Jatin Paranjpe: ಕ್ರಿಕೆಟ್‌ಗೆ ವಿದಾಯ ಹೇಳಿ 72,00,00,000 ರೂ.ಗಳ ಸಂಸ್ಥೆ ಕಟ್ಟಿದ ಜತಿನ್‌ ಬಗ್ಗೆ ತಿಳಿಯಿರಿ

ಕ್ರಿಕೆಟ್‌ ಪ್ರೇಮಿಗಳಿಗೆ ಜತಿನ್‌ ಪರಾಂಜಪೆ ಸ್ಫೂರ್ತಿದಾಯಕ ಜರ್ನಿ ಬಗ್ಗೆ ತಿಳಿದಿರಬಹುದು ಹಾಗೂ ಎಲ್ಲರೂ ತಿಳಿದುಕೊಳ್ಳಬೇಕಾದ ಕಥೆಯಾಗಿದೆ. ಪರಾಂಜಪೆ ಅವರು ಭರವಸೆಯ ಕ್ರಿಕೆಟರ್‌ ಆಗಿದ್ದರು. ರಣಜಿ ಕ್ರಿಕೆಟ್‌ನಲ್ಲಿ ಉತ್ತಮ ಯಶಸ್ಸು ಸಾಧಿಸಿದ್ದ ಅವರು ಅಂತಾರಾಷ್ಟ್ರೀಯ ಮಟ್ಟದಲ್ಲಿಯೂ ಭಾರತವನ್ನು ಬಹಳ ಕಡಿಮೆ ಅವಧಿಗೆ ಪ್ರತಿನಿಧಿಸಿದ್ದರು.

1986-87ರಲ್ಲಿ ಬಾಂಬೆ ಕ್ರಿಕೆಟ್‌ ಅಸೋಸಿಯೇಷನ್‌ನ ವರ್ಷದ ಜ್ಯೂನಿಯರ್‌ ಕ್ರಿಕೆಟರ್‌ ಪ್ರಶಸ್ತಿಯನ್ನು ಗೆಲ್ಲುವ ಮೂಲಕ ಜತಿನ್‌ ಅವರು 14 ವರ್ಷದ ಸಚಿನ್‌ ತೆಂಡೂಲ್ಕರ್‌ ಅವರನ್ನು ಹಿಂದಿಕ್ಕಿದ್ದರು. ಆದರೆ, ಪಾದದ ಗಾಯ ಸಮಸ್ಯೆಯಿಂದಾಗಿ ಪರಾಂಜಪೆ ಅವರ ವೃತ್ತಿ ಜೀವನವು ಅರ್ಧಕ್ಕೆ ಮೊಟಕುಗೊಂಡಿತ್ತು. ವರ್ಷಗಳ ಬಳಿಕ ಅವರು ಬಹು ಮಿಲಿಯನ್‌ ಡಾಲರ್‌ಗಳ ಸ್ಟಾರ್ಟ್‌ಅಪ್‌ ಅನ್ನು ಕಟ್ಟಿ ಬೆಳೆಸಿದರು.

1972ರಲ್ಲಿ ಹುಟ್ಟಿದ ಪರಾಂಜಪೆ ಅವರು ಆಕರ್ಷಕ ಎಡಗೈ ಬ್ಯಾಟ್ಸ್‌ಮನ್‌ ಆಗಿದ್ದು, ಸಾಂಪ್ರದಾಯಿಕ ಎಡಗೈ ಸ್ಲೋ ಬೌಲರ್‌ ಕೂಡ ಆಗಿದ್ದರು. ಮಧ್ಯಮ ಕ್ರಮಾಂಕದ ಬ್ಯಾಟ್ಸ್‌ಮನ್‌ ಆಗಿರುವ ಪರಾಂಜಪೆ 1991-92ರಲ್ಲಿ ತಮ್ಮ ಚೊಚ್ಚಲ ರಣಜಿ ಪಂದ್ಯ ಆಡಿದ್ದರು. ಸುಮಾರು ಏಳು ವರ್ಷಗಳ ಬಳಿಕ ಅಂದರೆ 1998ರಲ್ಲಿ ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗಿದ್ದರು.

ಅವರ ವೃತ್ತಿ ಜೀವನದಲ್ಲಿ ಟೊರೊಂಟೊದಲ್ಲಿ ನಡೆದ ಸಹರಾ ಏಷ್ಯಾ ಕಪ್‌ನಲ್ಲಿ ಅವರ 23ರನ್‌ಗಳ ನಾಟೌಟ್‌ ಆಟ ಅವಿಸ್ಮರಣೀಯ ಪಂದ್ಯವಾಗಿತ್ತು. ಆ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತದ ಗೆಲುವಿಗೆ ಅವರು ಕಾರಣರಾಗಿದ್ದರು. ಎರಡು ಪಂದ್ಯಗಳ ಬಳಿಕ ಅವರು ಪಾದದ ಗಾಯಕ್ಕೆ ಒಳಗಾಗಿ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಆಡುವ ಅವಕಾಶವನ್ನು ಕಳೆದುಕೊಳ್ಳಬೇಕಾಯಿತು.

ಆ ಬಳಿಕ ಪರಾಂಜಪೆ ಅವರು ರಣಜಿ ಪಂದ್ಯಗಳನ್ನು ಆಡಿ ಉತ್ತಮ ಪ್ರದರ್ಶನ ನೀಡಿದ್ದರೂ ರಾಷ್ಟ್ರೀಯ ಆಯ್ಕೆದಾರರು ಎಂದಿಗೂ ಅವರನ್ನು ಆಯ್ಕೆ ಮಾಡಿರಲಿಲ್ಲ. ಇಲ್ಲಿಗೆ ಇನ್ನೇನು ಪರಾಂಜಪೆ ಕಥೆ ಮುಗಿಯಿತೆಂದು ಅಂದುಕೊಳ್ಳುತ್ತಿರಬೇಕಾದರೆ, ಅದು ಹೊಸ ಅಧ್ಯಾಯವೊಂದಕ್ಕೆ ನಾಂದಿಹಾಡಿತ್ತು. ಪರಾಂಜಪೆ ಅವರನ್ನು ಆಸ್ಟ್ರೇಲಿಯನ್‌ ಸ್ಪೋರ್ಟಿಂಗ್‌ ಫ್ರಾಂಟಿಯರ್ಸ್‌ ಎಂಬ ಸ್ಪೋರ್ಟ್ಸ್‌ ಮ್ಯಾನೇಜ್‌ಮೆಂಟ್‌ ಸಂಸ್ಥೆಯು ಸಂಪರ್ಕಿಸಿತ್ತು. ಅದರ ಜತೆ ಸೇರಿಕೊಂಡು ಎರಡು ವರ್ಷಗಳ ಕಾಲ ವ್ಯಾಪಾರದ ಬಗ್ಗೆ ಕಲಿತರು. ಆ ಬಳಿಕ ಅವರು ಸ್ಪೋರ್ಟ್ಸ್‌ಒನ್‌ ಇಂಡಿಯಾ ಎಂಬ ಸ್ಪೋರ್ಟ್ಸ್‌ ಈವೆಂಟ್‌ ಅಂಡ್‌ ಮಾರ್ಕೆಟಿಂಗ್‌ ಕಂಪೆನಿಯನ್ನು ಸ್ಥಾಪಿಸಿದರು.

ಅವರ ಜೀವನದ ಮತ್ತೊಂದು ತಿರುವು ಅಂದರೆ ಅದೇ ವೇಳೆಗೆ ನೈಕ್‌ ಸಂಸ್ಥೆ ಅವರನ್ನು ಗುರುತಿಸಿ ತನ್ನ ಜತೆ ಸೇರಿಸಿಕೊಂಡಿತ್ತು. ಅವರು ನೈಕ್‌ಗಾಗಿ ನೆದರ್‌ಲ್ಯಾಂಡ್‌ನಲ್ಲಿ ನೆಲೆಸಿಕೊಂಡು ಮೂರು ವರ್ಷಗಳ ಕಾಲ ಯೂರೋಪಿಯನ್‌ ಫುಟ್‌ಬಾಲ್‌ ಅನ್ನು ನಿರ್ವಹಿಸಿದರು. ಅಲ್ಲಿನ ಕೆಲಸದಲ್ಲಿ ಕಲಿತ ಹಲವಾರು ಅಂಶಗಳನ್ನು ಇಟ್ಟುಕೊಂಡು ವಾಪಾಸ್‌ ಭಾರತಕ್ಕೆ ಬಂದು ಖೇಲೊಮೋರ್‌ ಎಂಬ ಸಂಸ್ಥೆಯನ್ನು 2017ರಲ್ಲಿ ಹುಟ್ಟು ಹಾಕಿದರು.

ಪರಾಂಜಪೆಯ ಕಂಪೆನಿಯು ಕ್ರಿಕೆಟ್‌, ಬಾಸ್ಕೆಟ್‌ಬಾಲ್‌, ಫುಟ್‌ಬಾಲ್‌ ಮತ್ತು ಬ್ಯಾಡ್ಮಿಂಟನ್‌ನಂಥ ಕ್ರೀಡೆಗಳಲ್ಲಿ ಕೋಚ್‌ಗಳು-ಅಕಾಡೆಮಿಗಳಿಗೆ ಅಕ್ರಿಗೇಟರ್‌ ಆಗಿ ಕಾರ್ಯನಿರ್ವಹಿಸುತ್ತಿದೆ. ತಮ್ಮ ಮುಂಬೈ ಮೂಲದ ಸ್ಟಾರ್ಟಪ್‌ನ ಹೂಡಿಕೆದಾರರಲ್ಲಿ ಡ್ರೀಮ್‌11, ಎರುಡಿಟಸ್‌ ಸಿಇಒ ಅಶ್ವಿನ್‌ ದಮೇರಾ ಸೇರಿದ್ದಾರೆ. ಜತಿನ್‌ ಪರಾಂಜಪೆ ಅವರು ಬಾಲಿವುಡ್‌ ನಟಿ ಸೋನಾಲಿ ಬೇಂದ್ರೆ ಅವರ ಸಹೋದರಿ ಗಾಂಧಾಲಿ ಪರಾಂಜಪೆ ಅವರನ್ನು ವಿವಾಹವಾಗಿದ್ದಾರೆ.

ಗಾಂಧಾಲಿ ಅವರು ಖೇಲೋಮೋರ್‌ನ ನಿರ್ದೇಶಕರೂ ಹೌದು. ಜತಿನ್‌ ಅವರ ತಂದೆ ವಾಸು ಪರಾಂಜಪೆ ಅವರು 1960ರ ದಶಕದಲ್ಲಿ ರಣಜಿ ಕ್ರಿಕೆಟರ್‌ ಆಗಿದ್ದು, ನ್ಯಾಷನಲ್‌ ಕ್ರಿಕೆಟ್‌ ಅಕಾಡೆಮಿ(ಎನ್‌ಸಿಎ)ಯಲ್ಲಿ ಹೆಸರಾಂತ ಕೋಚ್‌ ಆಗಿದ್ದರು. ಅಲ್ಲದೆ ಪರಾಂಜಪೆ ಅವರು ಬಿಸಿಸಿಐನಲ್ಲಿ ರಾಷ್ಟ್ರೀಯ ಆಯ್ಕೆದಾರರೂ ಆಗಿದ್ದರು.