Bengaluru: ಗ್ವಾಲಿಯರ್ ಮತ್ತು ಬೆಂಗಳೂರು ನಡುವೆ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ದೈನಂದಿನ ವಿಮಾನಯಾನ ಪ್ರಾರಂಭ

ಬೆಂಗಳೂರು, ಜನವರಿ 19: ಬೆಂಗಳೂರಿನ ವಿಮಾನ ಪ್ರಯಾಣಿಕರಿಗೆ ಒಳ್ಳೆಯ ಸುದ್ದಿಯೊಂದು ಬಂದಿದೆ. ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಈಗ ಗ್ವಾಲಿಯರ್ ಮತ್ತು ಕರ್ನಾಟಕದ ರಾಜಧಾನಿ ಬೆಂಗಳೂರು ನಡುವೆ ದೈನಂದಿನ ವಿಮಾನ ಸೇವೆಯನ್ನು ಪ್ರಾರಂಭಿಸಿದೆ.

ಕೇಂದ್ರ ನಾಗರಿಕ ವಿಮಾನಯಾನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ, ಮಧ್ಯಪ್ರದೇಶ ಮುಖ್ಯಮಂತ್ರಿ ಮೋಹನ್ ಯಾದವ್ ಮತ್ತು ಇತರರೊಂದಿಗೆ ಮೊದಲ ವಿಮಾನಕ್ಕೆ ಚಾಲನೆ ನೀಡಿದರು. ಇತ್ತೀಚೆಗೆ ಗ್ವಾಲಿಯರ್ ಮತ್ತು ಹೈದರಾಬಾದ್ ನಡುವೆ ಏರ್ ಇಂಡಿಯಾ ಸಂಸ್ಥೆಯು ದೈನಂದಿನ ನೇರ ವಿಮಾನಗಳನ್ನು ಪರಿಚಯಿಸಿತ್ತು.

"ಇದು ನಮಗೆಲ್ಲರಿಗೂ ಹೊಸ ಆರಂಭವಾಗಿದೆ. ಇದು ವಿಶ್ವ ದರ್ಜೆಯ ಸಂಪರ್ಕದ ಮೂಲಕ ಭಾರತದ ಆರ್ಥಿಕ ಮತ್ತು ಆಧ್ಯಾತ್ಮಿಕ ಶಕ್ತಿಯನ್ನು ತೋರಿಸಲು ಮತ್ತು ವರ್ಧಿಸಲು ಪ್ರಧಾನ ಮಂತ್ರಿಯವರ ದೃಷ್ಟಿಯಾಗಿದೆ. ಗ್ವಾಲಿಯರ್ ಈಗ ದೆಹಲಿ, ಹೈದರಾಬಾದ್, ಇಂದೋರ್, ಮುಂಬೈ, ಬೆಂಗಳೂರು ಮತ್ತು ಅಯೋಧ್ಯೆ ಎಂಬ ಆರು ನಗರಗಳೊಂದಿಗೆ ವಿಮಾನದ ಮೂಲಕ ಸಂಪರ್ಕ ಹೊಂದಿದೆ ಮತ್ತು 33 ಸಾಪ್ತಾಹಿಕ ವಿಮಾನ ಚಲನೆಗಳನ್ನು ಹೊಂದಿದೆ" ಎಂದು ಅವರು ಹೇಳಿದರು.

ಏರ್ ಇಂಡಿಯಾ ಎಕ್ಸ್‌ಪ್ರೆಸ್‌ನ ವ್ಯವಸ್ಥಾಪಕ ನಿರ್ದೇಶಕ ಅಲೋಕ್ ಸಿಂಗ್ ಮಾತನಾಡಿ, "ಗ್ವಾಲಿಯರ್‌ನಿಂದ ದೆಹಲಿಗೆ ನೇರ ಸೇವೆಗಳು ಶೀಘ್ರದಲ್ಲೇ ಅಯೋಧ್ಯೆ ಸೇರಿದಂತೆ ಹಲವು ನಗರಗಳಿಗೆ ಏಕ ನಿಲುಗಡೆ ಪ್ರಯಾಣದೊಂದಿಗೆ ಪ್ರಾರಂಭವಾಗಲಿವೆ.

ಗ್ವಾಲಿಯರ್‌ನ ಬೆಳವಣಿಗೆಗೆ ಕೊಡುಗೆ ನೀಡಲು ನಾವು ಹೆಮ್ಮೆಪಡುತ್ತೇವೆ ಮತ್ತು ಇದು ಹೊಸ ಭಾರತದ ಬೆಳವಣಿಗೆಯ ಎಂಜಿನ್‌ಗಳಾದ ಶ್ರೇಣಿ 2 ಮತ್ತು ಶ್ರೇಣಿ 3 ನಗರಗಳಲ್ಲಿ ಸಂಪರ್ಕವನ್ನು ಹೆಚ್ಚಿಸುವ ನಮ್ಮ ಬದ್ಧತೆಯನ್ನು ಬಲಪಡಿಸುತ್ತದೆ ಎಂದು ತಿಳಿಸಿದರು.

ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಇತ್ತೀಚೆಗೆ ಅಯೋಧ್ಯೆ, ಬೆಂಗಳೂರು ಮತ್ತು ಕೋಲ್ಕತ್ತಾ ನಡುವೆ ನೇರ ವಿಮಾನಗಳನ್ನು ಘೋಷಿಸಿತ್ತು, ಅದು ಜನವರಿ 17 ರಿಂದ ಪ್ರಾರಂಭವಾಯಿತು. ಏರ್‌ಲೈನ್ ಇತ್ತೀಚೆಗೆ ಅಯೋಧ್ಯೆ ಮತ್ತು ದೆಹಲಿ ನಡುವೆ ನೇರ ವಿಮಾನಯಾನವನ್ನು ಪ್ರಾರಂಭಿಸುವುದಾಗಿ ಘೋಷಿಸಿತು.