ಟಾಟಾ ಮೋಟಾರ್ಸ್ ಕಂಪನಿ ಷೇರು ಶುಕ್ರವಾರದಂದು ಭಾರೀ ಇಳಿಕೆ ಕಂಡಿದೆ. 30% ತನಕ ಕುಸಿತ ಕಂಡು, ಹೂಡಿಕೆದಾರರು ಭಾರೀ ನಷ್ಟ ಅನುಭವಿಸಿದ್ದಾರೆ. ಟಾಟಾ ಮೋಟಾರ್ಸ್ ಕಂಪನಿ ಡಿಸೆಂಬರ್ ತ್ರೈ ಮಾಸಿಕ ಅಂತ್ಯಕ್ಕೆ 26,961 ಕೋಟಿ ರುಪಾಯಿ ನಷ್ಟ ದಾಖಲಿಸಿದ್ದು, ಫಲಿತಾಂಶ ಬಂದ ಮರುದಿನ ಷೇರು ಮೌಲ್ಯ ಕುಸಿತವಾಗಿದೆ.

3.1 ಬಿಲಿಯನ್ ಪೌಂಡ್ ನಷ್ಟು ಜಾಗ್ವಾರ್ ಲ್ಯಾಂಡ್ ರೋವರ್ ನ ಆಸ್ತಿಗೆ ಸಂಬಂಧಿಸಿದ ಹಾಗೆ ಭಾರೀ ನಷ್ಟವಾಗಿದೆ. ಈ ಕಾರಣಕ್ಕೆ ತಜ್ಞರು ಅಂದಾಜಿಸುವ ಪ್ರಕಾರ, ಕಂಪನಿಯ ಆದಾಯ 25% ತನಕ ಗಳಿಕೆ ಕಡಿಮೆ ಆಗಬಹುದು. ಇಂಥ ಸುದ್ದಿ ಕಂಪನಿ ಷೇರಿನ ಮೇಲೆ ಪರಿಣಾಮ ಬೀರಿದೆ.

ಶುಕ್ರವಾರದಂದು ಟಾಟಾ ಮೋಟಾರ್ಸ್ ಷೇರು ಎನ್ ಎಸ್ ಇಯಲ್ಲಿ 29.45%ನಷ್ಟು ಕುಸಿದು 129 ರುಪಾಯಿ ತಲುಪಿ, ವಾರ್ಷಿಕ ಕನಿಷ್ಠ ಮಟ್ಟವನ್ನು ದಾಖಲಿಸಿತು. ಇನ್ನು ಸೆನ್ಸೆಕ್ಸ್ ನಲ್ಲಿ 22.41% ಕುಸಿದು, 141.90 ರುಪಾಯಿ ತಲುಪಿತ್ತು. 1993ರ ನಂತರ ಟಾಟಾ ಮೋಟಾರ್ಸ್ ಕಂಪನಿಯು ಒಂದೇ ದಿನದಲ್ಲಿ ದಾಖಲಿಸಿದ ಗರಿಷ್ಠ ಕುಸಿತ ಇದು.

1993ರ ಫೆಬ್ರವರಿ 2ನೇ ತಾರೀಕಿನಂದು ಟಾಟಾ ಮೋಟಾರ್ಸ್ ಕಂಪನಿಯು 40.50% ಕುಸಿತ ಕಂಡಿತ್ತು. ಮಧ್ಯಾಹ್ನ ಎರಡು ಗಂಟೆ ವೇಳೆಗೆ ಟಾಟಾ ಮೋಟಾರ್ಸ್ ಕಂಪನಿಯ ಷೇರು ಬಿಎಸ್ ಇಯಲ್ಲಿ 152 ರುಪಾಯಿ ಹಾಗೂ ಎನ್ ಎಸ್ ಇಯಲ್ಲಿ 151.90 ರುಪಾಯಿಯಲ್ಲಿ ವಹಿವಾಟು ನಡೆಸುತ್ತಿತ್ತು.