಪ್ತಿಯೊಳಗೆ ಬರುವ ಆದಾಯವನ್ನು ಭಾರತದಲ್ಲಿ ಹೊಂದಿದ್ದರೆ ಅಥವಾ ದೇಶದಲ್ಲಿ ಹೂಡಿಕೆ ಮಾಡುವುದಕ್ಕೆ ಪ್ಯಾನ್ ಕಾರ್ಡ್ ಕಡ್ಡಾಯ.