ಜ. 31ಕ್ಕೆ ಆರ್ಥಿಕ ಸಮೀಕ್ಷೆ ಮಂಡನೆ ಹಾಗೂ ನಿಮಗೆ ಗೊತ್ತಿರಬೇಕಾದ ಮಾಹಿತಿ

ಬಜೆಟ್ ಗೆ ಮುಂಚೆ ಬಹಳ ಮುಖ್ಯವಾದ ದೇಶದ ಆರ್ಥಿಕತೆ ದಿಕ್ಸೂಚಿ ಅಂದರೆ ಅದು ಆರ್ಥಿಕ ಸಮೀಕ್ಷೆ. ಇದೊಂದು ವಾರ್ಷಿಕ ದಾಖಲೆ. ಅಂದರೆ ವರ್ಷಕ್ಕೆ ಒಮ್ಮೆ ಸಿದ್ಧಪಡಿಸಲಾಗುತ್ತದೆ. ವಿತ್ತಸಚಿವರಿಗೆ ಸಲಹೆಗಾರರಿಗೆ ಇರುವವರು ಇದನ್ನು ಸಿದ್ಧಪಡಿಸಿ, ಕೇಂದ್ರ ಬಜೆಟ್ ಗೆ ಒಂದು ದಿನ ಮೊದಲು ಸಂಸತ್ ನ ಮುಂದೆ ಮಂಡನೆ ಮಾಡುತ್ತಾರೆ.

ಈ ಬಾರಿಯ ಆರ್ಥಿಕ ಸಮೀಕ್ಷೆಯನ್ನು ಮುಖ್ಯ ಆರ್ಥಿಕ ಸಲಹೆಗಾರ ಕೃಷ್ಣಮೂರ್ತಿ ಸುಬ್ರಮಣಿಯನ್ ಮಂಡಿಸಬೇಕಿದೆ. ಸಂಸತ್ ನಲ್ಲಿ ಬಜೆಟ್ ಅಧಿವೇಶನ ಆರಂಭವಾಗುವ ಮೊದಲ ದಿನವೇ ಮಂಡಿಸಲಾಗುತ್ತದೆ. ಈ ಬಾರಿ, ಜನವರಿ 31ನೇ ತಾರೀಕು, ಶುಕ್ರವಾರ ಮಧ್ಯಾಹ್ನ 12.30ಕ್ಕೆ ಬಿಡುಗಡೆ ಆಗಬಹುದು. ಆರ್ಥಿಕ ಸಚಿವಾಲಯದ ಬಜೆಟ್ ಪೋರ್ಟಲ್ ನಲ್ಲಿ ಈ ದಾಖಲೆ ಲಭ್ಯವಿರುತ್ತದೆ.

ಕಳೆದ ಹನ್ನೆರಡು ತಿಂಗಳಲ್ಲಿ ಭಾರತದ ಆರ್ಥಿಕತೆಯಲ್ಲಿ ಆದ ಬೆಳವಣಿಗೆಗಳ ಪರಿಶೀಲನೆಯೇ ಆರ್ಥಿಕ ಸಮೀಕ್ಷೆ. ಪ್ರಮುಖ ಅಭಿವೃದ್ಧಿ ಕಾರ್ಯಕ್ರಮಗಳು, ಸರ್ಕಾರದ ನೀತಿಗಳ ಮುಖ್ಯಾಂಶಗಳು, ಆರ್ಥಿಕತೆಯ ಅಲ್ವಾವಧಿ, ಮಧ್ಯಮಾವಧಿ ಸಾಧ್ಯತೆಗಳನ್ನು ತೆರೆದಿಡಲಾಗುತ್ತದೆ. ಈ ಬಾರಿ ಮಂಡನೆ ಆಗುವುದು 2019-20ನೇ ಸಾಲಿನ ಆರ್ಥಿಕ ಸಮೀಕ್ಷೆ.