ಯೆಸ್ ಬ್ಯಾಂಕ್ ನ ಶೇ 25ಕ್ಕಿಂತ ಹೆಚ್ಚು ಷೇರು ಇನ್ನು 3 ವರ್ಷ ಮಾರಕ್ಕಾಗಲ್ಲ

ಖಾಸಗಿ ಬ್ಯಾಂಕ್ ಆದ ಯೆಸ್ ಬ್ಯಾಂಕ್ ಗೆ ಜೀವ ತುಂಬಬೇಕು ಎಂಬ ಜಿದ್ದಿಗೆ ಬಿದ್ದು, ಅದರ ಷೇರುದಾರರ ಹಿತಾಸಕ್ತಿಯನ್ನು ಬಲಿ ನೀಡಲಾಗುತ್ತಿದೆ ಎಂಬ ಆರೋಪ ದಟ್ಟವಾಗಿದೆ. ಅದಕ್ಕೆ ಕಾರಣವಾಗಿದ್ದು ಮಾರ್ಚ್ 13ನೇ ತಾರೀಕು ಸರ್ಕಾರ ಹೊರಡಿಸಿದ ಯೆಸ್ ಬ್ಯಾಂಕ್ ಪುನಶ್ಚೇತನ ಯೋಜನೆ.

ಅದರ ಪ್ರಕಾರ, ಈಗಿನ ರೀಟೇಲ್ ಷೇರುದಾರರು ತಮ್ಮ ಪಾಲಿನ 75% ಷೇರನ್ನು 3 ವರ್ಷಗಳ ತನಕ ಮಾರುವುದಕ್ಕೆ ಆಗಲ್ಲ. 100 ಷೇರುಗಳ ಒಳಗೆ ಯಾರ ಬಳಿ ಇದೆಯೋ ಅಂಥವರಿಗೆ ಈ ನಿಯಮ ಅನ್ವಯಿಸುವುದಿಲ್ಲ. ಅವರು ತಮ್ಮೆಲ್ಲ ಷೇರುಗಳನ್ನು ಮಾರಿಕೊಳ್ಳಬಹುದು.

ಭಾರತದ ಕಾರ್ಪೊರೇಟ್ ಇತಿಹಾಸದಲ್ಲೇ ಹಿಂದೆಂದೂ ಕೇಳರಿಯದ ವಿಲಕ್ಷಣ ನಿಯಮ ಇದು ಎನ್ನಲಾಗುತ್ತಿದೆ. ಇದರಿಂದ ಯೆಸ್ ಬ್ಯಾಂಕ್ ನ 16.18 ಲಕ್ಷ ರೀಟೇಲ್ ಷೇರುದಾರರ ಮೇಲೆ ಪ್ರಭಾವ ಆಗಲಿದೆ.

ಯೆಸ್ ಬ್ಯಾಂಕ್ ನ ಗರಿಷ್ಠ ಮಟ್ಟ ಅಂತ ಇದ್ದದ್ದು ಆಗಸ್ಟ್ 2018ರಲ್ಲಿ. ಆಗ ಕೂಡ ನೂರು ಷೇರಿನ ಬೆಲೆ 39,200 ಮಾತ್ರ. ರೀಟೇಲ್ ಷೇರುದಾರರು ಅಂದರೆ 2 ಲಕ್ಷ ರುಪಾಯಿ ಮೌಲ್ಯದೊಳಗಿನ ಷೇರಿನ ಮಾಲೀಕತ್ವ ಇರುವವರು. ಯೆಸ್ ಬ್ಯಾಂಕ್ ನಲ್ಲಿ 43.66% ರೀಟೇಲ್ ಷೇರುದಾರರಿದ್ದಾರೆ. ಇನ್ನು ಎರಡು ಲಕ್ಷಕ್ಕಿಂತ ಹೆಚ್ಚಿನ ಮೊತ್ತದ ಷೇರು ಹೊಂದಿರುವವರು 4.33% ಇದ್ದಾರೆ.

ಮಾರ್ಚ್ 27ನೇ ತಾರೀಕಿನಿಂದ ನಿಫ್ಟಿಯಲ್ಲಿ ವಹಿವಾಟು ಮಾಡುವುದರಿಂದಲೂ ಯೆಸ್ ಬ್ಯಾಂಕ್ ಹೊರಬೀಳುತ್ತದೆ.