Realmeದಿಂದ PaySa ಪ್ಲಾಟ್ ಫಾರ್ಮ್ ಮೂಲಕ 5 ಲಕ್ಷ ತನಕ ಸಾಲ

ಚೀನಾದ ಸ್ಮಾರ್ಟ್ ಫೋನ್ ತಯಾರಿಕೆ ಸಂಸ್ಥೆ Realmeದಿಂದ ಮಂಗಳವಾರ PaySa ಪ್ಲಾಟ್ ಫಾರ್ಮ್ ಮೂಲಕ ಹಣಕಾಸು ಸಾಲ ಒದಗಿಸುವುದಾಗಿ ಘೋಷಣೆ ಮಾಡಿದೆ. ಮುಂದಿನ 2 ವರ್ಷಗಳಲ್ಲಿ 2.5 ಕೋಟಿ ಗ್ರಾಹಕರನ್ನು ಹೊಂದುವ ಗುರಿ ಇರಿಸಿಕೊಂಡಿದೆ. 'Realme PaySa'ದ ಮೂಲಕ ವೈಯಕ್ತಿಕವಾಗಿ, ಸಣ್ಣ ಮತ್ತು ಮಧ್ಯಮ ಗಾತ್ರದ ಸಂಸ್ಥೆಗಳಿಗೆ (SME) ಸಾಲ ನೀಡಲಿದೆ.

ಮೆಟ್ರೋ ನಗರಗಳಲ್ಲಿ, ಟಯರ್ ಎರಡು ಮತ್ತು ಮೂರು ನಗರಗಳಲ್ಲಿ ಸಾಲ ನೀಡಲಾಗುತ್ತದೆ. ಡಿಜಿಟಲ್ ಪರ್ಸನಲ್ ಲೋನ್ 1 ಲಕ್ಷ ರುಪಾಯಿ ತನಕ ನೀಡಲಾಗುತ್ತದೆ. ಇನ್ನು ಡಿಜಿಟಲ್ SME ಸಾಲ 5 ಲಕ್ಷ ರುಪಾಯಿ ತನಕ ವಿತರಿಸಲಾಗುತ್ತದೆ.

"ಮೊಬೈಲ್ ಮಾರುಕಟ್ಟೆಯ ಯಶಸ್ಸನ್ನು ಇಲ್ಲೂ ಪುನರಾವರ್ತಿಸಲು ಬಯಸುತ್ತೇವೆ. ಮುಂದಿನ ಎರಡರಿಂದ ಮೂರು ವರ್ಷಗಳಲ್ಲಿ ಹಣಕಾಸು ಸೇವೆ ಒದಗಿಸುವ ಟಾಪ್ 5 ಸಂಸ್ಥೆಗಳಲ್ಲಿ ಒಂದಾಗುವ ಗುರಿ ಇದೆ. ಮೊಬೈಲ್ ಫೋನ್ ಫೈನಾನ್ಸಿಂಗ್ ಆರಂಭದ ಬಗ್ಗೆ ಹಾಗೂ 2020ರ ಪಾವತಿ ಬಗ್ಗೆ ಮೌಲ್ಯಮಾಪನ ಮಾಡುತ್ತಿದ್ದೇವೆ" ಎಂದು ಕಂಪೆನಿ ಹೇಳಿಕೆಯಲ್ಲಿ ತಿಳಿಸಲಾಗಿದೆ.

2020ರಲ್ಲಿ 1000 ಕೋಟಿ ರುಪಾಯಿ ಸಾಲ ವಿತರಿಸಲು ಗುರಿ ಇರಿಸಿಕೊಳ್ಳಲಾಗಿದೆ. ಮೂವತ್ತರಿಂದ ಐವತ್ತು ಲಕ್ಷ ಹೊಸ ಗ್ರಾಹಕರನ್ನು ಸೆಳೆಯುವ ಉದ್ದೇಶ ಇದೆ. ಹಲವು ಫೈನಾನ್ಷಿಯಲ್ ಉತ್ಪನ್ನಗಳನ್ನು ಆರಂಭಿಸಲು ಉದ್ದೇಶಿಸಿದ್ದು, ಭಾರತದಲ್ಲಿ ಹಣಕಾಸು ಸೇವೆ ಆರಂಭಕ್ಕೆ ಮೊದಲ ಹೆಜ್ಜೆ ಇರಿಸಲಿದೆ.

ಇನ್ನು ಗೂಗಲ್ ಪ್ಲೇ ಸ್ಟೋರ್ ಮತ್ತು ರಿಯಾಲ್ಮೆ ಅಪ್ಲಿಕೇಷನ್ ಸ್ಟೋರ್ ನಲ್ಲಿ ಅಪ್ಲಿಕೇಷನ್ ದೊರೆಯಲಿದೆ.