ಇತ್ತೀಚಿನ ದಿನಗಳಲ್ಲಿ ಮಾಹಿತಿ ಕಾಯಿದೆ ಅಡಿಯಲ್ಲಿ (RTI) ಅನೇಕ ಇಲಾಖೆಗಳಿಗೆ ಸಂಬಂಧಿಸಿದ ಮಾಹಿತಿ ಪಡೆಯುವುದು ಜನಸಾಮಾನ್ಯರ ಹಕ್ಕು.

ಅದೇ ರಿತಿ ಮಾಹಿತಿ ಹಕ್ಕು ಕಾಯಿದೆಯಡಿ ನಾಣ್ಯ ತಯಾರಿಕೆಯ ವೆಚ್ಚ ಕುರಿತಂತೆ ಬಹಿರಂಗವಾಗಿರುವ ಮಾಹಿತಿಯೊಂದು ಕುತೂಹಲಕರವಾಗಿದೆ. ಚಲಾವಣೆಯಲ್ಲಿರುವ ರೂ. 1, 2, 5 ಹಾಗೂ 10 ನಾಣ್ಯಗಳ ತಯಾರಿಕೆಗೆ ವೆಚ್ಚವಾಗುವ ಮೊತ್ತದ ಮಾಹಿತಿ ಇಲ್ಲಿದೆ.

ಮಾಹಿತಿ ಹಕ್ಕು ಕಾಯಿದೆಯಡಿ ಆರ್ಬಿಐಗೆ ಖಾಸಗಿ ಮಾಧ್ಯಮವೊಂದು ಅರ್ಜಿ ಸಲ್ಲಿಸಿತ್ತು. ಅರ್ಜಿಗೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಈ ಮಾಹಿತಿ ನೀಡಿದ್ದು, ಒಂದು ರೂಪಾಯಿ ನಾಣ್ಯವನ್ನು ಟಂಕಿಸಲು ರೂ. 1.11 ವೆಚ್ಚವಾಗುತ್ತದೆ ಎಂದು ತಿಳಿಸಲಾಗಿದೆ.
ಅದೇ ರೀತಿ ರೂ. 2 ನಾಣ್ಯ ಟಂಕಿಸಲು 1.28 ರೂಪಾಯಿ, ರೂ. 5 ನಾಣ್ಯಕ್ಕೆ 3.69 ಹಾಗೂ ರೂ. 10 ನಾಣ್ಯಕ್ಕೆ 5.54 ವೆಚ್ಚ ತಗಲುತ್ತದೆ ಎಂದು ಮಾಹಿತಿ ನೀಡಿದೆ.
2016-17 ಸಾಲಿನಲ್ಲಿ ಅತಿ ಹೆಚ್ಚು ಅಂದರೆ 220.1 ಕೋಟಿ ನಾಣ್ಯಗಳನ್ನು ಟಂಕಿಸಲಾಗಿದ್ದು, 2015-16 ನೇ ಸಾಲಿನಲ್ಲಿ 215.1 ಕೋಟಿ ನಾಣ್ಯಗಳನ್ನು ಟಂಕಿಸಲಾಗಿದೆ.

ಆರ್ಟಿಐ ಪ್ರಕಾರ, ಇಂಡಿಯನ್ ಗವರ್ನಮೆಂಟ್ ಮಿಂಟ್ (ಐಜಿಎಂ) ಮುಂಬೈ ರೂ. 10, ರೂ. 5, ರೂ. 2 ಮತ್ತು ರೂ. 1 ಅನ್ನು ಪ್ರಸ್ತುತ ಮುದ್ರಿಸುತ್ತಿದೆ ಎಂದು ಬಹಿರಂಗಪಡಿಸಿದೆ. ಮುಂಬೈನ ಐಜಿಎಂ ಕಳೆದ ಐದು ವರ್ಷಗಳಲ್ಲಿ ವಿವಿಧ ರೀತಿಯ ನಾಣ್ಯಗಳನ್ನು ಪ್ರಕಟಿಸಿದೆ.