ಜಿಯೋ ಜಮಾನ! ಗ್ರಾಹಕರಿಗೆ 5G ಸೇವೆ ಲಭ್ಯ.. ಯಾವಾಗಿನಿಂದ ಗೊತ್ತಾ?

5 ಜಿ ನೆಟ್ ವರ್ಕ್

ಟೆಲಿಕಾಂ ಕ್ಷೇತ್ರದಲ್ಲಿ ಬಿರುಗಾಳಿ ಎಬ್ಬಿಸಿರುವ ಜಿಯೋ ಮತ್ತೊಂದು ಮಹತ್ತರ ಕಾರ್ಯಕ್ಕೆ ಕೈ ಹಾಕಿದೆ. ಅನೇಕ ಟೆಲಿಕಾಂ ಸಂಸ್ಥೆಗಳು 4 ಜಿ ನೆಟ್ವರ್ಕ್ ನ್ನು ಹೆಚ್ಚು ಪರಿಣಾಮಕಾರಿಯಾಗಿ ನೀಡಲು ಒದ್ದಾಡುತ್ತಿರುವಾಗಲೇ ಜಿಯೋ ಮತ್ತೊಂದು ಹೆಜ್ಜೆ ಮುಂದೆ ಹೋಗಿ 5 ಜಿ ಸೇವೆ ನೀಡಲು ಮುಂದಾಗಿದೆ.

2020 ರ ವೇಳೆಗೆ

ಮುಕೇಶ್ ಅಂಬಾನಿ ಸಂಸ್ಥೆ 5 ಜಿ ನೆಟ್ವರ್ಕ್ ಬಿಡುಗಡೆ ಮಾಡಲು ಸಿದ್ದತೆ ಮಾಡಿಕೊಂಡಿದ್ದು, 2020 ರ ವೇಳೆಗೆ ಈ ನೆಟ್ವರ್ಕ್ ಸೌಲಭ್ಯವನ್ನು ತನ್ನ ಗ್ರಾಹಕರಿಗೆ ನೀಡಲಿದೆ. 2020 ರ ಮಧ್ಯಂತರದಲ್ಲಿ 5 ಜಿ ಸೇವೆ ಸಿಗಲಿದೆ.

ಮೂರನೇ ದೊಡ್ಡ ಕಂಪನಿ

ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ ಬಿಡುಗಡೆ ಮಾಡಿದ ಡಿಸೆಂಬರ್ 2018 ರ ಅಂಕಿ ಅಂಶಗಳ ಪ್ರಕಾರ, ಭಾರತದ ಮೂರನೇ ಅತಿದೊಡ್ಡ ಟೆಲಿಕಾಂ ಕಂಪೆನಿಯಾಗಿರುವ ಜಿಯೋ 280.01 ದಶಲಕ್ಷದಷ್ಟು ಚಂದಾದಾರರನ್ನು ಹೊಂದಿದೆ. ಭಾರತಿ ಏರ್ಟೆಲ್ ಲಿಮಿಟೆಡ್ ಮತ್ತು ವೊಡಾಫೋನ್ ಐಡಿಯಾ ಲಿಮಿಟೆಡ್ ನಂತರದಲ್ಲಿ ಜಿಯೋ ಇದೆ.

ಹೊಸತನದ ನಾಯಕತ್ವ

4 ಜಿ ಸೇವೆ ಒದಗಿಸುತ್ತಿರುವ ಏರ್ಟೆಲ್ ಮತ್ತು ವೋಡಾಫೋನ್ ನೊಂದಿಗಿನ ಪೈಪೋಟಿಗೆ ಬ್ರೇಕ್ ಹಾಕಲು ಮುಂದಿನ ವರ್ಷದಿಂದ 5 ಜಿ ಅಪ್ಗ್ರೇಡ್ ಮಾಡಲಿದ್ದು, ಆ ಮೂಲಕ 4 ಜಿ ಫ್ರಂಟ್ ನಿಂದ 5 ಜಿಗೆ ಜಂಪ್ ಮಾಡಲಿದೆ. ವೇಗದ ಬ್ರಾಡ್ಬ್ಯಾಂಡ್ ತಂತ್ರಜ್ಞಾನ, ಹೊಸ ಅವಿಷ್ಕಾರ ಮತ್ತು ಮಾರುಕಟ್ಟೆಯಲ್ಲಿ ಆದಾಯ ಪಾಲು ಹೋರಾಟದಲ್ಲಿ ಮುಂದೆ ನಿಂತು ನಾಯಕತ್ವವನ್ನು ಕಾಪಾಡಿಕೊಳ್ಳಲಿದೆ ಎನ್ನಲಾಗಿದೆ.

ಏರ್ಟೆಲ್, ವೋಡಾಫೋನ್-ಐಡಿಯಾಗೆ ಹೊಡೆತ

ಜಿಯೋ 5G ನೆಟ್ವರ್ಕ್ ನ್ನು ಪರಿಚಯಿಸುವುದರಿಂದ ಭಾರ್ತಿ ಏರ್ಟೆಲ್, ವೋಡಾಫೋನ್ ಐಡಿಯಾಗೆ ಬಹುದೊಡ್ಡ ಹೊಡೆತ ಬೀಳಲಿದೆ ಎಂದು ವಿಶ್ಲೇಷಿಸಲಾಗಿದೆ. ಏಕೆಂದರೆ ಈ ಕಂಪನಿಗಳು 4ಜಿ ಸೇವೆ ಒದಗಿಸಲು ಇನ್ನೂ ತಡಕಾಡುತ್ತಿವೆ. ಜಿಯೋ 5Gಯೊಂದಿಗೆ ಪೈಪೋಟಿ ನೀಡಬೇಕೆಂದರೆ ನಗರ ಮಾರುಕಟ್ಟೆಗಳಲ್ಲಿ 4ಜಿ ಸೇವೆ ಅತ್ಯುತ್ತಮಗೊಳಿಸಿ ಅಂತರವನ್ನು ಕಡಿಮೆಗೊಳಿಸಬೇಕಾಗುತ್ತದೆ.