RBI loan: RBI ಹೊಸ ನಿರ್ಧಾರ: ಷೇರುಗಳ ಮೇಲೆ ಸಾಲ 1 ಕೋಟಿ, IPO ಹಣಕಾಸು 25 ಲಕ್ಷಕ್ಕೆ ಏರಿಕೆ!

ಹೂಡಿಕೆದಾರರಿಗೆ ಕ್ರೆಡಿಟ್ ಪಡೆಯುವ ಅವಕಾಶವನ್ನು ವಿಸ್ತರಿಸುವ ನಿಟ್ಟಿನಲ್ಲಿ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಪ್ರಮುಖ ನಿರ್ಧಾರ ತೆಗೆದುಕೊಂಡಿದೆ. 2025ರ ಅಕ್ಟೋಬರ್ 1ರಿಂದ ಷೇರುಗಳನ್ನು ಅಡವಿಟ್ಟು ಪಡೆಯಬಹುದಾದ ಸಾಲದ ಗರಿಷ್ಠ ಮಿತಿ ₹20 ಲಕ್ಷದಿಂದ ನೇರವಾಗಿ ₹1 ಕೋಟಿವರೆಗೆ ಏರಿಕೆಯಾಗಿದೆ. ಅದೇ ರೀತಿ IPO ಗಳಿಗೆ ಹಣಕಾಸು ಪಡೆಯುವ ಮಿತಿಯನ್ನು ಸಹ ₹10 ಲಕ್ಷದಿಂದ ₹25 ಲಕ್ಷಕ್ಕೆ ಹೆಚ್ಚಿಸಲಾಗಿದೆ.

ಷೇರುಗಳನ್ನು ಅಡವಿಡಿ..ಮಾರಾಟ ಮಾಡದೆ ಸಾಲ ಪಡೆಯಿರಿ:

ಹೂಡಿಕೆದಾರರಿಗೆ ತಮ್ಮ ಷೇರುಗಳು, ಮ್ಯೂಚುವಲ್ ಫಂಡ್‌ಗಳು ಅಥವಾ ಇತರ ಭದ್ರತೆಗಳನ್ನು ಬ್ಯಾಂಕ್ ಅಥವಾ ಬ್ರೋಕರ್‌ಗಳ ಬಳಿ ಅಡವಿಟ್ಟು ಸಾಲ ಪಡೆಯುವ ಅವಕಾಶ ಈಗ ಹೆಚ್ಚು ಸುಲಭವಾಗಿದೆ. ಇದರಿಂದ ತಮ್ಮ ಹೂಡಿಕೆಗಳನ್ನು ಮಾರದೆ ತುರ್ತು ಅವಶ್ಯಕತೆಗಳಿಗೆ ಹಣವನ್ನು ಪಡೆಯಬಹುದು. ಸಾಮಾನ್ಯವಾಗಿ ಈ ರೀತಿಯ ಸಾಲಗಳಿಗೆ ವೈಯಕ್ತಿಕ ಸಾಲಕ್ಕಿಂತ ಕಡಿಮೆ ಬಡ್ಡಿದರ ಅನ್ವಯವಾಗುತ್ತದೆ.

ಹೊಸ ಮಿತಿಯಿಂದ ಏನು ಲಾಭ?

ಹಿಂದಿನಂತೆ ₹20 ಲಕ್ಷವರೆಗೆ ಮಾತ್ರ ಸಾಲ ದೊರೆಯುತ್ತಿದ್ದರೆ, ಈಗ ಬ್ಯಾಂಕುಗಳ ನಿಯಮಗಳಿಗೆ ಅನುಗುಣವಾಗಿ ₹1 ಕೋಟಿವರೆಗೆ ಪಡೆಯಬಹುದು. ಉದಾಹರಣೆಗೆ, ಯಾರಾದರೂ ₹50 ಲಕ್ಷ ಮೌಲ್ಯದ ಷೇರುಗಳನ್ನು ಹೊಂದಿದ್ದರೆ, ಅವರು ಈಗ ತಮ್ಮ ಪೋರ್ಟ್‌ಫೋಲಿಯೊ ಮಾರದೆ ಹೆಚ್ಚಿನ ಹಣವನ್ನು ಪಡೆಯಬಹುದು. ಇದು ಶಿಕ್ಷಣ, ವೈದ್ಯಕೀಯ ವೆಚ್ಚಗಳು ಅಥವಾ ಹೊಸ ವ್ಯವಹಾರಗಳಿಗೆ ನೆರವಾಗಬಹುದು.

IPO ಹೂಡಿಕೆಗೂ ಹೆಚ್ಚು ಅವಕಾಶ:

IPO ಗಳಲ್ಲಿ ಪಾಲ್ಗೊಳ್ಳಲು ಹೆಚ್ಚುವರಿ ಹಣದ ಅಗತ್ಯವಿರುತ್ತದೆ. ಹಿಂದಿನ ಮಿತಿಯಲ್ಲಿ ಕೇವಲ ₹10 ಲಕ್ಷವರೆಗೆ ಮಾತ್ರ ಸಾಲ ಪಡೆಯಲು ಸಾಧ್ಯವಾಗುತ್ತಿತ್ತು. ಆದರೆ ಈಗ ₹25 ಲಕ್ಷದವರೆಗೆ ಹಣಕಾಸು ದೊರೆಯಲಿದೆ. ಇದರಿಂದ ಹೂಡಿಕೆದಾರರು ತಮ್ಮ ಇತರ ಹೂಡಿಕೆಗಳನ್ನು ಮಾರದೆ, ಹೊಸ ಕಂಪನಿಗಳ ಷೇರು ಖರೀದಿಗೆ ಹೆಚ್ಚಿನ ಮಟ್ಟದಲ್ಲಿ ಪಾಲ್ಗೊಳ್ಳಬಹುದು.

ಡೆಟ್ ಸೆಕ್ಯುರಿಟಿಗಳ ಮೇಲೂ ನಿರ್ಬಂಧ ವಿಲೇವಾರಿ:

ಷೇರುಗಳಷ್ಟೇ ಅಲ್ಲ, ಕಾರ್ಪೊರೇಟ್ ಬಾಂಡ್‌ಗಳು, ಸರ್ಕಾರಿ ಸೆಕ್ಯುರಿಟಿಗಳು, ಡಿಬೆಂಚರ್‌ಗಳಂತಹ ಲಿಸ್ಟೆಡ್ ಡೆಟ್ ಸೆಕ್ಯುರಿಟಿಗಳ ಮೇಲಿನ ಸಾಲ ಮಿತಿಯ ನಿರ್ಬಂಧವನ್ನೂ RBI ತೆಗೆದುಹಾಕಿದೆ. ಇದರಿಂದ ಹೂಡಿಕೆದಾರರಿಗೆ ಸಾಲ ಪಡೆಯಲು ಇನ್ನಷ್ಟು ಮಾರ್ಗಗಳು ಲಭ್ಯವಾಗಲಿವೆ.

ಎಚ್ಚರಿಕೆ ಅಗತ್ಯವಿದೆ:

ಷೇರುಗಳನ್ನು ಅಡವಿಟ್ಟು ಸಾಲ ಪಡೆಯುವುದು ಸುಲಭವಾದರೂ, ಇದರಲ್ಲಿ ಅಪಾಯಗಳೂ ಇವೆ. ಅಡವಿಟ್ಟ ಷೇರುಗಳ ಮೌಲ್ಯ ಕುಸಿದರೆ, ಬ್ಯಾಂಕುಗಳು ಹೆಚ್ಚುವರಿ ಭದ್ರತೆಯನ್ನು ಕೇಳಬಹುದು ಅಥವಾ ಬಲವಂತವಾಗಿ ಮಾರಾಟ ಮಾಡಬಹುದು. ಹಾಗೆಯೇ ಬಡ್ಡಿ ದರ ಹಾಗೂ ಶುಲ್ಕಗಳನ್ನು ಗಮನಿಸದೆ ಹೆಚ್ಚಿನ ಸಾಲ ತೆಗೆದುಕೊಳ್ಳುವುದು ಭಾರವಾಗಬಹುದು. IPO ಗಳಲ್ಲಿ ಹೂಡಿಕೆ ಮಾಡಿದಾಗ ಷೇರುಗಳ ಹಂಚಿಕೆ ಸಿಗದಿದ್ದರೂ ಅಥವಾ ಮೌಲ್ಯ ಕುಸಿದರೂ ಸಾಲವನ್ನು ಬಡ್ಡಿಯೊಂದಿಗೆ ಮರುಪಾವತಿಸಲೇಬೇಕು.

ಹೊಸ ನಿಯಮಗಳ ಪ್ರಕಾರ ಹೆಚ್ಚಿನ ಹಣಕಾಸು ಸಿಗುತ್ತಿದ್ದರೂ ಅದನ್ನು ಅತಿ ಜಾಗರೂಕತೆಯಿಂದ ಬಳಸುವುದು ಮುಖ್ಯ. ತುರ್ತು ಅವಶ್ಯಕತೆಗಳಿಗಾಗಿ ಅಥವಾ ವಿಶ್ವಾಸಾರ್ಹ ಹೂಡಿಕೆಗಳಿಗಾಗಿ ಮಾತ್ರ ಈ ಸಾಲವನ್ನು ಬಳಸುವುದು ಒಳಿತು. ಬ್ಯಾಂಕ್‌ಗಳು ಹಾಗೂ ಬ್ರೋಕರ್‌ಗಳ ನಿಯಮ, ಬಡ್ಡಿದರ, ಮಾರ್ಜಿನ್ ನಿಯಮಗಳನ್ನು ಚೆನ್ನಾಗಿ ತಿಳಿದುಕೊಂಡು ನಂತರವೇ ನಿರ್ಧಾರ ತೆಗೆದುಕೊಳ್ಳಬೇಕು.

(Disclaimer: The views and recommendations expressed are solely those of the individual analysts or entities and do not reflect the views of Goodreturns.in or Greynium Information Technologies Private Limited (together referred as "we"). We do not guarantee, endorse or take responsibility for the accuracy, completeness or reliability of any content, nor do we provide any investment advice or solicit the purchase or sale of securities. All information is provided for informational and educational purposes only and should be independently verified from licensed financial advisors before making any investment decisions.)