ಪರ್ಸನಲ್ ಲೋನ್ ಬಗ್ಗೆ ವೇತನದಾರರಿಗೆ SBIನಿಂದ ಮಹತ್ವದ ಮಾಹಿತಿ

ಸದ್ಯಕ್ಕೆ YONO ಅಪ್ಲಿಕೇಷನ್ ಮೂಲಕ ಯಾವುದೇ ತುರ್ತು ಸಾಲವನ್ನು ನೀಡುತ್ತಿಲ್ಲ ಎಂದು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಸ್ಪಷ್ಟನೆ ನೀಡಿದೆ. ಇನ್ನು ಶೀಘ್ರದಲ್ಲೇ ವೇತನದಾರರಿಗಾಗಿ YONO ಅಪ್ಲಿಕೇಷನ್ ಮೂಲಕ ಪ್ರೀ ಅಪ್ರೂವ್ಡ್ ಪರ್ಸನಲ್ ಲೋನ್ ನೀಡುವ ಯೋಜನೆ ಪರಿಚಯಿಸಲಾಗುವುದು ಎಂದು ಬ್ಯಾಂಕ್ ತಿಳಿಸಿದೆ. ಕೊರೊನಾವೈರಸ್ ಬಿಕ್ಕಟ್ಟಿನಿಂದಾಗಿ ನಗದು ಸಮಸ್ಯೆ ಎದುರಿಸುತ್ತಿರುವವರಿಗೆ ಈ ಯೋಜನೆ ಪರಿಚಯಿಸಲಾಗುವುದು.

YONO ಅಪ್ಲಿಕೇಷನ್ ಮೂಲಕವಾಗಿ SBIನಿಂದ ತುರ್ತು ಸಾಲ ಯೋಜನೆ ಪರಿಚಯಿಸಲಾಗಿದೆ ಎಂಬ ಸುದ್ದಿ ವ್ಯಾಪಕವಾಗಿ ಹರಿದಾಡುತ್ತಿದೆ. ಆದರೆ ಅಂಥ ಯಾವ ಸಾಲವನ್ನು ಬ್ಯಾಂಕ್ ನೀಡುತ್ತಿಲ್ಲ ಎಂದು ಸ್ಪಷ್ಟಪಡಿಸುತ್ತೇವೆ. ಜತೆಗೆ ಗ್ರಾಹಕರು ಇಂಥ ಯಾವ ವದಂತಿಯನ್ನೂ ನಂಬಬಾರದು ಎಂದು ಮನವಿ ಮಾಡುತ್ತೇವೆ ಎಂದು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾವು ಹೇಳಿಕೆಯಲ್ಲಿ ತಿಳಿಸಿದೆ.

ಕೊರೊನಾವೈರಸ್ ನಿಂದಾಗಿ ನಗದು ಸಮಸ್ಯೆ ಎದುರಿಸುತ್ತಿರುವ, ಎಸ್ ಬಿಐ ಗ್ರಾಹಕರಾಗಿರುವ ವೇತನದಾರರಿಗೆ YONO ಅಪ್ಲಿಕೇಷನ್ ಮೂಲಕ ಪ್ರೀ ಅಪ್ರೂವ್ಡ್ ಪರ್ಸನಲ್ ಲೋನ್ ಒದಗಿಸುವ ಯೋಜನೆ ಶೀಘ್ರದಲ್ಲಿಯೇ ಆರಂಭಿಸುತ್ತೇವೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಇನ್ನು ಹೊಸ ಯೋಜನೆ ಜಾರಿಗೆ ಬಂದ ಮೇಲೆ ಎಲ್ಲರಿಗೂ ಮಾಹಿತಿ ನೀಡುವುದಾಗಿ ಕೂಡ ತಿಳಿಸಿದೆ.