ದೇಶದ ಶ್ರೀಮಂತ ವ್ಯಕ್ತಿ ಮುಕೇಶ್‌ ಅಂಬಾನಿ ಮಕ್ಕಳ ಉದ್ಯಮ, ನಿವ್ವಳ ಆದಾಯ ತಿಳಿಯಿರಿ

ಏಷ್ಯಾದ ಶ್ರೀಮಂತ ವ್ಯಕ್ತಿ ಹಾಗೂ ರಿಲಯನ್ಸ್‌ ಇಂಡಸ್ಟ್ರೀಸ್‌ನ ಅಧ್ಯಕ್ಷ ಮುಕೇಶ್‌ ಅಂಬಾನಿ ಅವರು ವಿಶ್ವದಾದ್ಯಂತ ತಮ್ಮ ಬಿಸಿನೆಸ್‌ನ್ನು ವಿಸ್ತರಿಸಿಕೊಂಡಿದ್ದಾರೆ. ರಿಲಯನ್ಸ್‌ ಇಂಡಸ್ಟ್ರೀಸ್‌ ಮುಕೇಶ್‌ ಅಂಬಾನಿ ಅಧ್ಯಕ್ಷತೆಯಲ್ಲಿ ಪೆಟ್ರೋಕೆಮಿಕಲ್ಸ್‌, ಆಯಿಲ್‌ ಅಂಡ್‌ ಗ್ಯಾಸ್, ಟೆಲಿಕಾಂ ಹಾಗೂ ರಿಟೇಲ್‌ ಉದ್ಯಮ ಕ್ಷೇತ್ರದಲ್ಲಿ $104 ಬಿಲಿಯನ್‌ ಮಾರುಕಟ್ಟೆ ಕ್ಯಾಪ್‌ ಅನ್ನು ಹೊಂದಿದೆ.

ಮುಕೇಶ್‌ ಅಂಬಾನಿ ಅವರು $84.1 ಬಿಲಿಯನ್‌ ನಿವ್ವಳ ಆಸ್ತಿ ಹೊಂದಿದ್ದಾರೆ. ಫೋರ್ಬ್ಸ್‌ ಪ್ರಕಾರ, ವಿಶ್ವದ 13ನೇ ಶ್ರೀಮಂತರ ಪಟ್ಟಿಯಲ್ಲಿ ಅಂಬಾನಿ ಗುರುತಿಸಿಕೊಂಡಿದ್ದಾರೆ. ಈಗ ಅವರ ಮಕ್ಕಳು ದೇಶದ ಅತ್ಯಮೂಲ್ಯ ಕಂಪೆನಿಗಳಲ್ಲಿ ಪ್ರಮುಖ ಪಾತ್ರ ಹಾಗೂ ಜವಾಬ್ದಾರಿಯನ್ನು ನಿರ್ವಹಿಸುತ್ತಿದ್ದಾರೆ. ರಿಲಯನ್ಸ್‌ ಗ್ರೂಪ್‌ನಲ್ಲಿ ಇಶಾ ಅಂಬಾನಿ, ಅನಂತ್‌ ಅಂಬಾನಿ ಮತ್ತು ಆಕಾಶ್‌ ಅಂಬಾನಿ ಯಾವೆಲ್ಲ ಜವಾಬ್ದಾರಿಗಳನ್ನು ನಿರ್ವಹಿಸುತ್ತಿದ್ದಾರೆ ಎಂಬುದನ್ನು ತಿಳಿಯೋಣ.

ಆಕಾಶ್‌ ಅಂಬಾನಿ

ಆಕಾಶ್‌ ಅಂಬಾನಿ ಮುಕೇಶ್‌ ಹಾಗೂ ನೀತಾ ಅಂಬಾನಿ ಅವರ ಹಿರಿಯ ಮಗ. ಆಕಾಶ್‌ ಅವರು ರಿಲಯನ್ಸ್‌ ಜಿಯೋ ಅಧ್ಯಕ್ಷರಾಗಿದ್ದಾರೆ. ಅವರು ಭಾರತೀಯ ವಾಣಿಜ್ಯೋದ್ಯಮಿಯೂ ಹೌದು. ಭಾರತದ ಅತಿದೊಡ್ಡ ಟೆಲಿಕಾಂ ವ್ಯಾಪಾರ ಉದ್ಯಮವು ಆಕಾಶ್‌ ಅವರ ನಿಯಂತ್ರಣದಲ್ಲಿದೆ. ಅವರು ಮುಂಬೈ ಐಪಿಎಲ್‌ನ ಸಹ ಮಾಲೀಕರಾಗಿದ್ದಾರೆ. ಅವರು ತಮ್ಮ ಶಾಲಾ ಶಿಕ್ಷಣವನ್ನು ಮುಂಬೈನ ಕ್ಯಾಂಪಿಯಸ್‌ ಶಾಲೆ ಹಾಗೂ ಧೀರೂಭಾಯಿ ಅಂಬಾನಿ ಇಂಟರ್‌ನ್ಯಾಷನಲ್‌ ಸ್ಕೂಲ್‌ನಲ್ಲಿ ಮಾಡಿದ್ದಾರೆ.

2013ರಲ್ಲಿ ಅಮೆರಿಕದ ಬ್ರೌನ್‌ ವಿಶ್ವವಿದ್ಯಾಲಯದಿಂದ ಪದವಿ ಪಡೆದ ನಂತರ ತಮ್ಮ ತಂದೆ ಮುಕೇಶ್‌ ಅಂಬಾನಿ ಅವರೊಂದಿಗೆ ಉದ್ಯಮ ವ್ಯವಹಾರಗಳನ್ನು ನಿರ್ವಹಿಸಲು ಪ್ರಾರಂಭಿಸಿದರು. ಅವರು ಮೊದಲು ಜಿಯೋ ಇನ್ಫೋಕಾಮ್‌ನಲ್ಲಿ ಸ್ಟ್ರಾಟಜಿ ಮುಖ್ಯಸ್ಥರಾಗಿ ಕೆಲಸ ಪ್ರಾರಂಭಿಸಿದ್ದರು. ಜಿಯೋ ಕಂಪೆನಿಯು ಬಹಳ ಎತ್ತರಕ್ಕೆ ಬೆಳೆಯುವುದಕ್ಕೆ ಇವರು ಪ್ರಮುಖ ಪಾತ್ರ ವಹಿಸಿದ್ದಾರೆ. ಅವರ ನಿವ್ವಳ ಆಸ್ತಿ ಮೌಲ್ಯವು $40 ಬಿಲಿಯನ್‌ ಆಗಿದೆ ಎಂದು ವರದಿಯಾಗಿದೆ.

ಇಶಾ ಅಂಬಾನಿ

ಇಶಾ ಅಂಬಾನಿ ಅವರು, ಆಕಾಶ್‌ ಅವರ ಅವಳಿ ಸಹೋದರಿ ಹಾಗೂ ಮುಕೇಶ್‌ ಮತ್ತು ನೀತಾ ಅಂಬಾನಿ ಅವರ ಏಕೈಕ ಪುತ್ರಿ. ಇವರು ರಿಲಯನ್ಸ್‌ ಗ್ರೂಪ್‌ನ ಚಿಲ್ಲರೆ ವ್ಯಾಪಾರದ ನಿರ್ವಹಣೆಯನ್ನು ನೋಡಿಕೊಳ್ಳುತ್ತಿದ್ದಾರೆ. ಸಹೋದರನಂತೆ ಇಶಾ ಕೂಡ ಧೀರೂಭಾಯಿ ಅಂಬಾನಿ ಇಂಟರ್‌ನ್ಯಾಷನಲ್‌ ಸ್ಕೂಲ್‌ನಲ್ಲಿ ಶಾಲಾ ಶಿಕ್ಷಣವನ್ನು ಪೂರ್ಣಗೊಳಿಸಿದ್ದಾರೆ.

ನಂತರ ಅವರು ಅಮೆರಿಕಕ್ಕೆ ತೆರಳಿದ್ದು, ಅಲ್ಲಿ ಯೇಲ್‌ ವಿಶ್ವವಿದ್ಯಾಲಯ ಮತ್ತು ಸ್ಟ್ರ್ಯಾನ್‌ಫೋರ್ಡ್‌ ಗ್ರಾಜುಯೇಟ್‌ ಸ್ಕೂಲ್‌ ಆಫ್‌ ಬಿಸಿನೆಸ್‌ನಲ್ಲಿ ಅಧ್ಯಯನ ಮಾಡಿದ್ದಾರೆ. ಇಶಾ ಅವರ ನಿವ್ವಳ ಆಸ್ತಿ ಮೌಲ್ಯ $100 ಮಿಲಿಯನ್‌ ಆಗಿರುವುದಾಗಿ ಅಂದಾಜಿಸಲಾಗಿದೆ. ಅವರು ಮನೋವಿಜ್ಞಾನದಲ್ಲಿ ಪದವಿಯನ್ನು ಪಡೆದಿದ್ದಾರೆ. ಇಶಾ ಅವರು ಮಿಲಿಯನೇರ್‌ ಆನಂದ್‌ ಪಿರಮಲ್‌ ಅವರನ್ನು ವಿವಾಹವಾಗಿದ್ದಾರೆ.

ಅನಂತ್‌ ಅಂಬಾನಿ

ಅಂಬಾನಿ ಕುಟುಂಬದ ಕಿರಿಯ ಮಗ ಅನಂತ್‌ ಅಂಬಾನಿ ರಿಲಯನ್ಸ್‌ ನ್ಯೂ ಎನರ್ಜಿ ಉದ್ಯಮದ ವ್ಯವಹಾರಗಳನ್ನು ನೋಡಿಕೊಳ್ಳುತ್ತಿದ್ದಾರೆ. ಅವರು ರಿಲಿಯನ್ಸ್‌ 02C ಹಾಗೂ ರಿಲಯನ್ಸ್‌ ನ್ಯೂ ಸೋಲಾರ್‌ ಎನರ್ಜಿಯ ನಿರ್ದೇಶಕರ ಹುದ್ದೆಯಲ್ಲಿದ್ದಾರೆ.

ವರದಿಗಳ ಪ್ರಕಾರ ಈ ಅವೆನ್ಯೂನಲ್ಲಿ ಅಂಬಾನಿಗಳು ಹೆಚ್ಚು ಹೂಡಿಕೆ ಮಾಡಿದ್ದಾರೆ. ಅವರ ನಿವ್ವಳ ಮೌಲ್ಯ ಸುಮಾರು $40 ಬಿಲಿಯನ್‌ ಆಗಿದೆ. ಅನಂತ್‌ ಅಂಬಾನಿ ಕೂಡ ಬ್ರೌನ್‌ ವಿಶ್ವವಿದ್ಯಾಲಯದಲ್ಲಿ ತಮ್ಮ ಅಧ್ಯಯನವನ್ನು ಮುಗಿಸಿದ್ದಾರೆ. ಇತ್ತೀಚೆಗಷ್ಟೇ ಅವರು ರಾಧಿಕಾ ಮರ್ಚೆಂಟ್‌ ಜತೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರೆ.