India's first UPI ATM: ಭಾರತದ ಮೊದಲ ಯುಪಿಐ ಎಟಿಎಂ, ಕಾರ್ಡ್‌ಲೆಸ್ ನಗದು ವಿತ್‌ಡ್ರಾಗಿಂತ ಹೇಗೆ ಭಿನ್ನ?

ಯುನಿಫೈಡ್ ಪೇಮೆಂಟ್ಸ್ ಇಂಟರ್‌ಫೇಸ್ (ಯುಪಿಐ) ದೇಶದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಪಾವತಿ ವಿಧಾನವಾಗಿದೆ. ಶೇಕಡ 50 ಕ್ಕಿಂತ ಹೆಚ್ಚು ಮಂದಿ ಡಿಜಿಟಲ್ ವಹಿವಾಟುಗಳನ್ನು ನಡೆಸುತ್ತಾರೆ. ಭಾರತದ ಡಿಜಿಟಲ್ ಪಾವತಿ ವ್ಯವಸ್ಥೆಯ ಕ್ರಾಂತಿ ಬಳಿಕ ಇದೀಗ ದೇಶದ ಮೊದಲ ಯುಪಿಐ ಎಟಿಎಂ ಅನ್ನು ಮಂಗಳವಾರ ಪ್ರಾರಂಭಿಸಲಾಗಿದೆ.

ಹಿಟಾಚಿ ಪಾವತಿ ಸೇವೆಗಳು'ದೇಶದ ಮೊದಲ ಯುಪಿಐ - ಎಟಿಎಂ' ಅನ್ನು ವೈಟ್ ಲೇಬಲ್ ಎಟಿಎಂ (ಡಬ್ಲ್ಯೂಎಲ್‌ಎ) ಆಗಿ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (ಎನ್‌ಪಿಸಿಐ) ಸಹಯೋಗದೊಂದಿಗೆ ಪರಿಚಯಿಸಿದೆ. "ಈ ಆಫರ್ ಯಾವುದೇ ಬ್ಯಾಂಕ್ ಗ್ರಾಹಕರಿಗೆ ಕ್ಯೂಆರ್‌ ಆಧಾರಿತ ಯುಪಿಐ ನಗದು ವಿತ್‌ಡ್ರಾ ಮಾಡಲು ಅನುಕೂಲವನ್ನು ನೀಡುತ್ತದೆ," ಎಂದು ಕ್ಯಾಶ್ ಬಿಸಿನೆಸ್ ಹಿಟಾಚಿ ಪಾವತಿ ಸೇವೆಗಳ ಸುಮಿಲ್ ವಿಕಾಮ್ಸೆ ಎಂಡಿ ಮತ್ತು ಸಿಇಒ ಹೇಳಿದರು.

ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (ಎನ್‌ಪಿಸಿಐ), "ಎಟಿಎಂ ವಹಿವಾಟುಗಳಿಗಾಗಿ ಈ ನವೀನ ಮತ್ತು ಗ್ರಾಹಕ ಸ್ನೇಹಿ ಅಪ್‌ಡೇಟ್‌ನೊಂದಿಗೆ ಗ್ರಾಹಕರನ್ನು ನಾವು ಸಬಲೀಕರಣಗೊಳಿಸಲು ನಾವು ಸಂತೋಷಪಡುತ್ತೇವೆ. ಯುಪಿಐ ಎಟಿಎಂ ಪ್ರಾರಂಭವು ಬ್ಯಾಂಕಿಂಗ್ ಸೇವೆಗಳಲ್ಲಿ ಮಹತ್ವದ ಮೈಲಿಗಲ್ಲನ್ನು ಗುರುತಿಸುತ್ತದೆ," ಎಂದು ತಿಳಿಸಿದೆ.

"ಈ ವಿನೂತನ ಪರಿಕಲ್ಪನೆಯು ಕಾರ್ಡ್‌ನ ಅಗತ್ಯವಿಲ್ಲದೆಯೇ ಭಾರತದ ದೂರದ ಪ್ರದೇಶಗಳಲ್ಲಿಯೂ ಸಹ ತ್ವರಿತವಾಗಿ ನಗದು ಪಡೆಯಲು ವಿನ್ಯಾಸಗೊಳಿಸಲಾಗಿದೆ," ಎಂದು ಎನ್‌ಪಿಸಿಐ ಹೇಳಿದೆ. ಯುಪಿಐ ಎಟಿಎಂ ತಡೆರಹಿತ ಮತ್ತು ಸುರಕ್ಷಿತ ನಗದು ವಿತ್‌ಡ್ರಾ ಪ್ರಕ್ರಿಯೆಯನ್ನು ನೀಡುತ್ತದೆ. ಈ ಬಗ್ಗೆ ಇಲ್ಲಿದೆ ವಿವರ ಮುಂದೆ ಓದಿ....

ಭಾರತದ ಮೊದಲ ಯುಪಿಐ ಎಟಿಎಂನಿಂದ ಹಣ ವಿತ್‌ಡ್ರಾ ಮಾಡಿ

ಹಂತ 1: ಎಷ್ಟು ಮೊತ್ತ ಬೇಕು ಎಂದು ಆಯ್ಕೆ ಮಾಡಿಕೊಳ್ಳಿ.
ಹಂತ 2: ಆಯ್ದ ಮೊತ್ತಕ್ಕೆ ಅನುಗುಣವಾಗಿ ಯುಪಿಐ ಕ್ಯೂಆರ್ ಕೋಡ್ ಅನ್ನು ಪ್ರದರ್ಶಿಸಲಾಗುತ್ತದೆ.
ಹಂತ 3: ನಿಮ್ಮ ಯುಪಿಐ ಅಪ್ಲಿಕೇಶನ್ ಬಳಸಿಕೊಂಡು ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡಿ.
ಹಂತ 4: ವಹಿವಾಟನ್ನು ಅಧಿಕೃತಗೊಳಿಸಲು ನಿಮ್ಮ ಯುಪಿಐ ಪಿನ್ ಅನ್ನು ನಮೂದಿಸಿ.
ಹಂತ 5: ನಿಮ್ಮ ಹಣವನ್ನು ಸಂಗ್ರಹಿಸಿ.

ಕಾರ್ಡ್‌ಲೆಸ್ ನಗದು ವಿತ್‌ಡ್ರಾಗಿಂತ ಇದು ಹೇಗೆ ಭಿನ್ನ?

ಪ್ರಸ್ತುತ, ಕಾರ್ಡ್‌ಲೆಸ್ ನಗದು ವಿತ್‌ಡ್ರಾಗಳು ಮೊಬೈಲ್ ಸಂಖ್ಯೆಗಳು ಮತ್ತು ಒಟಿಪಿಗಳನ್ನು ಅವಲಂಬಿಸಿವೆ. ಯುಪಿಐ ಎಟಿಎಂ ಕ್ಯೂಆರ್ ಆಧಾರಿತ ಯುಪಿಐ ನಗದು ವಿತ್‌ಡ್ರಾ ಮೂಲಕ ಕಾರ್ಯನಿರ್ವಹಿಸುತ್ತದೆ. ತಮ್ಮ ಆಂಡ್ರಾಯ್ಡ್ ಅಥವಾ iOS ಮೊಬೈಲ್ ಫೋನ್‌ಗಳಲ್ಲಿ ಯುಪಿಐ ಅಪ್ಲಿಕೇಶನ್ ಅನ್ನು ಇನ್‌ಸ್ಟಾಲ್ ಮಾಡುವ ಮೂಲಕ ಯುಪಿಐ ಬಳಕೆದಾರರು ಯುಪಿಐ ಎಟಿಎಂ ಬಳಕೆ ಮಾಡಬಹುದಾಗಿದೆ.

ವಹಿವಾಟುಗಳನ್ನು ನಿರ್ವಹಿಸಲು ಬಳಕೆದಾರರು ತಮ್ಮ ಆಂಡ್ರಾಯ್ಡ್ ಅಥವಾ iOS ಸ್ಮಾರ್ಟ್‌ಫೋನ್‌ಗಳಲ್ಲಿ ಯುಪಿಐ ಆಪ್ ಇಲ್ಲದಿದ್ದರೆ, ಈ ಯುಪಿಐ ಎಟಿಎಂ ಬಳಕೆ ಸಾಧ್ಯವಿಲ್ಲ. ಹಿಟಾಚಿ ಲಿಮಿಟೆಡ್‌ನ ಶೇಕಡ 100ರ ಅಂಗಸಂಸ್ಥೆಯಾಗಿರುವ ಹಿಟಾಚಿ ಪಾವತಿ ಸೇವೆಗಳು ಭಾರತದಲ್ಲಿ ಪಾವತಿ ಉದ್ಯಮದಲ್ಲಿ ಪ್ರಮುಖ ಸಂಸ್ಥೆಯಾಗಿದೆ.