Rekha Jhunjhunwala: ಭಾರತದ 3ನೇ ಶ್ರೀಮಂತ ಮಹಿಳೆ ರೇಖಾ ಜುಂಜುನ್‌ವಾಲಾ, ಒಂದು ತಿಂಗಳಲ್ಲೇ 692 ಕೋಟಿ ರೂ. ಗಳಿಕೆ!

ದೇಶದ ಪ್ರಸಿದ್ಧ ಹೂಡಿಕೆದಾರ ರಾಕೇಶ್‌ ಜುಂಜುನ್‌ವಾಲಾ ಅವರ ಪತ್ನಿ ರೇಖಾ ಜುಂಜುನ್‌ವಾಲಾ ಅವರ ಹೂಡಿಕೆ ಹಾಗೂ ಬಂಡವಾಳದ ಬಗ್ಗೆ ಚಿಲ್ಲರೆ ಹೂಡಿಕೆದಾರರು ಬಹಳ ಹತ್ತಿರದಿಂದ ಫಾಲೋ ಮಾಡುತ್ತಾರೆ. ಏಕೆಂದರೆ ಇದು ಭಾರತೀಯ ಮಾರುಕಟ್ಟೆಯ ಮನಸ್ಥಿತಿಯನ್ನು ಅಳೆಯಲು ನೆರವಾಗುತ್ತಿದೆ. ಕಳೆದ ಒಂದು ತಿಂಗಳಲ್ಲಿ ರೇಖಾ ಜುಂಜುನ್‌ವಾಲಾ ಅವರ ಪೋರ್ಟ್‌ಪೋಲಿಯೊ ಸ್ಟಾಕ್‌ ಟೈಟಾನ್‌ ಕಂಪೆನಿಯ ಷೇರು ಬೆಲೆಯು ತಲಾ 150.90 ಅಥವಾ ಶೇಕಡ 6.30ರಷ್ಟು ಜಿಗಿತ ಕಂಡಿದೆ.

ಕೇವಲ 15 ನಿಮಿಷದಲ್ಲಿ ರೇಖಾ ಅವರ ಸಂಪತ್ತು 400 ಕೋಟಿ ರೂಪಾಯಿಯಷ್ಟು ಏರಿಕೆ ಕಂಡು ಮುಂಬೈ ಷೇರುಪೇಟೆಯಲ್ಲಿ ಗಮನ ಸೆಳೆದಿದ್ದರು. ಅಂದರೆ ರೇಖಾ ಜುಂಜುನ್ವಾಲಾ ಅವರ ನಿವ್ವಳ ಮೌಲ್ಯವು ಈ ಸಮಯದಲ್ಲಿ ಸುಮಾರು 692 ಕೋಟಿ ರೂ. ಟೈಟಾನ್‌ ಎಲ್‌ಐಸಿ ಬೆಂಬಲಿತ ಟಾಟಾ ಗ್ರೂಪ್‌ ಕಂಪೆನಿಯಾಗಿದೆ. ಜತೆಗೆ ಇದರಲ್ಲಿ ರೇಖಾ ಜುಂಜುನ್ವಾಲಾ ಅವರು ಶೇಕಡ 5.17 ಪಾಲನ್ನು ಅಥವಾ 4,58,95,970 ಟೈಟಾನ್‌ ಷೇರುಗಳನ್ನು ಹೊಂದಿದ್ದಾರೆ.

2022ರ ಅಕ್ಟೋಬರ್‌ನಿಂದ ಡಿಸೆಂಬರ್‌ವರೆಗಿನ ತ್ರೈಮಾಸಿಕದಲ್ಲಿ ಟೈಟಾನ್‌ ಕಂಪೆನಿಯ ಷೇರುದಾರರ ಮಾದರಿಯಂತೆ ರೇಖಾ ಜುಂಜುನ್ವಾಲಾ ಅವರು ಕಂಪೆನಿಯ 4,58,95,970 ಷೇರುಗಳ ಮಾಲೀಕರಾಗಿದ್ದಾರೆ. ಭಾರತೀಯ ಜೀವ ವಿಮೆಯು (ಎಲ್‌ಐಸಿ) ಟೈಟಾನ್‌ ಕಂಪೆನಿಯ 2,05,19,699 ಕೋಟಿ ಷೇರುಗಳನ್ನು ಹೊಂದಿವೆ. ಎಸ್‌ಬಿಐ ನಿಫ್ಟಿ ಇಟಿಇ ಕೂಡ 1,40,05,693 ಟೈಟಾನ್‌ ಷೇರುಗಳನ್ನು ಅಥವಾ ಶೇ.1.58ರಷ್ಟು ಪಾಲನ್ನು ಹೊಂದಿದೆ.

ರೇಖಾ ಜುಂಜುನ್‌ವಾಲಾ ಯಾರು?

ಫೋರ್ಬ್ಸ್‌ ಪ್ರಕಾರ ರೇಖಾ ಜುಂಜುನ್‌ವಾಲಾ ಅವರು ಭಾರತದ 3ನೇ ಅತಿದೊಡ್ಡ ಶ್ರೀಮಂತ ಮಹಿಳೆಯಾಗಿದ್ದಾರೆ. ಅವರ ಒಟ್ಟು ನಿವ್ವಳ ಆಸ್ತಿ ಮೌಲ್ಯವು 5.2 ಬಿಲಿಯನ್‌ ಡಾಲರ್‌. 2022ರಲ್ಲಿ ತಮ್ಮ ಪತಿ, ದಿವಂಗತ ರಾಕೇಶ್‌ ಜುಂಜುನ್‌ವಾಲಾ ಅವರ ನಿಧನದ ನಂತರ 59 ವರ್ಷದ ರೇಖಾ ಜುಂಜುನ್ವಾಲಾ ಅವರು ಮೌಲ್ಯಯುತ ಸ್ಟಾಕ್‌ ಪೋರ್ಟ್‌ಫೊಲಿಯೊವನ್ನು ಪಡೆದುಕೊಂಡಿದ್ದು, ಟೈಟಾನ್‌, ಮೆಟ್ರೋ ಬ್ರಾಂಡ್ಸ್‌, ಸ್ಟಾರ್‌ ಹೆಲ್ತ್‌, ಟಾಟಾ ಮೋಟಾರ್ಸ್‌, ಕ್ರಿಸ್ಲಿ ಸೇರಿದಂತೆ 29 ಪ್ರತಿಷ್ಟಿತ ಕಂಪೆನಿಗಳ ಷೇರುಗಳನ್ನು ಹೊಂದಿದ್ದಾರೆ.

ರೇಖಾ ಜುಂಜುನ್‌ವಾಲಾ ಅವರು 1963ರ ಸೆಪ್ಟಂಬರ್‌ 12ರಂದು ಜನಿಸಿದ್ದು, ಮುಂಬೈ ವಿಶ್ವವಿದ್ಯಾಲಯದಿಂದ ಪದವಿಯನ್ನು ಪಡೆದುಕೊಂಡಿದ್ದಾರೆ. 1987ರಲ್ಲಿ ರೇಖಾ ಅವರು ಸ್ಟಾಕ್‌ ಮಾರ್ಕೆಟ್‌ನಲ್ಲಿ ಬಹಳ ಜನಪ್ರಿಯತೆ ಪಡೆದುಕೊಂಡಿದ್ದ ರಾಕೇಶ್‌ ಜುಂಜುನ್‌ವಾಲಾ ಅವರನ್ನು ಮದುವೆಯಾಗಿದ್ದರು. ರಾಕೇಶ್‌ ಜುಂಜುನ್‌ವಾಲಾ ಅವರನ್ನು ಭಾರತದ ವಾರೆನ್‌ ಬಫೆಟ್‌ ಅವರಿಗೆ ಹೋಲಿಸಲಾಗುತ್ತದೆ.

2022ರ ಆಗಸ್ಟ್‌ನಲ್ಲಿ ಪತಿ ರಾಕೇಶ್‌ ಜುಂಜುನ್‌ವಾಲಾ ಅವರು ಆಕಾಸ್‌ ಎನ್ನುವ ಹೊಸ ಏರ್‌ಲೈನ್ಸ್‌ ಅನ್ನು ಕೂಡ ಪ್ರಾರಂಭಿಸಿದ್ದರು. ಅದು ಕಾರ್ಯಾರಂಭ ಮಾಡುವ ವೇಳೆಗೆ ರಾಕೇಶ್‌ ಜುಂಜುನ್‌ವಾಲಾ ಅವರು ನಿಧನ ಹೊಂದಿದ್ದಾರೆ. ರಾಕೇಶ್‌ ಜುಂಜುನ್ವಾಲಾ ಅವರು ಸ್ಟಾಕ್‌ ಮಾರ್ಕೆಟ್‌ ಹೊರತಾಗಿ ಫೈನಾನ್ಸ್‌, ಟೆಕ್‌, ರಿಟೇಲ್‌ ಅಂಡ್‌ ಫಾರ್ಮಾ ಕ್ಷೇತ್ರದಲ್ಲಿಯೂ ಹೂಡಿಕೆಯನ್ನು ಮಾಡಿದ್ದಾರೆ. ರಾಕೇಶ್‌ ಜುಂಜುನ್‌ವಾಲಾ ಅವರು ಚಾರ್ಟೆರ್ಡ್‌ ಅಕೌಂಟೆಂಟ್‌ ಆಗಿದ್ದು, ತಮ್ಮ ಹಾಗೂ ಪತ್ನಿ ರೇಖಾ ಜುಂಜುನ್‌ವಾಲಾ ಹೆಸರಿನಲ್ಲಿ ಹೂಡಿಕೆ ಮಾಡಿದ್ದಾರೆ. ಈ ದಂಪತಿಯ ಬಹು ಕ್ಷೇತ್ರಗಳಲ್ಲಿನ ದೊಡ್ಡ ಹೂಡಿಕೆಗಳಿಂದಾಗಿ ಅದರ ಮೌಲ್ಯ ಈಗ 33,594.1 ಕೋಟಿ ರೂ.ನಷ್ಟು ಆಗಿದೆ. ರಾಕೇಶ್‌-ರೇಖಾ ಜುಂಜುನ್‌ವಾಲಾ ದಂಪತಿಗೆ ಮೂವರು ಮಕ್ಕಳು ಇದ್ದಾರೆ.