Year-Ender 2023: ಭಾರತೀಯ ಪ್ರವಾಸಿಗರಿಗೆ ವೀಸಾ ನಿಯಮ ಬದಲಾಯಿಸಿದ ದೇಶಗಳಿವು

ನಾವೀಗ 2023ನೇ ವರ್ಷಕ್ಕೆ ವಿದಾಯ ಹೇಳುತ್ತಿದ್ದೇವೆ. ಈ ಸಂದರ್ಭದಲ್ಲಿ ಹಲವಾರು ಮಂದಿ ಪ್ರವಾಸ ಹೋಗುತ್ತಾರೆ. ಹಲವಾರು ಗಮನಾರ್ಹ ಘಟನೆಗಳ ನಡುವೆ, ನಾವು ಈ ವರ್ಷದಲ್ಲಿ ನಡೆದ ಕೆಲವು ಮಹತ್ತರ ಘಟನೆಗಳ ಬಗ್ಗೆಯೂ ಮೆಲುಕು ಹಾಕೋಣ.

ಈ ವರ್ಷ ಹೊಸ ಇ-ವೀಸಾ ವ್ಯವಸ್ಥೆಗಳನ್ನು ಹಲವಾರು ದೇಶಗಳು ಪರಿಚಯಿಸಿದೆ. ಅದರಲ್ಲೂ ಪ್ರಮುಖವಾಗಿ ಭಾರತೀಯರಿಗಾಗಿ ವೀಸಾ ನಿಯಮಗಳನ್ನು ವಿವಿಧ ದೇಶಗಳು ಬದಲಾವಣೆ ಮಾಡಿದೆ. ಯಾವೆಲ್ಲ ದೇಶಗಳು ವೀಸಾ ನಿಯಮ ಬದಲಾಯಿಸಿದೆ ಎಂಬ ವಿವರ ಇಲ್ಲಿದೆ ಮುಂದೆ ಓದಿ....

ಭಾರತೀಯ ಪ್ರವಾಸಿಗರನ್ನು ಸ್ವಾಗತಿಸುತ್ತಿದೆ ಶ್ರೀಲಂಕಾ

ಶ್ರೀಲಂಕಾವು ಭಾರತೀಯ ಪ್ರವಾಸಿಗರಿಗೆ ದಾರಿದೀಪವಾಗಿದೆ. ಡಿಸೆಂಬರ್ 2023 ರಿಂದ ಮಾರ್ಚ್ 2024 ರವರೆಗೆ ಭಾರತೀಯರಿಗೆ ಉಚಿತ ವೀಸಾವನ್ನು ಘೋಷಿಸಿದೆ. ಈ ಕಾರ್ಯತಂತ್ರದ ಕ್ರಮವು ಪ್ರವಾಸೋದ್ಯಮವನ್ನು ಉತ್ತೇಜಿಸುವುದಲ್ಲದೆ ಎರಡು ರಾಷ್ಟ್ರಗಳ ನಡುವೆ ಐತಿಹಾಸಿಕ ಮತ್ತು ಸಾಂಸ್ಕೃತಿಕ ಬಾಂಧವ್ಯ ಹೆಚ್ಚಿಸುವ ಗುರಿಯನ್ನು ಹೊಂದಿದೆ.

ಒಂದು ವರ್ಷ ವೀಸಾವಿಲ್ಲದೆ ಮಲೇಷ್ಯಾಕ್ಕೆ ಹೋಗಿ

ಡಿಸೆಂಬರ್ 2023 ರಿಂದ ಡಿಸೆಂಬರ್ 2024 ರವರೆಗೆ ಭಾರತೀಯರಿಗೆ ತಾತ್ಕಾಲಿಕ ವೀಸಾ-ಮುಕ್ತ ಪ್ರಯಾಣವನ್ನು ಮಲೇಷ್ಯಾ ಆರಂಭಿಸಿದೆ. ಮಲೇಷ್ಯಾ 2024 ಅಭಿಯಾನದಡಿ ಈ ಕ್ರಮ ಕೈಗೊಳ್ಳಲಾಗಿದೆ. ಪ್ರವಾಸೋದ್ಯಮ ಮತ್ತು ವ್ಯಾಪಾರ ಎರಡಕ್ಕೂ ಪ್ರಮುಖ ಮಾರುಕಟ್ಟೆಯಾದ ಭಾರತದೊಂದಿಗೆ ಸಂಬಂಧಗಳನ್ನು ಬಲಪಡಿಸುವ ಮಲೇಷ್ಯಾದ ಬದ್ಧತೆ ಇದಾಗಿದೆ.

ವೀಸಾ ಪ್ರಕ್ರಿಯೆ ಸುಗಮಗೊಳಿಸಿದ ಜಪಾನ್

ಜುಲೈ 2023 ರಲ್ಲಿ, ಜಪಾನ್ ವಿವಿಧ ದೇಶಗಳಲ್ಲಿ ವಾಸಿಸುವ ಭಾರತೀಯ ಪಾಸ್‌ಪೋರ್ಟ್ ಹೊಂದಿರುವವರಿಗೆ ಏಕ-ಪ್ರವೇಶದ ಇ-ವೀಸಾವನ್ನು ಪರಿಚಯಿಸಿತು. ಈ ಕ್ರಮವು ವೀಸಾ ಅರ್ಜಿ ಪ್ರಕ್ರಿಯೆಯನ್ನು ಸರಳಗೊಳಿಸುವ ಗುರಿಯನ್ನು ಹೊಂದಿದೆ. ಇದು ಭಾರತೀಯ ಪ್ರಯಾಣಿಕರಿಗೆ ಹೆಚ್ಚು ಅನುಕೂಲಕರವಾಗಿದೆ ಮತ್ತು ರಾಷ್ಟ್ರಗಳ ನಡುವೆ ಪ್ರವಾಸೋದ್ಯಮ ಮತ್ತು ವ್ಯಾಪಾರ ಸಂಪರ್ಕಗಳನ್ನು ಉತ್ತೇಜಿಸುತ್ತದೆ.

ರಷ್ಯಾದಿಂದ ಇ-ವೀಸಾ

ರಷ್ಯಾ ಆಗಸ್ಟ್ 2023 ರಿಂದ 16 ದಿನಗಳವರೆಗೆ ಏಕ-ಪ್ರವೇಶದ ಇ-ವೀಸಾವನ್ನು ಪ್ರಾರಂಭಿಸಿತು. ಭಾರತ ಸೇರಿದಂತೆ 55 ದೇಶಗಳ ನಾಗರಿಕರಿಗೆ ಆತ್ಮೀಯ ಸ್ವಾಗತವನ್ನು ರಷ್ಯಾ ನೀಡುತ್ತದೆ. ಈ ಉಪಕ್ರಮವು ಭಾರತದೊಂದಿಗೆ ಬಾಂಧವ್ಯವನ್ನು ಬಲಪಡಿಸುವ ಗುರಿಯನ್ನು ಹೊಂದಿದೆ.

ಥೈಲ್ಯಾಂಡ್‌ಗೆ ಆರು ತಿಂಗಳು ವೀಸಾ ಇಲ್ಲದೆ ಪ್ರವೇಶ

ನವೆಂಬರ್ 10, 2023 ರಂದು, ಪ್ರವಾಸೋದ್ಯಮ ಉದ್ದೇಶಗಳಿಗಾಗಿ ಭಾರತೀಯ ನಾಗರಿಕರಿಗೆ ಥೈಲ್ಯಾಂಡ್ ವೀಸಾ-ಮುಕ್ತ ಪ್ರವಾಸ ಅವಕಾಶ ನೀಡಿದೆ. ಇದು 30 ದಿನಗಳವರೆಗೆ ಉಳಿಯಲು ಅನುವು ಮಾಡಿಕೊಡುತ್ತದೆ. ಅಂದರೆ ಸಮಯದ ನಿರ್ಬಂಧಗಳಿದೆ. ಇದು ಮೇ 10, 2024 ರವರೆಗೆ ಮಾನ್ಯವಾಗಿರುತ್ತದೆ.

ಇಂಡೋನೇಷ್ಯಾ: ವೀಸಾ-ಮುಕ್ತ ಪ್ರವೇಶ ಪ್ರಸ್ತಾಪ

ಇಂಡೋನೇಷ್ಯಾ ಇನ್ನೂ ಭಾರತೀಯ ನಾಗರಿಕರಿಗೆ ವೀಸಾ ಮುಕ್ತವಾಗದಿದ್ದರೂ, ಪ್ರವಾಸೋದ್ಯಮ ಸಚಿವಾಲಯವು ಭಾರತ ಸೇರಿದಂತೆ 20 ದೇಶಗಳ ಪ್ರಯಾಣಿಕರಿಗೆ ಉಚಿತ ಪ್ರವೇಶ ವೀಸಾಗಳನ್ನು ನೀಡಲು ಪ್ರಸ್ತಾಪಿಸಿದೆ. ಈ ಕ್ರಮವು ಪ್ರವಾಸೋದ್ಯಮವನ್ನು ಹೆಚ್ಚಿಸಲು, ಪ್ರವಾಸಿಗರನ್ನು ಆಕರ್ಷಿಸುವ ಗುರಿಯನ್ನು ಹೊಂದಿದೆ.

ಮಯನ್ಮಾರ್: ಭಾರತೀಯ ಪ್ರವಾಸಿಗರಿಗೆ ವೀಸಾಗಳು

ಮಯನ್ಮಾರ್ ಚೀನಾ ಮತ್ತು ಭಾರತೀಯ ಪ್ರವಾಸಿಗರಿಗೆ ವೀಸಾಗಳನ್ನು ನೀಡುವ ಪ್ರಾಯೋಗಿಕ ಯೋಜನೆಯನ್ನು ಪರಿಚಯಿಸಿದೆ. ವಿದೇಶಿ ಪ್ರವಾಸಿಗರನ್ನು ಸ್ವಾಗತಿಸಲು ಮತ್ತು ಆರ್ಥಿಕ ಬೆಳವಣಿಗೆಯನ್ನು ಉತ್ತೇಜಿಸಲು ಈ ಕ್ರಮ ಕೈಗೊಂಡಿದೆ. ಈ ಉಪಕ್ರಮವು ಶೀಘ್ರದಲ್ಲೇ ಪ್ರಾರಂಭವಾಗಲಿದೆ.

ಸೆರ್ಬಿಯಾ: ವೀಸಾ-ಮುಕ್ತ ಪ್ರವೇಶ

ಇನ್ನೊಂದು ಬದಿಯಲ್ಲಿ, ಜನವರಿ 1, 2023 ರಿಂದ ಭಾರತೀಯ ನಾಗರಿಕರಿಗೆ ವೀಸಾ-ಮುಕ್ತ ಪ್ರವೇಶವನ್ನು ನಿಲ್ಲಿಸುವ ಮೂಲಕ ಸೆರ್ಬಿಯಾ ಮಹತ್ವದ ಬದಲಾವಣೆಯನ್ನು ಮಾಡಿದೆ. ಇಯು ವೀಸಾ ನೀತಿಯೊಂದಿಗೆ ಹೊಂದಾಣಿಕೆ ಮಾಡಲು, ಅಕ್ರಮ ವಲಸೆಯನ್ನು ನಿಯಂತ್ರಿಸಲು ಈ ಕ್ರಮಕೈಗೊಂಡಿದೆ.