ಈ ಬ್ಯಾಂಕ್ ಗಳಲ್ಲಿ SB ಬಡ್ಡಿದರವೇ ಉಳಿದ ಬ್ಯಾಂಕ್ FD ಬಡ್ಡಿಗಿಂತ ಹೆಚ್ಚು

ಉಳಿತಾಯ ಖಾತೆಯಲ್ಲಿ ಹೆಚ್ಚು ಹಣ ಇಡುವುದು ಬುದ್ಧಿವಂತಿಕೆ ಅಲ್ಲ ಎನ್ನುವುದು ಜನಪ್ರಿಯ ವಾದ. ಆದರೆ ಅದು ಸುಳ್ಳು. ಒಳ್ಳೆ ಬಡ್ಡಿಯ ಜತೆಗೆ ಉಳಿತಾಯ ಖಾತೆಯ ಮೂಲಕ ಗಳಿಸುವ ಹತ್ತು ಸಾವಿರ ರುಪಾಯಿ ತನಕದ ಬಡ್ಡಿಗೆ ತೆರಿಗೆ ವಿನಾಯಿತಿ ಕೂಡ ಇದೆ. ಈ ಲೇಖನದಲ್ಲಿ ಕೆಲವು ಬ್ಯಾಂಕ್ ಗಳ ವಿವರ ನೀಡಿದ್ದು, ಉಳಿತಾಯ ಖಾತೆ ಮೇಲೆ ಹೆಚ್ಚಿನ ಬಡ್ಡಿ ಸಿಗುತ್ತದೆ.

ಐಡಿಎಫ್ ಸಿ ಫಸ್ಟ್ ಬ್ಯಾಂಕ್
1 ಲಕ್ಷ ಮೇಲ್ಪಟ್ಟು 1 ಕೋಟಿ ರುಪಾಯಿ ತನಕ IDFC ಫಸ್ಟ್ ಬ್ಯಾಂಕ್ ನಿಂದ 7 ಪರ್ಸೆಂಟ್ ಬಡ್ಡಿ ನೀಡಲಾಗುತ್ತದೆ. ಬ್ಯಾಂಕ್ ಬ್ಯಾಲೆನ್ಸ್ ಒಂದು ಲಕ್ಷಕ್ಕಿಂತ ಕಡಿಮೆಯಾದರೆ 6 ಪರ್ಸೆಂಟ್ ಬಡ್ಡಿ ನೀಡಲಾಗುತ್ತದೆ. ಬೇರೆ ವಾಣಿಜ್ಯ ಬ್ಯಾಂಕ್ ಗಳ ಫಿಕ್ಸೆಡ್ ಡೆಪಾಸಿಟ್ ಗೆ ಹೋಲಿಸಿದರೂ ಇದು ತುಂಬ ಒಳ್ಳೆ ದರ. ಈ ಉಳಿತಾಯ ಖಾತೆ ಜತೆಗೆ ವೀಸಾ ಡೆಬಿಟ್ ಕಾರ್ಡ್, ಏರ್ ಪೋರ್ಟ್ ಗಳ ಲಾಂಜ್ ಗಳಲ್ಲಿ ಉಚಿತ ಸಂಪರ್ಕ, ತ್ರೈಮಾಸಿಕವಾಗಿ ಹಾಗೂ ಕನಿಷ್ಠ ಮತ್ತು ಪಾರದರ್ಶಕ ಶುಲ್ಕ ವಿಧಿಸಲಾಗುತ್ತದೆ. ಜತೆಗೆ ಯಾವುದೇ ಬ್ಯಾಂಕ್ ನೆಟ್ ವರ್ಕ್ ನ ಉಚಿತ ಎಟಿಎಂ ವ್ಯವಹಾರ ಮಾಡಬಹುದು.

ಯೆಸ್ ಬ್ಯಾಂಕ್
ಯೆಸ್ ಬ್ಯಾಂಕ್ ನಿಂದ ಉಳಿತಾಯ ಖಾತೆಗೆ ವಾರ್ಷಿಕ ಶೇಕಡಾ 6 ಬಡ್ಡಿ ನೀಡಲಾಗುತ್ತದೆ. ಆದರೆ ಖಾತೆಯಲ್ಲಿ 1 ಲಕ್ಷ ಮತ್ತು ಅದಕ್ಕಿಂತ ಹೆಚ್ಚು ಮೊತ್ತ ಇರಬೇಕು. ಅಂದ ಹಾಗೆ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದಿಂದ ಫಿಕ್ಸೆಡ್ ಡೆಪಾಸಿಟ್ ಮೇಲೆ ವಾರ್ಷಿಕ ಶೇ 6.5 ಬಡ್ಡಿದರ ಇದೆ. 10,000 ರುಪಾಯಿ ತನಕದ ಬಡ್ಡಿಯ ಆದಾಯಕ್ಕೆ ಯಾವುದೇ ತೆರಿಗೆ ಇಲ್ಲ. 1 ಕೋಟಿಗೂ ಹೆಚ್ಚು ಬ್ಯಾಂಕ್ ಬ್ಯಾಲೆನ್ಸ್ ಇದ್ದರೆ 6.25 ಪರ್ಸೆಂಟ್ ಬಡ್ಡಿ ನೀಡಲಾಗುತ್ತದೆ. 1 ಲಕ್ಷಕ್ಕಿಂತ ಕಡಿಮೆ ಬ್ಯಾಲೆನ್ಸ್ ಇದ್ದಲ್ಲಿ 5 ಪರ್ಸೆಂಟ್ ಬಡ್ಡಿ ನೀಡಲಾಗುತ್ತದೆ. ಅದೇ ಸರ್ಕಾರಿ ಸ್ವಾಮ್ಯದ ಇತರ ಬ್ಯಾಂಕ್ ಗಳಲ್ಲಿ ಉಳಿತಾಯ ಖಾತೆಗೆ ನೀಡುವುದು ವಾರ್ಷಿಕ ಶೇ 3.5ರಷ್ಟು ಬಡ್ಡಿ ಮಾತ್ರ.

ಇಂಡಸ್ ಇಂಡ್ ಬ್ಯಾಂಕ್
ನಿತ್ಯದ ಬ್ಯಾಲೆನ್ಸ್ 1 ಲಕ್ಷದ ತನಕ ಇದ್ದಲ್ಲಿ ಶೇ 4 ಬಡ್ಡಿ ದೊರೆಯುತ್ತದೆ. ನಿತ್ಯದ ಬ್ಯಾಲೆನ್ಸ್ 1 ಲಕ್ಷದಿಂದ 10 ಲಕ್ಷದ ಮಧ್ಯೆ ಇದ್ದರೆ 5 ಪರ್ಸೆಂಟ್ ಬಡ್ಡಿ ನೀಡಲಾಗುತ್ತದೆ. 10 ಲಕ್ಷಕ್ಕೂ ಹೆಚ್ಚು ಬ್ಯಾಲೆನ್ಸ್ ಇದ್ದರೆ 6 ಪರ್ಸೆಂಟ್ ಬಡ್ಡಿ ಸಿಗುತ್ತದೆ. ಹಾಗೆ ನೋಡಿದರೆ ಇಂಡಸ್ ಇಂಡ್ ಬ್ಯಾಂಕ್ ಹಾಗೂ ಯೆಸ್ ಬ್ಯಾಂಕ್ ಎರಡರದೂ ಬಡ್ಡಿ ದರ 6 ಪರ್ಸೆಂಟ್. ಆದರೆ ಯೆಸ್ ಬ್ಯಾಂಕ್ ನಲ್ಲಿ 1 ಲಕ್ಷಕ್ಕಿಂತ ಹೆಚ್ಚಿನ ಬ್ಯಾಲೆನ್ಸ್ ಇದ್ದರೆ 6 ಪರ್ಸೆಂಟ್ ಬಡ್ಡಿ ಸಿಗುತ್ತದೆ. ಅದೇ ಇಂಡಸ್ ಇಂಡ್ ಬ್ಯಾಂಕ್ ನಲ್ಲಿ 10 ಲಕ್ಷಕ್ಕೂ ಹೆಚ್ಚು ಇರಬೇಕು. ಬ್ಯಾಂಕ್ ನಿಂದ ಇನ್ನಷ್ಟು ಅನುಕೂಲ ದೊರೆಯಲಿದೆ. ಆ ಬಗ್ಗೆ ಬ್ಯಾಂಕ್ ನಿಂದ ಮಾಹಿತಿ ಪಡೆಯಬಹುದು.

ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್
ಮೇಲ್ಕಂದ್ ಬ್ಯಾಂಕ್ ಗಳು ಪೂರ್ಣ ಪ್ರಮಾಣದ ವಾಣಿಜ್ಯ ಬ್ಯಾಂಕ್ ಗಳು. ಆದರೆ ಈ ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಹೆಸರೇ ಸೂಚಿಸುವಂತೆ ಸಣ್ಣ ಹಣಕಾಸು ಬ್ಯಾಂಕ್. 1ಲಕ್ಷಕ್ಕಿಂತ ಕಡಿಮೆ ಬ್ಯಾಲನ್ಸ್ ಇದ್ದರೆ ವಾರ್ಷಿಕ ಶೇಕಡಾ 5ರಷ್ಟು ಬಡ್ಡಿ ದೊರೆಯುತ್ತದೆ. 1ರಿಂದ 10 ಲಕ್ಷ ರುಪಾಯಿ ತನಕದ ಬ್ಯಾಲೆನ್ಸ್ ಗೆ 6ರಷ್ಟು ಬಡ್ಡಿ, 10 ಲಕ್ಷದಿಂದ 5 ಕೋಟಿ ಬ್ಯಾಲೆನ್ಸ್ ಗೆ 7 ಪರ್ಸೆಂಟ್ ಬಡ್ಡಿ ದೊರೆಯುತ್ತದೆ.