Asia Cup 2023: ಏಷ್ಯಾ ಕಪ್‌ನಿಂದ ಭಾರತೀಯ ಕ್ರಿಕೆಟಿಗರು ಗಳಿಸುವುದೆಷ್ಟು ಗೊತ್ತಾ?

ಶ್ರೀಲಂಕಾ ವಿರುದ್ಧ 41 ರನ್‌ಗಳ ಭರ್ಜರಿ ಜಯ ಸಾಧಿಸಿದ ಭಾರತ 2023ರ ಏಷ್ಯಾಕಪ್‌ನ ಫೈನಲ್‌ನಲ್ಲಿ ಸ್ಥಾನ ಪಡೆದುಕೊಂಡಿದೆ. ಬಹು ನಿರೀಕ್ಷಿತ ಏಷ್ಯಾ ಕಪ್ ಫೈನಲ್ ಸೆಪ್ಟೆಂಬರ್ 17 ರಂದು ಕೊಲಂಬೊದ ಆರ್ ಪ್ರೇಮದಾಸ ಸ್ಟೇಡಿಯಂನಲ್ಲಿ ನಡೆಯಲಿದೆ. ಆದರೆ ಏಷ್ಯಾಕಪ್‌ನ ಸಮಯದಲ್ಲಿ ಭಾರತೀಯ ಕ್ರಿಕೆಟಿಗರು ಎಷ್ಟು ಸಂಭಾವನೆ ಪಡೆಯುತ್ತಾರೆ ಎಂಬುವುದು ನಿಮಗೆ ತಿಳಿದಿದೆಯೇ?

ಏಷ್ಯಾಕಪ್‌ನ ಸಮಯದಲ್ಲಿ ಆಟಗಾರರಿಗೆ ನೀಡುವ ಸಂಭಾವನೆಯು ಆಯಾ ತಂಡಗಳ ಪಂದ್ಯಗಳಲ್ಲಿ ಆ ಆಟಗಾರರು ಭಾಗವಹಿಸುವುದರ ಮೇಲೆ ಅವಲಂಬಿತವಾಗಿರುತ್ತದೆ. ಆಟಗಾರರಿಗೆ ನೀಡುವ ಸಂಭಾವನೆಯು ಆಟಗಾರನು ಭಾಗವಹಿಸುವ ಪಂದ್ಯಗಳ ಸಂಖ್ಯೆ ಮತ್ತು ಅವರ ತಂಡವು ಆಡುವ ಒಟ್ಟಾರೆ ಪಂದ್ಯಗಳ ಮೇಲೆ ನಿರ್ಧಾರವಾಗುತ್ತದೆ. ಇನ್ನು ಗಮನಾರ್ಹವಾಗಿ, ಒಂದು ಪಂದ್ಯದಲ್ಲಿ ಆಟಗಾರನು ಮೈದಾನಕ್ಕಿಳಿದು ಆಟವಾಡದಿದ್ದರೆ, ಆ ನಿರ್ದಿಷ್ಟ ಆಟಕ್ಕೆ ಅವರಿಗೆ ಯಾವುದೇ ಶುಲ್ಕ ಇರುವುದಿಲ್ಲ.

ಭಾರತದ ಆಟಗಾರರು ಗಳಿಸುವುದೆಷ್ಟು?

ಭಾರತವು ಏಷ್ಯಾ ಕಪ್‌ನಲ್ಲಿ ಕನಿಷ್ಠ ಐದು ಪಂದ್ಯಗಳಲ್ಲಿ ಭಾಗವಹಿಸುವುದು ಮೊದಲೇ ನಿರ್ಧರಿತವಾದುದ್ದು. ಈ ಐದು ಪಂದ್ಯಗಳಲ್ಲಿ ಆಟವಾಡುವ ಆಟಗಾರರು ಪಂದ್ಯಾವಳಿಯಿಂದ ಕನಿಷ್ಠ 30 ಲಕ್ಷ ರೂಪಾಯಿಗಳನ್ನು ಗಳಿಸುತ್ತಾರೆ. ಇನ್ನು ಫೈನಲ್ ಪಂದ್ಯಕ್ಕೆ ಬರುತ್ತಿದ್ದಂತೆ ಆಟಗಾರರ ಗಳಿಕೆ ಗಣನೀಯವಾಗಿ ಏರಿಕೆ ಕಾಣಲಿದೆ.

ಗ್ರೇಡ್ ಲೆಕ್ಕಾಚಾರದಲ್ಲಿ ಗಳಿಕೆ ಎಷ್ಟು?

ಈ ಪಂದ್ಯಾವಳಿ ಆಧಾರಿತ ಶುಲ್ಕಗಳ ಜೊತೆಗೆ, ಭಾರತೀಯ ಕ್ರಿಕೆಟ್ ಆಟಗಾರರು ತಮ್ಮ ಒಪ್ಪಂದದ ಭಾಗವಾಗಿ A+, A, B, ಮತ್ತು C ಶ್ರೇಣಿಗಳಲ್ಲಿ ವರ್ಗೀಕರಿಸಲಾದ ವಾರ್ಷಿಕ ವೇತನಗಳನ್ನು ಪಡೆಯುತ್ತಾರೆ. ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ಜಸ್ಪ್ರೀತ್ ಬುಮ್ರಾ ಮತ್ತು ರವೀಂದ್ರ ಜಡೇಜಾರಂತಹ ದಿಗ್ಗಜರು ಸೇರಿದಂತೆ ಉನ್ನತ ಶ್ರೇಣಿಯ A+ ಆಟಗಾರರು ವಾರ್ಷಿಕ 7 ಕೋಟಿ ರೂಪಾಯಿಗಳನ್ನು ಪಡೆಯುತ್ತಾರೆ. ಎ ಗ್ರೇಡ್ ಆಟಗಾರರಾದ ಹಾರ್ದಿಕ್ ಪಾಂಡ್ಯ, ಆರ್ ಅಶ್ವಿನ್, ಮೊಹಮ್ಮದ್ ಶಮಿ, ರಿಷಬ್ ಪಂತ್ ಮತ್ತು ಅಕ್ಷರ್ ಪಟೇಲ್ ವಾರ್ಷಿಕವಾಗಿ 5 ಕೋಟಿ ರೂಪಾಯಿ ಆದಾಯವನ್ನು ಗಳಿಸುತ್ತಾರೆ.

ಬಿ ವರ್ಗದಲ್ಲಿರುವ ಚೇತೇಶ್ವರ್ ಪೂಜಾರ, ಕೆಎಲ್ ರಾಹುಲ್, ಶ್ರೇಯಸ್ ಅಯ್ಯರ್, ಮೊಹಮ್ಮದ್ ಸಿರಾಜ್, ಸೂರ್ಯಕುಮಾರ್ ಯಾದವ್ ಮತ್ತು ಶುಬ್ಮನ್ ಗಿಲ್ ವರ್ಷಕ್ಕೆ 3 ಕೋಟಿ ರೂಪಾಯಿ ಗಳಿಸುತ್ತಾರೆ. ಕೊನೆಯದಾಗಿ, ಉಮೇಶ್ ಯಾದವ್, ಶಿಖರ್ ಧವನ್, ಶಾರ್ದೂಲ್ ಠಾಕೂರ್, ಇಶಾನ್ ಕಿಶನ್, ದೀಪಕ್ ಹೂಡಾ ಮತ್ತು ಯುಜ್ವೇಂದ್ರ ಚಹಾಲ್ ಸೇರಿದಂತೆ ಗ್ರೇಡ್ ಸಿ ಆಟಗಾರರು ವಾರ್ಷಿಕವಾಗಿ 1 ಕೋಟಿ ರೂಪಾಯಿ ಪಡೆಯುತ್ತಾರೆ.

ಈ ಆಟಗಾರರ ಒಪ್ಪಂದಗಳು ಸೆಪ್ಟೆಂಬರ್ 23 ರಂದು ಕೊನೆಯಾಗಲಿದೆ ಎಂಬುವುದು ಗಮನಾರ್ಹವಾಗಿದೆ. ಆಟಗಾರರು ತಮ್ಮ ಗ್ರೇಡ್‌ಗಳ ಆಧಾರದ ಮೇಲೆ ವಿಭಿನ್ನ ಸಂಭಾವನೆಯನ್ನು ಪಡೆಯುತ್ತಾರೆ. ಟೆಸ್ಟ್, T20 ಮತ್ತು ಒನ್‌ಡೇ ಆಟದಲ್ಲಿ ಸಂಭಾವನೆಯು ಸ್ಥಿರವಾಗಿರುತ್ತದೆ. ಗ್ರೇಡ್‌ಗಳನ್ನು ಲೆಕ್ಕಿಸದೆ, ಆಟಗಾರರು ಟೆಸ್ಟ್ ಪಂದ್ಯಗಳಿಗೆ 15 ಲಕ್ಷ ರೂಪಾಯಿ ಪಡೆಯುತ್ತಾರೆ. ಏಕದಿನ ಪಂದ್ಯಗಳಿಗೆ 6 ಲಕ್ಷ ರೂಪಾಯಿ, ಟಿ 20 ಫಾರ್ಮ್ಯಾಟ್‌ಗಳಿಗೆ 3 ಲಕ್ಷ ರೂಪಾಯಿ ಪಡೆಯುತ್ತಾರೆ.