ಪನ್ನಾ ಜಿಲ್ಲೆಯಲ್ಲಿ 35 ವರ್ಷದ ಆನಂದಿಲಾಲ್ ಗೆ ಸಿಕ್ಕಿತು 50 ಲಕ್ಷದ ವಜ್ರ

ಮಧ್ಯಪ್ರದೇಶದ ಪನ್ನಾ ಜಿಲ್ಲೆಯ ಗಣಿಯೊಂದರಲ್ಲಿ ಅಂದಾಜು 50 ಲಕ್ಷ ಮೌಲ್ಯದ 10.69 ಕ್ಯಾರೆಟ್ ನ ವಜ್ರವು ಪತ್ತೆಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ರಾಣಿಪುರ ಪ್ರದೇಶದಲ್ಲಿ 35 ವರ್ಷದ ಆನಂದಿಲಾಲ್ ಖುಷ್ವಾ ಎಂಬುವವರು ಗಣಿಯನ್ನು ಭೋಗ್ಯಕ್ಕೆ ಪಡೆದಿದ್ದು, ಅವರು 10.69 ಕ್ಯಾರೆಟ್ ನ ವಜ್ರವನ್ನು ಸ್ಥಳೀಯ ವಜ್ರದ ಕಚೇರಿಯಲ್ಲಿ (ಹೀರಾ ಕಾರ್ಯಾಲಯ) ನೀಡಿದ್ದಾರೆ ಎಂದು ಸ್ಥಳೀಯ ಅಧಿಕಾರಿ ಆರ್.ಕೆ. ಪಾಂಡೆ ಮಾಹಿತಿ ನೀಡಿದ್ದಾರೆ.

ಈಚೆಗೆ ಖುಷ್ವಾ 70 ಸೆಂಟ್ ವಜ್ರವನ್ನು ಡೆಪಾಸಿಟ್ ಮಾಡಿದ್ದರು ಎಂದು ತಿಳಿಸಲಾಗಿದ್ದು, ಜಿಲ್ಲೆಯಲ್ಲಿ ಕೊರೊನಾ ಲಾಕ್ ಡೌನ್ ವಿನಾಯಿತಿ ನೀಡಿದ ಮೇಲೆ ಸಿಕ್ಕಂಥ ಮೊದಲ ದೊಡ್ಡ ವಜ್ರ ಇದು ಎಂದು ಅಧಿಕಾರಿಗಳು ಹೇಳಿದ್ದಾರೆ. ಅಂದ ಹಾಗೆ ವಜ್ರವನ್ನು ಇನ್ನೂ ಮೌಲ್ಯಮಾಪನ ಮಾಡಿಲ್ಲ. ಆದರೆ ಸ್ಥಳೀಯ ತಜ್ಞರು ಹೇಳುವಂತೆ, ಈ ವಜ್ರದ ಗುಣಮಟ್ಟ ಆಧರಿಸಿ 50 ಲಕ್ಷ ರುಪಾಯಿ ತನಕ ಹಣ ಬರಬಹುದು.

ಪ್ರಾತಿನಿಧಿಕ ಚಿತ್ರ

ಖುಷ್ವಾ ಅವರು ಮಾಧ್ಯಮಗಳ ಜತೆ ಮಾತನಾಡಿ, ನಾನು ಹಾಗೂ ನನ್ನ ಪಾರ್ಟನರ್ ಗಳು ಕಳೆದ ಆರು ತಿಂಗಳಿಂದ ಗಣಿಯಲ್ಲಿ ಬಹಳ ಕಷ್ಟಪಟ್ಟು ಕೆಲಸ ಮಾಡಿದ್ದೀವಿ. ಈಗ ಸಿಕ್ಕಿರುವ ವಜ್ರದಿಂದ ಬಹಳ ಖುಷಿ ಆಗಿದ್ದೇವೆ ಎಂದು ತಿಳಿಸಿದ್ದಾರೆ. ಪನ್ನಾ ಜಿಲ್ಲೆ ಇರುವುದು ಮಧ್ಯಪ್ರದೇಶದ ಬುಂದೇಲ್ ಖಂಡ್ ಭಾಗದಲ್ಲಿ. ಇಲ್ಲಿ ವಜ್ರದ ನಿಕ್ಷೇಪಗಳಿಗೆ ಹೆಸರುವಾಸಿಯಾಗಿದೆ.