ತಾಯಿಯ ಫೋನ್ ಬಳಸುತ್ತಿದ್ದ ಪುತ್ರ- ಖಾತೆಯಿಂದ 1.4 ಲಕ್ಷ ರೂಪಾಯಿ ಮಂಗಮಾಯ, ನಡೆದಿದ್ದೇನು?

ಎಂದಿಗೂ ಕೂಡಾ ನೀವು ನಿಮ್ಮ ಸ್ಮಾರ್ಟ್‌ಫೋನ್ ಅನ್ನು ಮಕ್ಕಳಿಗೆ ನೀಡಿದಾಗ, ಅವರಿಗೆ ಮಾಡಬೇಕಾದ ಮತ್ತು ಮಾಡಬಾರದ ವಿಷಯಗಳ ಬಗ್ಗೆ ಸೂಚನೆ ನೀಡಿ. ಅವರು ಏನು ಮಾಡುತ್ತಿದ್ದಾರೆ ಎಂಬುದರ ಬಗ್ಗೆ ನಿಗಾ ಇರಿಸಿ. ಯಾಕೆಂದರೆ ಇಲ್ಲೊಬ್ಬ ಬಾಲಕ ತನ್ನ ತಾಯಿಯ ಮೊಬೈಲ್ ಅನ್ನು ಬಳಸಿದ್ದು ಬರೋಬ್ಬರಿ 1.4 ಲಕ್ಷ ರೂಪಾಯಿ ವಂಚಕರ ಪಾಲಾಗುವಂತಾಗಿದೆ.

ಹೌದು ಮನೆಯಲ್ಲಿದ್ದಾಗ ಪೋಷಕರ ಫೋನ್ ಬಳಸುತ್ತಿದ್ದ 15 ವರ್ಷದ ವಿದ್ಯಾರ್ಥಿಯೊಬ್ಬ ಇತ್ತೀಚೆಗೆ ಅರೆಕಾಲಿಕ ಉದ್ಯೋಗ ವಂಚನೆಗೆ ಬಲಿಯಾಗಿ 1.4 ಲಕ್ಷ ರೂಪಾಯಿ ಕಳೆದುಕೊಂಡಿದ್ದಾನೆ. ರಾಜಾಜಿನಗರ ನಿವಾಸಿ ಹಾಗೂ ಖಾಸಗಿ ಶಾಲೆಯ 10ನೇ ತರಗತಿ ವಿದ್ಯಾರ್ಥಿ ಶಶಾಂಕ್ (ಹೆಸರು ಬದಲಿಸಲಾಗಿದೆ) ತನ್ನ ತಾಯಿ ಮತ್ತು ಅಜ್ಜಿಯ ಯುಪಿಐ ಮತ್ತು ಬ್ಯಾಂಕ್ ಖಾತೆಗಳಿಂದ ಹಣವನ್ನು ಪಾವತಿಸಿದ್ದಾನೆ.

ಅರೆಕಾಲಿಕ ಉದ್ಯೋಗದ ಭರವಸೆ ನೀಡುವ ವಂಚಕರಿಂದ ಶಾಲಾ ವಿದ್ಯಾರ್ಥಿ ವಂಚನೆಗೆ ಒಳಗಾಗಿರುವುದು ಇದೇ ಮೊದಲು ಎಂದು ಪೊಲೀಸರು ತಿಳಿಸಿದ್ದಾರೆ. ಕಳೆದ ವರ್ಷ ವೈಟ್‌ಫೀಲ್ಡ್ ಹುಡುಗನೊಬ್ಬ ಗೇಮಿಂಗ್ ಆಪ್ ಬಳಸಿ ಮೋಸ ಹೋಗಿದ್ದ. ಬಸವೇಶ್ವರನಗರ ಪೊಲೀಸರಿಗೆ ನೀಡಿರುವ ದೂರಿನ ಪ್ರಕಾರ, ಶಶಾಂಕ್ ಫೆ.5 ರಂದು ಬೆಳಗ್ಗೆ 10 ಗಂಟೆ ಸುಮಾರಿಗೆ ತನ್ನ ತಾಯಿಯ ಫೋನ್ ಬಳಸುತ್ತಿದ್ದಾಗ ವಾಟ್ಸ್‌ಆ್ಯಪ್‌ನಲ್ಲಿ ಅರೆಕಾಲಿಕ ಉದ್ಯೋಗದ ಕುರಿತು ಸಂದೇಶ ಬಂದಿತ್ತು. ಅವನು ರಾತ್ರಿ ಸಂದೇಶಕ್ಕೆ ಪ್ರತಿಕ್ರಿಯಿಸಿದ್ದಾನೆ.

ದುಷ್ಕರ್ಮಿಗಳು ಯೂಟ್ಯೂಬ್‌ನಲ್ಲಿ ವೀಡಿಯೊಗಳನ್ನು ಲೈಕ್ ಮಾಡುವ ಮತ್ತು ಚಂದಾದಾರರಾಗುವ 'ಪಾರ್ಟ್‌ಟೈಮ್ ಜಾಬ್' ಬಗ್ಗೆ ವಿವರಗಳನ್ನು ತಕ್ಷಣ ಅವನೊಂದಿಗೆ ಹಂಚಿಕೊಂಡಿದ್ದಾರೆ. ಅವನನ್ನು ಸೆಳೆಯಲು, ಅವರು ವೀಡಿಯೊಗಳಿಗೆ ಕೆಲವು ಲಿಂಕ್‌ಗಳನ್ನು ಕಳುಹಿಸಿದರು ಮತ್ತು ಅವುಗಳಿಗೆ ಲೈಕ್ ಒತ್ತುವಂತೆ ಕೇಳಿದರು.

ದುಷ್ಕರ್ಮಿಗಳು ಅವನಿಗೆ ಈ ಕೆಲಸಕ್ಕಾಗಿ 2,750 ರೂಪಾಯಿ ಪಾವತಿ ಮಾಡಿದ್ದು, ಬಳಿಕ ಪ್ರಿಪೇಯ್ಡ್ ಕಾರ್ಯಗಳನ್ನು ತೆಗೆದುಕೊಳ್ಳಬೇಕಾಗಿದೆ ಎಂದು ಹೇಳಿದರು. ಸ್ವಲ್ಪ ಹಣವನ್ನು ತ್ವರಿತವಾಗಿ ನೀಡಿ ಈ ಕೆಲಸವನ್ನು ಖರೀದಿಸಲು ಶಶಾಂಕ್ ಒಪ್ಪಿಕೊಂಡರು. ಅವರು ಆರಂಭದಲ್ಲಿ ಎರಡು ಬಾರಿ 1 ಸಾವಿರ ರೂಪಾಯಿಯ ಈ ಕೆಲಸವನ್ನು ಖರೀದಿಸಿದ್ದಾರೆ. ಹಣವನ್ನು ಅವರ ತಾಯಿಯ ಯುಪಿಐ ಖಾತೆಯಿಂದ ಪಾವತಿಸಿದ್ದು, ದುಷ್ಕರ್ಮಿಗಳು ಅವರಿಗೆ ರೂ 300 ಮತ್ತು ರೂ 900 ಅನ್ನು ಲಾಭವಾಗಿ ಪಾವತಿಸಿದ್ದಾರೆ.

ನಂತರ, ಅವರು ಹೆಚ್ಚಿನ ಬೆಲೆಗೆ ಈ ಕೆಲಸವನ್ನು ಖರೀದಿಸಲು ಈ ಬಾಲಕನ ಮನವೊಲಿಸಿದ್ದಾರೆ. ಅದಾದ ಬಳಿಕ ಬಾಲಕ 10,000 ರೂಪಾಯಿಗೂ ಅಧಿಕ ಹಣ ಪಾವತಿಸಿ ತಾನು ಲೈಕ್ ಕ್ಲಿಕ್ ಮಾಡಬೇಕಾದ ಯೂಟ್ಯೂಬ್ ಲಿಂಕ್‌ ಪಡೆಯುತ್ತಿದ್ದನು. ಆದರೆ ಯಾವುದೇ ಲಾಭವೂ ಇಲ್ಲ, ಹೂಡಿಕೆ ಮಾಡಿದ ಮೊತ್ತವನ್ನು ವಾಪಾಸ್ ಬರದೆ ಇದ್ದಾಗ ದುಷ್ಕರ್ಮಿಗಳು ಈ ಹಣವನ್ನು ಕ್ರಿಪ್ಟೋಕರೆನ್ಸಿಗೆ ಹೂಡಿಕೆ ಮಾಡಲಾಗಿದೆ, ಇದರಿಂದಾಗಿ ಭಾರೀ ಆದಾಯ ಲಭ್ಯವಾಗುತ್ತದೆ ಎಂದು ಹೇಳಿ ಬಾಲಕನನ್ನು ನಂಬಿಸಿದ್ದಾರೆ.

ಅವರನ್ನು ನಂಬಿದ ಶಶಾಂಕ್ ಮರುದಿನ ಬೆಳಗ್ಗೆ 11 ಗಂಟೆಯ ವೇಳೆಗೆ ತನ್ನ ತಾಯಿಯ ಖಾತೆಯಿಂದ 1.2 ಲಕ್ಷ ರೂಪಾಯಿ ಮತ್ತು ಅಜ್ಜಿಯ ಖಾತೆಯಿಂದ 20,000 ರೂಪಾಯಿ ಪಾವತಿ ಮಾಡಿದ್ದಾನೆ. ಅವನು ತನ್ನ ಅಜ್ಜಿಯ ಫೋನ್ ಅನ್ನು ಅವಳ ಖಾತೆಯಿಂದ ಹಣವನ್ನು ವರ್ಗಾಯಿಸಲು ಬಳಸಿದ್ದಾನೆ. ದುಷ್ಕರ್ಮಿಗಳು ಇನ್ನೂ ಅಧಿಕ ವರ್ಕ್‌ಗಳನ್ನು ಖರೀದಿ ಮಾಡಲು ಒತ್ತಾಯ ಮಾಡಿದಾಗ ಏನೋ ಮೋಸವಿದೆ ಎಂದು ತಿಳಿದ ಬಾಲಕ ತಾನು ನೀಡಿದ ಹಣವನ್ನು ವಾಪಾಸ್ ನೀಡುವಂತೆ ಒತ್ತಾಯಿಸಿದ್ದಾನೆ.

ಆದರೆ ಆ ವಂಚಕರು ಇನ್ನೂ ಅಧಿಕ ವರ್ಕ್ ಅನ್ನು ಖರೀದಿ ಮಾಡಿದ ಬಳಿಕ, ಆದಾಯ ತೆರಿಗೆ ಮತ್ತು ಸಂಸ್ಕರಣಾ ಶುಲ್ಕದಂತಹ ಶುಲ್ಕಗಳನ್ನು ಪಾವತಿಸಿದ ನಂತರ ಮಾತ್ರ ಹಣವನ್ನು ಬಿಡುಗಡೆ ಮಾಡಬಹುದು ಎಂದು ಹೇಳಿದ್ದಾರೆ. ತಾನು ಮೋಸ ಹೋಗಿರುವ ಬಗ್ಗೆ ಈ ಸಂದರ್ಭದಲ್ಲಿ ತಿಳಿಸಿದ ಬಾಲಕ ತನ್ನ ಪೋಷಕರಿಗೆ ತಿಳಿಸಿದ್ದಾನೆ. ಕೂಡಲೇ ಪೋಷಕರು ಆತನನ್ನು ಪೊಲೀಸ್ ಠಾಣೆಗೆ ಕರೆದೊಯ್ದು ದೂರು ದಾಖಲಿಸಿದ್ದಾರೆ.