ಡಿಸ್ಕೌಂಟ್ ಸೇಲ್ ಮೋಸಕ್ಕೆ 56.1% ಭಾರತೀಯರು ಬಲಿ

ಎಲ್ಲಾದ್ರೂ ಮಳಿಗೆಗಳಲ್ಲಿ, ಮಾಲ್‌ನಲ್ಲಿ ಯಾವುದಾದರೂ ವಸ್ತು ಅಥವಾ ಸೇವೆಯ ಮೇಲೆ ಡಿಸ್ಕೌಂಟ್ ಇದೆ ಅಂದರೆ ಮುಗಿದೇ ಹೋಯ್ತು. ಜನರು ಸಾಲುಗಟ್ಟಿ ನಿಂತು ಬೇಕಾದ್ರೂ ಮಳಿಗೆಗೆ ತೆರಳುತ್ತಾರೆ. ಅದೇ ರೀತಿಯ ಯಾವುದಾದರೂ ಶಾಪಿಂಗ್‌ ಸೈಟ್‌ನಲ್ಲಿ ಡಿಸ್ಕೌಂಟ್ ಇದೆ ಅಂದ್ರೆ ತಕ್ಷಣವೇ ಕೈ ಬೆರಳು ಆ ಆಯ್ಕೆಯ ಕಡೆಗೆ ತೆರಳಿಬಿಡುತ್ತೆ. ಆದರೆ ಈ ಡಿಸ್ಕೌಂಟ್ ಸೇಲ್ ಕುತೂಹಲದಿಂದಲೇ, ಒಟ್ಟಾರೆ ಭಾರತೀಯರಲ್ಲಿ 56.1 ಪರ್ಸೆಂಟ್ ಜನರು ಮೋಸದ ಜಾಲಕ್ಕೆ ಬಲಿಯಾಗಿದ್ದಾರೆ ಎಂದು ಸಮೀಕ್ಷೆಯೊಂದು ತಿಳಿಸಿದೆ.

ಖ್ಯಾತ ಆ್ಯಂಟಿ ವೈರಸ್ ಕಂಪನಿ ಮೆಕಫಿ ಪ್ರಕಾರ 2019ರಲ್ಲಿ 56.1 ಪರ್ಸೆಂಟ್‌ಗೂ ಹೆಚ್ಚು ಜನರು ಅಂತರ್ಜಾಲದಲ್ಲಿ ಸುಳ್ಳು ಸೇವಾಸಂಸ್ಥೆಗಳ ಜಾಲಕ್ಕೆ ಸಿಲುಕುತ್ತಿದ್ದಾರೆ. ಇದರಲ್ಲಿ ಭಾರತೀಯರೇ ಹೆಚ್ಚಾಗಿದ್ದು 50 ಪರ್ಸೆಂಟ್‌ಗೂ ಹೆಚ್ಚು ಜನರು ಮೋಸಕ್ಕೆ ಒಳಗಾಗಿದ್ದಾರೆ. ಹಬ್ಬದ ಸೀಸನ್‌ಗಳಲ್ಲಿ ಕೆಲವೊಂದು ಸೈಟ್‌ಗಳು ಹೆಚ್ಚು ಡಿಸ್ಕೌಂಟ್ ಆಫರ್‌ಗಳನ್ನು ನೀಡುವ ಮೂಲಕ ಜನರನ್ನು ಮೋಸದ ಜಾಲಕ್ಕೆ ತಳ್ಳುತ್ತಿವೆ.

ಇನ್ನು ಸುಳ್ಳು ಆನ್‌ಲೈನ್ ಖರೀದಿ ವೆಬ್‌ಸೈಟ್‌ಗಳ ಮೂಲಕ 28.6 ಪರ್ಸೆಂಟ್ ಭಾರತೀಯರು 20,000 ರುಪಾಯಿಗಳವರೆಗೂ ಹಣ ಕಳೆದುಕೊಂಡಿದ್ದಾರೆ. 78.6 ಪರ್ಸೆಂಟ್ ಜನರು ಕೆಲವೊಂದು ಸನ್ನಿವೇಶಗಳಲ್ಲಿ ಹಣ ಕಳೆದುಕೊಂಡಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಅಂತರ್ಜಾಲದಲ್ಲಿ ಮೋಸ ಹೋಗುವವರ ಸಂಖ್ಯೆ ಹೆಚ್ಚುತ್ತಲೇ ಇದೆ. ಇ-ಮೇಲ್ ಮೂಲಕ ಹಣ ಗೆದ್ದಿದ್ದೀರಾ ಎಂದು ಆಫರ್ ನೀಡುವುದು ಅಥವಾ SMS ಬರುವುದು ಸಾಮಾನ್ಯವಾಗಿಬಿಟ್ಟಿದೆ. ಈ ಮೋಸದ ಜಾಲಗಳಲ್ಲಿ ಭಾರತೀಯರೇ ಹೆಚ್ಚು ಸಿಲುಕುತ್ತಿರುವುದು ದುರದೃಷ್ಠಕರ. ಹೀಗಾಗಿ ಈ ರೀತಿಯ ಮೋಸದ ಜಾಲದ ವಿರುದ್ಧ ಜನರು ಎಚ್ಚೆತ್ತುಕೊಳ್ಳಬೇಕು.